שלשלת האט געשריבן: ↑מיטוואך אפריל 30, 2025 6:45 pm
שמועות טובות האט געשריבן: ↑מיטוואך אפריל 30, 2025 2:13 pm
וואלסטו געווען אביסל מער באקאנט פון וואס עס טוט זיך דארטן אינעווייניג וואלסטו דאס נישט געזאגט
איך בין ליידער יא באקאנט שוין נישט פון היינט און מיר קען מען נישט פארקויפן סיי וואס, איך קען די חברה בעסער ווי דו מיינסט
הבהרה: טייערע ליינער, אויב ביסטו א וויקטעם פון אביוז און דעי נושא טריגערט דיר, זיי גוט פאר דיר אליינס און ליין דאס נישט.
כ'בין מיך מיישב אהער און אהין צו יא אדער נישט שרייבן, למעשה גייעך שרייבן און אויב איז עס שלא כפי תקנות ורוח המקום ביטע מיר זאגן און כ'וועל מעקן, אויך שרייבט מען דא אנאנים און כ'קען נישט קיינעם ממילא ערלויב מען זיך מער און ס'קען זיין אומריכטיג כלפי ספעציפישע ניקס
קודם, ביי אונז היימישע סאטמארע יודן איז דא א גרויסע חלל אין פארשטיין די טיעפקייט פון די נושא פון א נארסעסיסט אדער א קאנטראלער, עס האט כמה סיבות, ומהם, אז עס ווערט גענוצט אפט ביי נערישע קריגעריי און אז די נושא פון מענטאל העלט איז געווען אפגעפרעגט יארן לאנג משום כמה גוטע סיבות אשר אין כאן המקום להאריך
יודן זענען בטבע רחמנים, מען גלייבט נישט און מען פארנעמט נישט קיין מעשה אכזריות בגשמיות וברוחניות פון א רודף, מען וועט פרובירן מיט אלע כוחות צו מיישב זיין אז דער מענטש איז נישט אזוי געפערליך נאר דער נרדף טרייבט איבער
צו פארשטיין א משהו, שלא כסדרן, ווי געשריבן פריער, א נרדף פון אן אביוזער אנערקענט נישט ע"פ רוב אז ער איז בכלל א נרדף, ער קוקט ארויף דעם רודף אלס זיין העלד, זיין מציל ומושיע און גלייבט אים לכל דבר
דער וועג וויאזוי דער אביוזער מאכט עס, הייבט זיך אן מיטן בויען א מוראדיגע בילד פון זיך, ווי טיעף, קלוג און פארטשענדליך ער איז , ווי אמת'דיג ערליך ער איז וכו', נאכדעם וועט ער אריינווארפן ספיקות אין יעדע זאך וואס דער מענטש האט געגלייבט (ע"ע געזלייטונג), נאכדעם וועט ער מסביר זיין אז די בליק וואס דער נרדף האט איז נאריש און אפגעפרעגט, מיט די צייט וועט ער מסביר זיין אז ער האט די ריכטיגע בליק און גלויבונג און די נרדף גייט עס אפקויפן פאר גוט געלט, כדי דאס זאל ארבעטן וועט ער אפהאקן די נרדף פון די דרויסענדע וועלט אז די נרדף זאל זיך אפי' נישט קענען דורכרעדן, ער וועט אויפווייזן ווי פאלטש, נישט עהרליך, שלעכט און נאריש אלע נאנטע זענען און וועט זיכער מאכן אז דער נרדף האקט אפ און מאכט זיי אליינס אוועק, ער וועט טרעפן יעדע שוואכקייט וואס דער נרדף מיינט ער האט און ארויפווארפן אויף אלע אלטע נאנטע, און ער וועט שטארקן דעם נרדף און מסביר זיין אז ער האט דעם מהלך צו העלפן, דער נרדף גייט אנפאנג פילן מורא'דיג דערהויבן, ער וועט באמת ווערן קאנפידענט און טראסטן דעם רודף, נאכדעם טרעפט דער רודף נאך זאכן ווי דער נרדף האט שוואכקייטן און הייבט אָן דערנידערן דערויף, און ווייטער נאר ער קען עס העלפן, ער שלעפט דעם נרדף אריין אין זיין זאק זייער צוביסלעך ביז דער נרדף ווערט טאטאל קא-דיפענדענט אויף אים און פארלירט אינגאנצן דעם אייגענעם מיינונג,
