- unnamed.png (85.69 KiB) געזען געווארן 33 מאל
די נייע תקופה אין ניו יארק סיטי און דער ציוניסטישער דורכפאל: מעיאר קאנדידאט מאמדאני באווייזט דעם קלארן חילוק צווישן אידישקייט און ציוניזם
- unnamed (1).png (151.74 KiB) געזען געווארן 33 מאל
ס'איז פאר יעדן גוט באקאנט אז אונזער מעיאר מאמדאני שטאמט פון א מוסולמענישן אפשטאם, און דורכאויס זיין גאנצן קאמפיין האבן די ציונים געטוהן כל טצדקי שבעולם קעגן אים כדי ער זאל פארלירן. זיי האבן אריינגעגאסן א הון תועפות אינעם געוועזענעם גאווערנאר קאומא; מ'האט אים מוחל געווען אויף אלע זיינע עבירות ביי קאוויד און משקיע געווען דמים תרתי משמע אין זיין קאמפיין, אלעס נאר כדי צו קענען ארויסטראסקענען מאמדאני'ן.
לדאבון לבם פון די ציונים האט ער געווינען, און נישט סתם געווינען, נאר א מאסיוון זיג; ער האט קלאר געוויזן אז ס'הייבט זיך אן א נייע תקופה דא אין אמעריקע. ער האט גארנישט באהאלטן זיין אידענטיטעט אלס א מוסולמענער און זיין סימפאטיע פאר זיינע ברידער. ער האט נישט פארדאמט די וואס די ציונים האבן פארלאנגט פון אים, און ער איז קלאר געלאפן אויף א פלאטפארמע וואס שטימט בכלל נישט מיט די ציוניסטישע אידעאלאגיע און זייער גאנצע שטרעבונג צו מאנעוורירן דעם דעת הקהל אין אמעריקע.
זיין געווינס האט שטארק איבערגעראשט און ארויסגעוויזן אז עס איז געווארן א דראסטישער שינוי אויף די אמעריקאנער גאס, וואס האט שוין מער נישט קיין שום מיטגעפיל צו די ישראלים, צו זייער פאליטיק, און צו זייערע געשרייען איבער אנטיסעמיטיזם.
בעזהשי"ת, מיט די גרויסע רחמים וחסדים פונעם רבונו של עולם, האט מען מצליח געווען – סיי דורך רעדן צו אים און סיי דורך אנדערע וועגן – ער זאל גוט פארשטיין אז מדינת ישראל און אירע אלע אקציעס רעפרעזענטירן נישט דאס אידישע פאלק. דאס אידישע פאלק איז א זאך פאר זיך, און די פאליטיק פון די מדינה איז א זאך פאר זיך.
דורכאויס די גאנצע צייט וואס ער איז געלאפן פאר די עלעקשאנס, ווען מען האט געפרעגט אלע קאנדידאטן וואו דאס ערשטע פלאץ וועט זיין וואס זיי פלאנירן צו באזוכן אויב זיי געווינען די וואלן, האבן אלע געענטפערט "מדינת ישראל". אבער ער האט געענטפערט:
"ניין, איך בלייב אין ניו יארק סיטי; איך וועל גיין באזוכן די אידן אין די שולן דא אין ניו יארק סיטי, און איך וועל זיכער מאכן אז זיי זענען סעיף וכדומה."
ועל של עתה באנו: ווי עס איז באקאנט פאר יעדן און מען זעט עס טאקע בחוש, האט זיך די שנאת ישראל מורא'דיג פארמערט אין די לעצטע תקופה אויף א מבהיל'דיגן אופן. עס איז נישט גענוג וואס די ציונים האבן אפגעטון אין עזה, קומט יעצט צו זייער מלחמה מיט איראן; א גרויסער חלק פון די אמעריקאנער גאס האלט אז דאס אלעס איז געקומען אונטער די השפעה פון די ציונים, און אלעס וואס מען ליידט דא אפ – סיי די הויכע געז פרייזן און סיי די גאנצע אומסטאביליטעט פון די אמעריקאנער פאליטיק – אלעס ווערט אנגעקוקט ווי ביבי מיט די ישראלים זענען די שולדיגע דערין.
רעאליטעט אין קעגנזאץ צו פראפאגאנדע: 25 מיליאן דאלאר פאר אידישער זיכערהייט
צוליב די שרעקליכע שנאת ישראל וואס בוזשעוועט ליידער לעצטנס אויף א טעגליכן פארנעם, האט דער מעיאר פריש געהעכערט דעם באדזשעט צו באקעמפן אנטיסעמיטיזם און צו פארשטארקערן די זיכערהייט פאר אידן, פון 5 מיליאן דאלאר ביז גאנצע 25 מיליאן דאלאר – א פינף-פאכיגע העכערונג – אלעס כדי זיכער צו מאכן אז די אידן אין ניו יארק סיטי זאלן קענען לעבן רואיג און פארזיכערט בשלום ובשלוה.
פון די אנדערע זייט, ווי געזאגט, איז ער פון א מוסלעמענישן אפשטאם; ווען ער האלט אז א זאך האט נישט קיין שייכות מיט די זיכערהייט פון אידן, נאר מען באקריוודעט סתם אזוי זיינע מוסלעמענישע ברידער, איז ער נישט מסכים דערצו. ער האלט עס פאר אן עוולה אז מען פארקויפט שטחים אין יהודה ושומרון אין בתי מדרשים, און ער האט דאס פארדאמט.
