בְּתֹורַת מֹשֶׁה בְּשִׂמְחָה וּבְשִׁיר עַל יְדֵי דָוִֽיד
אין די יעצטיגע מינוטן קומט אַריין די איבערראַשנדע בשורה טובה ומרנינה, וואָס ווערט אויפגענומען מיט באַגייסטערונג צווישן רבבות תלמידי וחסידי סאַטמאַר איבער דער וועלט, שטוינענדיג און זיך מיטפרייענדיג אין די מאַסיווע הרחבת גבולי הקדושה וואָס גאַלאָפּירט אויף אַ מאַסשטאַבליכער פאַרנעם אין דער סאַטמאַרער בליענדער שטאָט "קרית יטב לב", וואָס איז דער שטאָלץ און כתר מלכות בראש מלכות סאַטמאַר בתפארתה, תחת דגלו ונישאתו פון מייסד העיר מנהיג עדתינו כבוד קדושת מרן רבינו שליט"א.
אין די פאַרלאָפענע מינוטן איז געוואָרן אונטערגעשריבן נכתב ונחתם בטבעת המלך פון עטרת תפארת ראשינו כ"ק מרן רבינו שליט"א בביתו נאוה קודש אין וויליאַמסבורג די אָסטראָנאָמישע נדבה אדירה פון איינס אַהאַלב מיליאָן דאָלאַר!! דורך הטפסר המרומם, העומד לימין הקודש להחיות נפש צדיק בכל עת מצוא, בפרט למען הרחבת גבולי הקדושה בתוככי קרית יטב לב הרה"ח ר' פישל מיללער שליט"א מחשובי ומפארי אנ"ש צו אָפּקויפן די זכות שם הבנין פון די פּראַכטפולע ריזן בנין ביהמ"ד החדש והמפואר דקהל יטב לב דער צענטראַלער ביהמ"ד פאר תושבי העיר וואָס ווערט אין די יעצטיגע טעג צוגעבויט אַ גיגאַנטישע נייע בנין לשם ולתפארת לכבוד אביו היקר הבלתי נשכח הרה"ח ר' משה דוד בר ברוך ז"ל און מיט דעם ווערט די צענטראַלע גרויסע ביהמ"ד דקרית טב לב באַקרוינט מיט'ן נאָמען בנין משה דוד לדורות עולם – לזכרון נצח!
די דראַמאַטישע שריט וואָס דער שעפערישער נדבן הדגול האָט אַצינד גענומען צו שטיין לימין הקודש פון כ"ק מרן רבינו שליט"א, וואָס גייט אין לעבן די אויפבוי און בליאונג פון די הערליכע סאַטמאַרער שטאָט, האָט אַריינגעבלאָזן באַגאַדזשן פון חיזוק אין די הערצער פון די געטרייע חברי וועד קרן הבנין.
דאָס טוט געבן די ענדגילטיגע שטופּ בעזר שמו הגדול, צו קענען צוטרעטן צו די צווייטע פאַזע במלאכת הבוי' בעת וואָס די גאַנצע סטרוקטור שטייט שוין על תילה בנוי', און אַצינד וועט מען זיך תיכף ומיד נעמען צו פאַרמאַכן די געביידע און פאָראויסגיין מיט די עבודה צו קענען פּראַווען די פריידיגע פּתיחת שערים בעז"ה אין די קומענדיגע ווינטער חדשים!
די אויפבוי פון די נייע בנין ביהמ"ד טוט פאָרברייטן די באָדן צו מקבל זיין די פרישע הונדערטער תושבים אנשי שלומינו וואָס קויפן דירות אין די צענדליגער נייע דעוועלאָפּמענטס וואָס בויען זיך אין אַלע ווינקלען פון שטאָט, און וועט פיל לינדערן די שווערע לחץ זו הדחק וואָס הערשט אין די עקזיסטירנדע בנין וואָס איז שוין פון לאַנג צר מהכיל.
וְהָיָה לה' לְשֵׁם לְאוֹת עוֹלָם לֹא יִכָּרֵת!
וַיְהִי בֹּנֶה עִיר וַיִּקְרָא שֵׁם הָעִיר!