דער נרדף רעדט זיך אויס נאר צום רודף און ער נוצט עס אויס צו באקומען מער און מער קאנטראל, עס קומט כסדר צו פרישע רדיפות און פיזישע אכזריות אלטס גרויס רחמנות וואס ער האט פארן נרדף אים אויסצומענטשל'ן, יעדע זאך איז אויסגערעכנט (אסאך מאל סוב קאנשעס) צו משפיל זיין דעם נרדף און לייגן פיזישע און גייסטישע דרוק אז ער זאל נישט טראכטען פון אוועקגיין און לעבן אלס קנעכט, ער וועט זאגן אז יעדער ווייסט אז דו ביסט גארנישט דו אליינס ווייסט דאס, דו ביסט שולדיג אויף דיינע און מיינע פראבלעמען, ער וועט עס חזר'ן כסדר מיטן נרדף און מאכן דער נרדף זאל עס זאגן כאילו מדעת עצמו, זעהסט נישט? דו אליינס האלטסט אויך אזוי!
א נרדף פון אביוז האט נישט קיין שום מיינונג אויף גארנישט, דער רודף לערנט אויס צו זאגן אז דו אליינס האלטסט דאך אזוי, דו אליינס פארשטייסט עס! די לעבן פון א נרדף איז איין שטיק צובראכנקייט, אומזיכערקייט, און סעלף בלעים, און פון די אנדערע זייט משוגע קאנפידענט אז זיין רודף איז גערעכט און מיינט נאר זיין טובה
טאמער וועט דער רודף זעהן אז ער האט איבערגעצויגן די שטריק, וועט ער מסביר זיין אז דער נרדף איז שולדיג און וואספארא איש מכובד ער איז און מען וועט דיר סייווי נישט גלייבן און די פאלטשע וועלט מיינט נישט דיין טובה, זיי מיינען זיך און ווילן רייטן אויף דיר אסאך ערגער ווי איך וואס וויל דיר העלפן, ער וועט גיין צו פיזישע ווייעלענס צו אפהאלטן אנטלויפן, און איינמאל ער צוריק קאנטראל וועט ער הייסן דעם נרדף אליינס מסביר זיין וואספארא טעות ס'איז געווען
באמת איז א רודף ע"פ רוב גערעכט ליידער אז מען וועט נישט גלייבן דעם נרדף! רובא דרובא פון די רשעים נארסעסיסטן זענען עכ"פ נארמאלע און אפ' ארויפגעקוקטע מענטשן אין גאס, און וכאן המקום ווי מען דארף קלאפן על חטא אויף די רשעות און אכזריות פון די ביטערע כת, מיר האבן דאס צוגעלאזט ביי כרם ישראל קאלטבלוטיג, און משם יצאו מחבלי כרמים, רשעים ואכזרים וואס האבן פארגאסן יודיש בלוט בלויז פאר זייער תאוות השררה ווען זיי האבן באגעגנט די לסטים שכמותן
יעצט למעשה, אויב קרובים וידידים זעהן אזא צרה וועלן רוב פון וואס פרובירן צו העלפן א נרדף האלטן אז זיי זענען מער כיטרע פונעם רודף און וועלן איבערקלוגן דעם רודף, דאס מאכט דעם רודף אסאך מער שעדליך און מער געוואגט, ער וועט נעמען יעדן מין שריט אפצושטעלן די סכנה פון פארלירן זיין עבד, פארדעם וועסטו דעם וועסטו הערן פונעם נרדף דברי לעג וזלזול קעגן וואס ס'שטעלט דעם רודף אין געפאר