יעצט, ווען די אראבער צייכענען אפ די "נאקבא" — וואס דאס איז א טאג פון טרויער איבער דעם וואס די מדינה איז געגרינדעט געווארן און די אראבער האבן פארלוירן זייער האב און גוטס, וואס איז ביי זיי א טאג פון צער וואס זיי פארגעסן נישט — האט ער אויך ארויסגעשיקט א טוויט דאס אפצוצייכענען. עס איז נישט קיין נפקא מינה פאר אונז יעצט פונקטליך די היסטארישע פונקטן וואס עס האט זיך דעמאלס אפגעטון, אבער דאס איז געווען די מציאות.
בדרך כלל, ווען א מענטש נעמט אן אחריות פאר כלל ישראל און פאר די פילע אידן וואס וואוינען דא אין ניו יארק סיטי, דארף מען אים שטארק באדאנקען פארן ארויפשיסן דעם ביל פון בלויז פינף מיליאן דאלאר צו גאנצע פינף-און-צוואנציג מיליאן דאלאר. מען דארף נישט מאכן קיין גרויסן עסק פון דעם וואס ער טוט פאר זיינע מוסולמענישע ברידער, נאר מען דארף פרובירן מיט אלע כוחות מחזק צו זיין דעם געדאנק אז עס איז דא א קלארער חילוק צווישן די פאליטיק וואס קאכט זיך אפ אין ארץ ישראל מיט די פאלעסטינער, צום וואוילזיין פון אידן דא אין ניו יארק סיטי;
עס איז דא א גרויסער חילוק צווישן ציונות און אידישקייט.
אויף דעם אופן וועט מען קענען בארואיגן דאס פייער. ווען עס קומט צו א זאך וואס רירט אן אידן, זעט מען טאקע ווי ער פארדאמט עס גאר שארף; למשל, די האקנקרייצן וואס מען האט געטראפן האט ער גאר שטארק אראפגעריסן, און אזוי אויך ביי ענליכע פעלער.
אבער למעשה, ביי די ציונים זעט מען פונקט דאס פארקערטע: דאס וואס ער האט געהעכערט דעם ביל פון פינף מיליאן צו גאנצע פינף-און-צוואנציג מיליאן, דאס וויל מען פארשוויגן און מען מאכט זיך נישט וויסנדיג דערפון. נאך מער, אויב איינער וואגט זיך אים צו באדאנקען דערויף, ווערט ער אראפגעריסן עד הסוף, לא יזכר ולא יפקד.
אבער דאס וואס דער מוסולמענער אפשטאמיגער וויל נישט אנטיילנעמען אינעם ציוניסטישן פאראד, וואס צייכנט אפ דעם חורבן פון זיין אייגן פאלק, דאס ווערט ביי זיי באטראכט אלס עפעס אומדערהערט; און דערצו האט ער נאך די חוצפה אפצוצייכענען זייער "נאקבא". דאס איז שוין ביי די ציונים אריבער אלע גרעניצן, א ריכטיגער אנטיסעמיט! א שונא ישראל! מען דארף טון אלעס וואס מען קען אים צו פארשרייען. איי, וואס טוט מען אויף? ער האט דאך געווינען אן זייער שטיצע. אבער וואס עס איז זיכער איז זיכער, אפשר וועט מען אים טאקע מצליח זיין צו מאכן פאר א ריכטיגן אנטיסעמיט, און דעמאלטס האבן די ציונים אלעס פארדינט.
עס קען גאר זיין, אז די ציונים באדערט נאך מער דאס וואס ער גייט אפהיטן און האט געהעכערט די פאנדס פון פינף מיליאן צו פינף און צוואנציג מיליאן דאלאר, כדי אידן זאלן קענען לעבן בשלום ובשלוה בארצות הגולה,דאס באדערט זיי נאך מער ווי זיין "נאקבא" טוויט און דאס וואס ער גייט נישט אנטיילנעמען אינעם ישראלישן פאראד. דאס איז ווייל עס גייט קעגן זייער אידעאלאגיע; עס שטערט זיי זייער אז אידן אין די גלות לענדער זאלן האבן אביסל מנוחה.
נטרונא שטייט אויף דער וואך קעגן דעם ציוניסטישן 'גלית'
נטרונא פון זייער זייט שטייט כסדר אויף דער וואך און טוט כל מיני פעולות און תחבולות אז דער מעסעדזש זאל טאקע דערהערט ווערן, כדי מען זאל קלאר פארשטיין דעם גרויסן חילוק צווישן ערליכע אידן און ציונים, צווישן אמת'ע אידישקייט און ציוניזם, און צווישן די אמעריקאנער אידן דא אין אמעריקע און די רעגירונג אין ארץ ישראל. אבער דאס איז נאך אלץ ווייט פון גענוג; אינעם היינטיגן מצב פאדערט זיך צו טוהן פי כמה און פארשטערקערן דעם קול מחאה במידה גדושה, כדי זיכער צו מאכן אז דאס פייער זאל חלילה נישט אריבערכאפן אהער צו די לאקאלע אידישע געמיינדעס דא אין ניו יארק סיטי.
מיר בעטן אלע אונזערע חשוב'ע צוהערער, יעדער איינער זאל זיך ביטע אנשטרענגען כפי ידו משגת; ווער עס קען זאל מנדב זיין א סכום פון פינף הונדערט דאלער, וואס דאס וועט אונז העלפן אנצוקומען צו נאך א מיליאן וויאורס (views). וכל המוסיף מוסיפין לו מן השמים. די נומער צו געבן די נדבה איז: 718-304-5328. תזכו למצוות.
