- אדרבה. די וועלט איז באשאפן געווארן פאר די בינוני וואס הארגעט זיך מיט זיין ייצר, ועמד ושתלן (צדיקים) בכל דור ודור בכדי דער בינוני אין זיין נסיון זאל זיך קענען מתגבר זיין. דער צדיק איז ווי א סיוע פאר די תכלית העולם דער בינוני.שאינו יודע לשאול האט געשריבן: ↑זונטאג אוגוסט 11, 2024 3:32 pm @מסתמא איך האב יעצט גענדיגט איבערגיין די ציטאטן וואס דו האסט געברענגט אנהייב פונעם שמועס, לאמיר עס אביסל צונעמען.
- די נקודה אז די חיות פון די וועלט ווערט נמשך דורכן צדיק, איז בפשטות די נקודה אז די וועלט איז דאך נאר באשאפן געווארן פאר די וואס דינען הקב"ה, און די גאנצע וועלט שטייט נאר פארדעם, נמצא, אז די גאנצע חיות פון די וועלט "גיבט דער אויבערשטער" בזכות די צדיקים וואס דינען אים.
בעצם שטייט אין אלע ספרים אז אלע "השפעות" ווערן נמשך דורכן צדיק, און ווען ער וויל ממשיך זיין השפעות פון חסדים איז ער מייחד קוב"ה ושכנתיה און איז ממתיק די דינים וכו' וכו' פרעג נאר יעדן בר ביה רב דחד יומא. בס"ה, אנשטאט שרייבן "השפעות", שטייט חיות, והכל עולה לאחד.
- איבער די ענין פון די צדיקים וואס ווייסן מחשבות און מעשים וכדו', דאס איז קלאר אז זיי ווייסן גארנישט מחמת עצמם ח"ו, אבער אונז טרעפן אין די תורה און אין חז"ל כמה פעמים אז דער אויבערשטער איז מודיע די נסתרות פאר די צדיקים. "המכסה אני מאברהם וגו'", און נאך צענדליגער דוגמאות, ואטו כי רוכלא (אויב ס'מאכט דיר אויס, קען איך פרובירן צו צונויפזאמלען די מראה מקומות).
די גמרא פון שבעה דברים מכוסים וכו', רעדט בפשטות נישט פון צדיקים וואס האבן א העכערע כח, ווען אונז ווייסן אז יעקב אבינו האט געוואוסט די זמן הקץ, און כמה וכמה צדיקים האבן געוואוסט מה שבלב חבירו וכו'.
די זעלבע חז"ל זאגן אויך אז די מפתח פון תחית המתים ליגט נאר ביד הקב"ה, און דאך געפינען מיר אז אלישע האט מחיה מתים געווען, אלזא איז קלאר אז הקב"ה גיבט פאר זיינע צדיקים כוחות וואס זענען אין געווענטליכע אומשטענדן למעלה מהשגתינו.
- די ענין פון התקשרות לצדיקים איז נישט אז מען דינט ח"ו דעם צדיק כדאי ער זאל אונז נענטער ברענגען צום אויבערשטן, נאר אז מ'איז זיך מקשר צום צדיק וואס איז נאנט צום אויבערשטן, און דאס ברענגט אונז נענטער צום שורש, "ולדבקה בו" (איך וויל נאך בל"נ מאריך זיין אין דעם פרט, ווען איך וועל האבן מער צייט/מוחין).
- דאס אז דער צדיק האט א כח צו מכפר זיין אויף עבירות, איז נישט פשט אז ער האט אן אייגענעם כח, נאר אז ער קען זיך איינבעטן ביים אויבערשטן און דער אויבערשטער איז זיי מוחל בזכותו, ווי משרע"ה האט געטון, און ווי רשב"י האט געזאגט "יכול אני לפטור את כל העולם כולו מן הדין.
---
בס"ה זעה איך, אז דו - אדער דער מלקט וועם דו ברענגסט נאך, וויל אראפמאלן א בילד אז די אלע ווערטער וואס די קדושי מעלה זאגן, קען חלילה ווערן אויסגעטייטשט אלס שיתוף אדער ממוצע רח"ל. למעשה, ווער עס קוקט קלאר, פארשטייט וואס די עכטע מיינונג איז. ווען עמיצער וואלט חלילה געוואלט שרייבן דאס וואס דו זאגסט אז ס'שטייט דא, קען זיין ער וואלט גענוצט ענליכע ווערטער, אבער ווען דו לערנסט דורך די שטיקלעך פארדעם און נאכדעם, איז נישטא קיין שום מקום לטעות אין זייער הייליגע כוונה.