ארויסנעמען א נרדף פון אן רודף פארלאנגט צו ארבעטן מיט פראפעסיאנעלע מומחים אין דעם פעלד, און כמה פעמים פעלט אויס פיזישע צוטיילונג פאר א לענגערע צייט ביז מען קען געווינען דעם נרדף, בשעת דאס גייט אן ביז דער נרדף ווערט אביסל געהיילט, איז דער נרדף אין א שרעקליכע ענגשאפט, ער האט פארלוירן זיין אונטערלאנונג, ער איז אליינס אויפן ים הגדול, פארפרעמד אָן קרובים וידידים, ער איז ארומגענומען מיט מענטשן וואס מיינען זיין שלעכטס און ווילן אים מער אונטערדרוקן און ער איז נאך שולדיג אויף אלעמען (כפי הנ"ל), מען ברויך באמת ווערן באגלייט דורך א מומחה (הרב חיד"ו האט עקספיריענס אין דעם און כש"כ רב העכט) ווי אזוי צו האנדלען מיט די לבבות נשברות
ב"ה אז דער בוכ"ע האט געהאלפן אז ס'איז געווארן אן אויפוואכונג אז מ'גלייבט כאטש די רשעות ואכזריות, און די וואס זענען נישט עכ"פ חייש אז ס'קען זיין אלעס אמת נאכן הערן פון עטליכע באזונדערע קוועלער זאלן וויסן אז זיי טוען בלא יודעים העלפן אנדערע אכזרים אנגיין מיט רשעות
וואס ווילעך? כ'ווייס שוין אליינס נישט, אבער כ'וויל אז דער עולם זיין סענסיטיוו צו די עולי בבל און צו וויקטעם'ס פון אביוז בכלל, און זיי נאר שטארקן און געבן א גוט ווארט, א שאד צו טראכטן וואס דער און יענער האט אפשר געטאן דארט, איינמאל מען האט זיי ארויסגענומען פון דארט, פארגעס פונעם עבר, זיי וועלן תשובה טאן שפעטער, דו זיי מחזק א לב נשבר, זאג אים א גוט מארגן, זאג אים א גוטן טאג, זאל ער וויסן אז מען איז יא אינטערעסירט אין אים, מען קוקט זיך אום אויף אים און מען וויל אים און גלייבט אים, פרעג אים נישט וואס ער איז דורך, לאז אים רעדן און ווייז מיטגעפיל, דו פארשטייסט ע"פ רוב נישט די טיעפקייט פון זיין צער, ווען ער וועט האבן די שטארקייט וועט ער רעדן, אויב האסטו נישט אינגאנצן ארויס דעם ענין אלס דאקטער אדער עכ"פ געפירט דורך מענטשן מיט עכטע עקספיריענס אין דעם ספעציפישן פעלד, לאז דיר ארויס, פרוביר נישט אליין צו העלפן, קענסט ע"פ רוב מער חרוב מאכן ווי בויען
נאך איין זאך, זייט מחזק די עסקנים און גיב זיי א גוט ווארט, פרעג זיי מיט וואס די קענסט העלפן, זיי רייסן זיך איבער און הערן די פרויען און קינדער וויינען אז זיי ווילן צוריקגיין, זיי ווערן צוריסן, שיק אריין אפאר דאלער אז ס'זאל זיין געלט, עס גיבט חיזוק און מוט אז מענטשן פילן מיט
נ.ב. כ'בין נישט קיין דאקטאר, טעראפיסט אדער מומחה אין דעם, און אויך נישט קיין ת"ח אדער דעת תורה, און ב"ה נישט דורך קיינמאל אזא מצב, פשוט געשריבן מיטהאלטנדיג אזעלכע מצבים און ליינענדיג אסאך אין דעם נושא
