בא יבא האט געשריבן: ↑זונטאג אוגוסט 13, 2023 1:31 am
נקודת טובות האט געשריבן: ↑דאנערשטאג אוגוסט 10, 2023 9:00 pm
נקודת טובות האט געשריבן: ↑דאנערשטאג אוגוסט 10, 2023 2:29 pm
גלייב מיר, די איינציגע זאך וואס העלפט איז עסן מיט א חשבון.
1) עסן פרישטאג ''יעדן טאג'' (נישט שפעטער ווי 10 אזייגער)
2) עסן סאפיר נישט שפעטער ווי 730, און דערנאך גארנישט עסן ביז נעקסטע אינדערפרי.
בנוגע עקסערסייז, א צעהן פופצען מינוטיגע שנעלע שפאציר יעדן טאג.
טוה די דריי זאכן פאר צוויי וואכן, די וועסט זעהן גרויסע שינוים.
פארזעצונג קומט מארגן אי''ה...
זייער גוט ארויסגעברענגט מיינע דורכפעלער. נו, וואס יא?
בעצם האב איך נישט געפלאנט צו שרייבן מער, דאס וואס איך האב געשריבען פארזעצונג קומט אי''ה איז מער אן אויסדריק ווי אן אמת, אבער שוין.
באמת דארף ווערן אויפגערידערט א וועלט אין דעם הינזיכט פון דייעט אין אונזער חסידישען וועלטל, וויבאלד דאס איז א STRUGGLE וואס באגלייט כמעט אחינו כל בית ישראל החסידים, אנגעהויבן פון די גרעסטע רבי'ס ביז קליינע קינדער.
איז אזוי, וואס מיינט די ווארט דייעט???
איך גיי נישט אריין אין די גרעמער פון די ווארט און וואו פונקטלעך דאס ווערט גענוצט, נאר איך וויל מיך מער באציען צו תכלית הדברים. וואס איז דאס א דייעט, ווער דארף דאס, און פארוואס איז דאס וויכטיג.
קודם פאר איך גיי אריין און מיין ארטיקעל וויל איך דיר שטעלן א קורצע פראגע, קוק מיר גלייך אין די אויגען אריין און ענטפער מיר.
וואס באדערט דיר צו זיין גראב, וואס גייט דיר עס בכלל אן?
ווער לאזט דיר נישט וואקסען גרעסער און ברייטער, איז דען נישטא קיין גרעסער סייז ביי G&G ?
דיין העמד איז דען דאס גרעסטע וואס די דריי גוד סטאר פארמאגט? לכאורה נישט. דאן זאג מיר וואס שטופט דיר צו פארלירן וואג??
אקעי, איך זעה אז די ענטפערסט נישט וועל איך דיר ענטפערן.
שלמה המלך זאגט אונז, אשר עשה האלקים את האדם ישר והמה בקשו חשבונות רבים.
פשט אין די ווערטער, דער אויבערשטער האט באשאפען דעם מענטש PERFECT און דער מענטש איז געגאנגען און זיך אליינס קראנק געמאכט.
וואס איך וויל איז אזוי. ווען די ביסט יונג געווען א קינד פון בערך 10 יאר, ביסטו אנגעקומען אין חדר און ארויף געלאפען אלע סטעפס NON STOP גאנצע 6 שטאק, און נישט נאר דאס, דו האסט נאך ג'סקיפט יעדע צווייטע סטעפ. אבער וואונדער איבער וואונדער, דו ביסט אנגעקומען אויבן און דיין הארץ האט כמעט אפילו נישט ג'קלאפט שנעלער.
שפעטער ביי ריסעס ביסטו געזיצען אויפן פלאר פאר א האלבע שעה און איין צוה און געשפיעלט קוגעלעך. און וואונדער איבער וואונדער, דו האסט דיך אויפגעשטעלט און קיין איין ביין האט דיר נישט וויי געטוהן, דו האסט נאך געפיעלט אויסגעליפטערט גרייט פאר נאך א צוויי שעהדיגע שיעור.
ווידער ביי לאנטש, ביסטו געלאפן ווי א ''גלח'' פראבירן צו טאפן יעדן איינעם, און נאך 45 ביסטו אנשטאט אריין פאלן אין בעט צוריק אריין געקומען אין קלאס אויפגעפרישט ווי נאך א גאנצע נאכט שלאף!
וואס איז געשעהן מיט דיר, וואו איז דאס אלעס נעלם געווארן? ווען האסטו דיך אזוי געטוישט? היינט ווען די קומסט ארויס פון א חתונה זאל און דו דארפסט ארויף גיין צוויי שטאק סטעפס ווערט דיר ממש שווארץ פאר די אויגען? פארוואס נאכן ארויפוואקען דריי שטאק קענסטו קוים כאפן דעם אטעם (חוץ אויב די שפאצירסט ארויף שטייטערהייט) דער תירוץ איז נישט דיין וואג, נאר דיין געזונטהייט צושטאנד!!!
