חצר הקודש
=זונטאג פנחס=
אום 8:00 איז דער רב אריינגעקומען בבית מדרשינו הגדול צו תפילת שחרית,
פארן דאווענען האט דער רב געלייגט תפילין פאר די בר מצוה בחור בן מו"ה ר' אליעזר טארים הי"ו,
נאכן דאווענען איז פארגעקומען א לחיים מיט די בר מצוה בחור.
ארום 12:50 האט זיך דער רב ארויסגעלאזט אויפן וועג צום ווארד אוו בלא האטעל אין ניו דזשערסי ווי עס איז פארגעקומען די "יומא טבא שכולו תורה", סדר לימוד כל הש"ס און מעמד הסיום חצי ש"ס הראשון געלערנט געווארן דורך איבער 600 לומדי חבורת "אהבתי תורתך" שע"י קהלתינו הק'.
ארום 1:30 איז דער רב אנגעקומען צום קאמפלעקס, און אריין צום מעמד לימוד כל הש"ס אינעם ספעציעלן אויפגעשטעלטע היכל התורה אינעם קאמפלעקס ווי הונדערטער מאנ"ש זענען שוין געזעצן און געלערנט די פאראויס אויסגעוועלטע בלעטער גמרא,
דער רב האט זיך ארומגעדרייט צווישן די טישן און זיך אומגעקוקט אויף די לומדים מיט א שטארקע קורת רוח, דערנאך האט זיך דער רב אראפגעזעצט אויפן בימת הכבוד ווי דער רב האט עוסק געווען בתורה ביז ארום 2:15.
ארום 2:15 איז דער רב אריין אין א זייטיגע צימער, וואס איז געווען ספעציעל דעזיגנירט פאר די עלטערע בעלי בתים במסגרת די טעגליכע כולל בעלי בתים, דער רב האט משמיע געווען קורצע דברות קודש און דערציילט אפאר אינטערעסאנטע סיפורי צדיקים און מסיים געווען מיט ברכת הקודש, עוד ינובין בשיבה דשנים ורעננים, אז אלע משתתפי הכולל זאלן זוכה זיין צו ענדיגן די צווייטע האלב ש"ס מיט געזונט און נחת, און מען האט זיך אויפגעשטעלט און א ספעציעל ריקוד, הטוב כי לא כלו רחמיך, כי אורך ימים ושנות חיים ושלום.
דערנאך איז דער רב אריין בחדרו הפרטי.
ארום 3:40 איז דער רב צוריק אריין אינעם היכל התורה, און נאך אפאר מינוט האט הרה"ג ר' מאיר צוויבל שליט"א אויפגעטרעטן מיט א דרשה כהכנה דרבה לקבלת חצי השני' של ש"ס און געזאגט הערליכע רמזים און עצות ווי אזוי מען קען זוכה זיין צו ליגן אין לערנען און לערנען כל הש"ס.
אום 4:15 האט דער רב משמיע געווען א שיעור עיון און דברי פתיחה צו די נייע מסכת בבא קמא, און אויסגעשמועסט די וויכטיגע יסודות מתוך דברי הראשונים אויף מסכת בב"ק בכלל, ובפרט אויף די ערשטע עמוד, און אויסגעשמועסט א קשיא אין די סוגיא און געבעטן דעם ציבור צו איבערלערנען און ברענגן א תירוץ.
מען האט געענדיגט די שיעור אום 5:15.
דערנאך האט הרבני הנגיד הרה"ח ר' בנציון גראס היו, געמאכט די סיום אויף כל הש"ס וואס איז געלערנט געווארן במשך דעם טאג, צוטיילט צווישן די הונדערטער לומדי אנ"ש.
דערנאך איז דער רב אריין לחדרו הפרטי אינאיינעם מיט די נגידי ותומכי קהלתינו הק' צו תפילת מנחה,
בעל תפילה: מו"ה ר' משה ארי' גראס הי"ו.
נאך מנחה איז פארגעקומען א מסיבת לחיים אינאיינעם מיט די נגידים ותמכים, דער רב האט געמאכט א לחיים און אנגעוואונטשן ברכת הקודש און ארויסגעברענגט די געוואלדיגע פעולות לטובה וואס אזא מסגרת לימוד טוט אויף פאר די לומדים, און ארויסגעברעגנט אז מיט יעדע דאללער מער וואס איז דא אינעם קאסע קען מען אויפטוהן אסאך מער, און געבעטן די נגידים מוסיף צו זיין און נעמען פרישע תמיכה פאר די הייליגע חבורה און תיכף האבן די נגידים ותמכים אונטערגעשריבן שטרות מיט חודש'ליכע תמיכה פאר די חבורה.
