כאטש וואס רבי נפתלי ליזענסקער איז געווען א צדיק יסוד עולם האט ער בשום אופן נישט געוואלט אנעמען קיין רבי'סטעווע. חוץ איין טאג אין יאר, פורים. דאן האט ער משנה געווען פון זיין מנהג, ער האט זיך אנגעטוהן רבי'שע מלבושים און געפראוועט אן עולם. חסידים דערציילן אז מען האט דעם הייליגן טאג געזען ביים אים אויסערגעווענליכע זאכן, ווי אויך אפענע מופתים, אז אפילו שווערע בעלי מום ווי שטומע, הינקעדיגע און אנדערע קראנקע ל"ע זענען ביי אים געהאלפן געווארן באופן פלא.
מעשה: רבי יענקלע פון פשעווארסק (יארצייט דעם שב"ק) האט דערציילט: א איד האט אמאל א טובה געטוען פאר רבי נפתלי ליזענסקער. א צייט שפעטער האט זיך דער איד מזכיר געווען פאר אים, דער איז האט זיך אויסגעגעגאסן דאס הארץ אז ער פלעגט יארן לאנג דינגען א גאסט הויז פונעם פריץ, און איצט איז געקומען א צווייטער איד און אים משיג גבול געווען, און אויסגעדינגען די האטעל פונעם פריץ. איצט איז ער געבליבן אן קיין פרנסה. פרעגט אים רבי נפתלי, ווי אזוי הייסט דער משיג גבול. ענפערט ער: "פסח". נו, מאכט אים רבי נפתלי, "פסח איז דאך נאר אכט טאג!" דער בעל אכסניא האט זיך געוואונדערט אויף דעם אינטערסאנטן ענטפער, אבער ער האט געהאט אמונת צדיקים אז ער איז שוין א געהאלפענער.
נישט לאנג דערויף קומט איינער זאגן די בשורה אז דער פריץ האט פארשיקט דעם פסח פון גאסט הויז. ער האט אים נישט געגלויבט, ער האט געמיינט אז זיכער מ'טרייבט שפאס פון אים, אבער דער מבשר ווייזט אים פון פענסטער אן אנגעלאדענטע וואגן מיט פסח'ס הויז געזונד גרייט ארויסצופארן פון שטאט. (המעשה יש לו פרטים וקיצרנו).
בניו הקדושים:
- רבי יעקב יצחק - רבי איציקל מזידיטשוב ז"ל, האט מען אים גערופן.
- רבי אלעזר ז"ל
- רבי זושא מנאדבורנא ז"ל
- אשת רבי חיים שיף ז"ל
- אשת רבי צבי יוסף אב"ד רודניק ז"ל
- רבי יעקב קאפל מווישניצא ז"ל
זכותו יגן עלינו