מען זעהט אינגעלייט וואס זענען אונטער צוויי הונדערט פונט און קענען זיך פשוט נישט רירן. יא ער האט פראבלעמען אנצוטיען די זאקן, ער אטעמט שווער נאר פון אנטיען זיינע צוויי זאקן. אויב פאלט אים אראפ עפעס און ער דארף זיך אראפבייגען, איז ממש געפערליך.
דו ביסט נישט געזונט! זאכן וואס א מענטש 10 יאר עלטער ווי דיר דארף צו קענען טוהן אן קיין איבריגע אנשטרענגעניש, איז ביי דיר א גהינם!
פארוואס זענען דא אזוי פיל יונגערלייט אין די ''דרייסיגער יארן'' און יא איך זאג נאכאמאל אין די ''דרייסיגער יארן'' וואס דארפן זיך שטעכען פאר צוקער?? פארוואס זענען אזוי פיל יונגע מענטשען אויף בלוט דרוק פילן?? פארוואס ליידן יונגערלייט אין די צוואנציגער פון קאנסטיפעישן און אנדערע ארויסגיין פראבלעמען?? איז דאס נארמאל??
דאס איז וואס באדערט דיר, דיין גוף האלט דיר און איין זאגן, איך בין נישט געזונט טוה עפעס פאר מיר, איך שטרענג מיך איבער און איך האב נישט קיין כח אנצוגיין אזוי.
און אפילו דו זעהסט נישט אז דו זאלסט ליידן אויף איינער פון די פראבלעמען, דער אויבערשטער האט דיר געגעבן עקסטערע געזונט אז דיין גוף זאל קענען פייטן, מיינט דאס נישט אז דאס גייט אנהאלטען אייביג. עס גייט קומען א צייט וואס דיין סיסטעם וועט דיר מודיע זיין עד פה תבוא. דיין סיסטעם כאפט אויף יעדע קליינע פראבלעם און ער לאזט דיר אפילו וויסען יעדע מאל וואס ער איז נישט מסודר הונדערט פראצענט. אמאל איז עס מיט א בויך דריקעניש, און אמאל מיט nausea, אמאל מיט קאפ וויי, אמאל סתם מיט נישט אזא גוטע גוסטע, און אזוי ווייטער. ער וועט דיר אבער אייביג געבן עפעס א קליינע סיגנעל אז דו עביוזט אים צו שטארק.
און יעצט צום ענין.
א דייעט מיינט צוריקשטעלן דעם מענטש אויפן גלייכען און געזונטען וועג. א דייעט מיינט נישט צו פארלירן וואג, נאר פארלירן וואג איז א סייד עפעקט פון א געזונטען לעבנס שטייגער. בעסער געזאגט איבערוואגיקייט איז א סייד עפעקט פון אן אומגעזענטען לעבענס שטייגער.
א געזונטע לעבענס שטייגער איז א זאך וואס א מענטש האט הנאה דערפון, דאס קען מען מיט קיין ווערטער נישט מסביר זיין. נאך צוויי וואכן וואס א מענטש עסט וואס ער דארף, ווען ער דארף, ווי ער דארף, וויפיל ער דארף, ווי אזוי ער דארף. ער שלאפט ווען ער דארף, וויפיל ער דארף, ווי אזוי ער דארף. טרינקט וויפיל ער דארף. מאכט איבונגען וויפיל ער דארף. וכו' וכו' וגו'. איז נישט מעגליך מיט קיין ווערטער אראפצולייגען די גוטע געפיל פון דעם מענטש, סיי פיזיש און סיי גייסטיש.
ער פילט פשוט פריש און געזונט!
דער אויבערשטער האט באשאפען געזונטע עסן, כדי מען זאל דאס עסן כדי אז דער מענטש זאל הנאה האבן, און נישט אז דו זאלסט הונגערען. ער וויל דו זאלסט זיין זאט ער וויל דו זאלסט הנאה האבן. און דערפאר האט ער באשאפען אזוי פיל מיני ערליי עסן און מיט אזוי פיל ענדערע טעמים און קאלירן.
דיין גוף דארף נישט קיין דייעט וואס די בלייבסט הונגעריג! דיין גוף וויל זיין געזונט!
איך וועל אי''ה מער מאריך זיין, נאר כעת וועל איך מיר דא אפשטעלן.
איך וויל נאר אזוי פיל זאגן. די עיקר פראבלעמען פון דעם היימישען ציבור איז ווי פאלגענד.
1) נישט עסן קיין פת שחרית.
2) נישט טרינקען גענוג וואסער.
3) עסן צו שנעל.
4) דעם קאר. (דער גרעסטער חורבן בגשמיות וואס כל באיה לא ישובון)