המשך יבא בעז"ה (מיט מער מקורות און הסברים) - בלי נדר.
- דער אויבערשטער באנוצט זיך מיטן צדיק ווי מיט א כלי, א צינור, ער איז דעם אויבערשטנס א חפץ. אבער אפילו דאס איז אויסשליסליך קבלה און נסתר מיר האבן קיין ביזנעס מיט אט די מציאותן.
שלב ב’ בויען פון דעם אז דער צדיק איז די מקור החיות פון די יקום און זיך קאכן דערין איז גרעניץ עבודה זרה כנ”ל.
- צדיקים ווייסן זאכן ווייל דער אויבערשטער טיילט מיט מיט זיי. דערפון ביזן זאגן אז זיי ווייסן ”אלעס” איז פאלג מיר א גאנג, און אט די גאנג איז מנוגד די תורה הקדושה (כמבואר לעיל)
אין די ספרי ברסלב, אויב לערנט מען דאס כפשוטו ממש, נעמט מען דאס גאר א שלב ווייטער כמובא לעיל, אז ר’ נחמן ווייסט אלעס פון יעדער מענטש פון יעדע גילגול, יעדע פגם און יעדע תיקון און ער איז זאגאר אליינס דן אלעמען. אט דאס איז מנגד די פשוטע יסודות אמונה.
- דיין פשט אין התקשרות איז א דבר מחודש געבויט אויף ספרי קבלה וחסידות, כמבואר לעיל אין מיין ארגינעלע ליקוט. איה”נ סאיז נישט קיין סתירה צו גארנישט, כהאב אזאנס נישט געשריבן. דאס זיין נאנט צו אן ערליכן איד ווייל די שכינה רוהט אויף אים איז א הערליכע זאך און האלט א מענטש נאנט צום אויבערשטן בלתי שום ספק.
- אבער, ווען התקשרות לצדיק ווערט א ”מוז” ווייל אן דעם איז מען מנותק פונעם אויבערשטן חלילה, דאן איז פשט אז דו מאכסט דער צדיק פאר א ממוצע, און אט דאס טייטשט עבודה זרה בשיתוף.
- דאס אז א צדיק קען מכפר זיין איז פון די ענינים אשר אין אתנו יודע עד מה. מקען פלעטשקענען און רעדן אבער סך הכל איז אונזער ביזנעס, הקב”ה גומל טוב לשומרי מצותיו ומעניש לעוברי מצוותיו און תשובה העלפט פאר אלעם (אפילו אויף די חטא הידוע) כמבואר בנגלת התורה בלי שום חולק!
יעצט וואס א צדיק מיט זיין זכות ותפילה טוט? כווייס נישט, און סאיז נישט מיין ביזנעס. אין פסק ווייסט מען אז פון אגדה פסקנט מען נישט, די יכול אני לפטור את העולם קען אויף קיין פאל נישט ווערן א תורה שלימה נספח צו הלכות תשובה! ולא תהא תורה אחרת שטייט, תפילה וזכות הצדיק איז נישט פון די תנאי תשובה.
די תורה איז ודאי אמת אבער די אין אתנו יודע עד מה גילט אקוראט דא! יתכן אז סהעלפט פאר די ד’ חילוקי כפרה. יתכן אז סהעלפט פאר די התרחקות פונעם אויבערשטן וואס אן עבירה ברענגט... יתכן.. יתכן... יתכן.... אלעס קען זיין. איך ווייס נישט און דו ווייסט נישט און לאמיר אפיר נעמען די נגלות התורה און אריינקוקן דארטן און זיך פירן ווי דארטן שטייט.
יא, מיר ווייסן אז צדיקים זענען גרויס און אז עפעס קומט דארטן פאר, אבער מער פון דעם ווייסן מיר נישט.
סך הכל, דער גרעסטער צדיק מיט זיין גאנצע גדלות קען נישט ריקן פון פלאץ דעם אני מאמין פון שכר ועונש. וממה נפשך העלפט תשובה.