ארום 6:15 איז דער רב אריינגעקומען צום רייך אנגעגרייטע סעודה לכבודה של תורה לכבוד סיום מסכת קידושין וחצי ש"ס,
ביים אריינקומען האט דער רב זיך באגריסט מיט די חשוב'ע רבנים אויפן אויבנאן,
און הרב ר' יואל צוויבל שליט"א - מנהל החבורה האט ממשיך געווען מיט זיין דרשה,
דערנאך האט זיך דער רב געוואשן צום סעודה,
און דער יו"ר המעמד מו"ה נחמן ליווי הי"ו האט אויפגעטרעטן,
דענאך האט אויפגעטרעטן הרה"ג ר' יעקב בריינעס שליט"א - מגיד שיעור במסגרת החבורה ור"מ בישיבתינו הק',
דערנאך האט הרה"ח ר' מענדל סאמעט הי"ו ארויפגערופן די פטרון החבורה הרבני הנגיד הרה"ח ר' אהרן דוד פאלאטשעק הי"ו זאל קומען אפנעמען א מתנה וברכת הקודש מידיו פונעם רב שליט"א, דערנאך האט הרה"ח ר' אהרן דוד פאלאטשעק הי"ו אויפגעטרעטן און ארויסגעברענגט די זכות וואס מען האט צו שטיצן אזא גרויסע מקום תורה.
דערנאך האט די יו"ר אויסגערופן די נעמען פון די קבוע'דיגע תומכים במשך די לעצטע 12 יאר זאלן קומען אפנעמען א מתנה וברכת הקודש מידיו פונעם רב שליט"א,
ארום 8:20 האט דער רב אנגעהויבן מיט די "משא המעמד" דברות קודש, און אנגעהויבן מיט א פרייליכע מזל טוב, מזל טוב, פאר אנ"ש וואס האבן זוכה געווען מסיים צו זיין מסכת קידושין און חצי ש"ס הראשון, און ארויסגעברענגט לשבח די חשובע עסקנים וואס שטייען בראש דעם גאנצע חבורה, און די תומכים וואס מאכן זיכער אז מען זאל קענען אנגיין, און דערנאך ארויסגעברענגט וואס דאס לערנען בקיבעות בחבורה אינאיינעם טוט מיט א מענטש און מיט זיינע דורות, ווי כמה וכמה אידן האלטן און איין קומען זאגן וואס די חבורה ובפרט דאס חזרה און נעמען די בחינות הייבט זיי אויף ממדריגה למדריגה און האט זיי געפארעמט צו אנדערע מענטשן, מיט א קלארע דעת, און שטארק ארויסגעברענגט וויפיל אידישע קינדער לעבן נעבעך אין א עולם התוהו אן קיין שום חיות דקדושה, זייענדיג מקושר מיט די אלע כלים טמאים, ובפרט פון דעם נייעם אנשיקעניש הנקרא AI, און נאר דורך לימוד התורה קען מען אריינברענגען א חיות און אפהאקן זיך און די דורות פון אלע פגעי הזמן, און דערמאנט אז זקינו הרה"ק רבי חיים יהושע הלברשטאם הי"ד, איז געווען אין סיביר אונטער די שווערסטע אומשטענדן - וואס ער האט נעבעך נישט איבערגעטראגן שפעטער, און איז אומגעקומען על קידוש השם הי"ד - און גארנישט האט אים נישט אפגעהאלטן פון פארלערנען יעדע נאכט א שיעור און מסכת חולין וואס ער האט געקענט אויף אויסענווייניג, און אונז דארפן פון דעם זיך אפלערנען אויף היינטיגע צייטן ווען עס איז טאקע דא נאר דער נסיון העושר, זיך מחזק צו זיין בלימוד התורה, ובפרט האט די רב שליט"א ארויסגעברענגט די וויכטיגקייט פון לערנען פארן דאווענען, און אז פארצייטנס איז נישט געווען א איד וואס האט זיך געשטעלט דאווענען פארן לערנען א עמוד גמרא, עס איז א קלארע הלכה אין שו"ע אז אין עומדין להתפלל אלא מתוך כבוד ראש, און ביי אונזערע רבי'ס האבן אונז געלערנט אז דאס מיינט לערנען פאר דאווענען א בלאט גמרא און חסידישיע ספרים, אנצוגרייטן דאס הארץ פארן בורא עולם, און ליידער טוט מיר דאס הארץ וויי ווי מען זעהט היינט יונגעלייט שטייען און פארברענגען פארן דאווענען מיט דברים בטלים, און נאכדעם לויפט ער כאפן א דאווענען, אזא סארט דאווענען קען נישט בויען א כח הקדושה אין דעם מענטש, ער זאל קענען עומד זיין אנטקעגן די ביטערע נסיונת, און דערביי שטארק געבעטן פון גאנץ אנ"ש זאלן זיך מקבל זיין צו לערנען פארן דאווענען בקביעות, און דערנאך געוואונטשן דעם ציבור אז אינעם זכות פונעם הייליגן רבין זי"ע - מייסד קהלתינו, און די זכות פונעם שווער ז"ל - רבינו בעל ברך משה - זאלן מגין זיין, ונהיה אנחנו וצאצאינו וצאצאי צאצאינו כולנו יודעי שמך ולומדי תורתך לשמה, מיט אסאך נחת והרחבת הדעת און אלע אידן זאל געהאלפן ווערן מיט כל מיני ישועות טובות, רפואות און ישועות, עד ביאת הגואל - ווען די מלכות הרשע כת הציונים, וואס מאכן אן צרות פאר אחינו בני שיראל בארץ הקודש מיט די אלע גזירות רעות בפרט די גזירת הגיוס, וועט בטל ווערן - בב"א.
נאך די דב"ק האט הרב ר' יואל צוויבל שליט"א - מנהל החבורה, פארגעזינגן הערליכע חרוזים לכבוד המאורע, מיט פאסיגע ווערטער צום סיום חצי ש"ס,
דערנאך האט הרבני הנגיד הרה"ח ר' מענדל קלאגסברוין הי"ו מכובד געווארן מסיים צו זיין מסכת קידושין און האט אנגעהויבן מיט קורצע דיבורים, ארויסברענגענדיג רגשי לבבו און זכרונותיו בעת דער רב שליט"א האט אריינגערופן הנהלת הקהלה און מייסד געווען די הייליגע חבורה "אהבתי תורתך" זאגענדיג אז ער וויל אויסלערנען אנ"ש צו לערנען, און ווי דער רב שטייט אלעמאל אונז אלע צו אויפהייבן און מעלה זיין און מדריך זיין על דרכי התורה והיראה, און דערנאך מסיים געווען,
דענאך איז מכובד געווארן הרב ר' הלל ראזענבערג שליט"א - מו"ץ בקהלתינו מתחיל צו זיין די ערטשע משנה אין מסכת בבא קמא, און הרה"ח ר' אברהם שלום מענדלאוויטש הי"ו מראה"ק האט געזאגט די ספעציעל קדיש נאך א סיום מסכת.
דערנאך האט דער רב אינאיינעם מיטן גאנצן ציבור זיך ארויסגעלאזט אין א פייערדיגע טאנץ פאר א לענגערע צייט מיט גרויס התרגשות און שמחת התורה, להודות ולהלל אז מען האט זוכה געווען אנצוקומען עד הלום, אנהייבענדיג מיט די הייליגע ניגון וואס מען זינגט ביום שמחת תורה ביים זעקסטן הקפה כנהוג, און צווישן אנדערע האט מען געזינגן מיט גרויסע התעוררת די לעבעדיגע "תורת ה' תמימה" און "וטהר לבנו לעבדך באמת"
דערנאך זענען די פרחי עסקני המעמד ארויפגערופן געווארן צום רב מקבל זיין ברכת הקודש,
מיטן בענטשן האט דער רב מכבד געווען הרבני הנגיד הרה"ח ר' אהרן אונגאר הי"ו,
ארום 9:20 האט דער רב פארלאזט די זאל.
ביים אנקומען קיין מאנסי איז דער רב צוגעפארן צו די אולם שע"י ביהמ"ד באראוו צום בר מצוה פון בן מו"ה ר' אליעזר טארים הי'ו.
ארום 10:30 האט דער רב געדאווענט תפילת מעריב בביהמ"ד הגדול אין חדר כ"ץ.
חצר הקודש