היינטיגער משפיע
משפיע: אידישקייט איז דאך אזוי זיס! אה, אזא געשמאק צו לעבן ווי א איד.
מקבל: וואס איז אזוי גוט מיט אידישקייט?
משפיע: וואס הייסט? דו האלטסט נישט אז אידישקייט איז געשמאק? וואס קען זיין בעסער פון זיין אן אידיש קינד און לעבן מיטן אידישן לעבנסשטייגער? א שבת קודש, א יום טוב, א משפחה מיט קינדער, תורה און מצוות.
מקבל: הממ... און וואס איז אויב שבת איז מיר אן אפקומעניש? איך פלאץ פון יום טוב? איך קען נישט איבערטראגן א משפחה מיט קינדער? איך האב עפעס ליידער נישט קיין ליבשאפט צו תורה? און מצוות קומט מיר אן זייער שווער?
משפיע: נעבעך.
מקבל: קען זיין, אבער איך וויל אייך פרעגן, איר האט אייביג א געשמאק אין אידישקייט?
משפיע: נאכאמאל, עס מאכן זיך אייביג שווערע טעג, נישט אייביג האט מען דעם געשמאק.
מקבל: אהא, טא, איך האב דאס אייביג, איך האב קיינמאל נישט געשפירט דעם טעם אין אידישקייט.
משפיע: ביסט א רחמנות, דער פראבלעם איז אין דיר.
מקבל: לאמיר זאגן. אבער למעשה פיל איך נישט ווי אידישקייט איז געשמאק, און נאכמער איך קוק אן דעם גוי מיט קנאה
משפיע: וואס?!
מקבל: יא, איך מיין אז דער גוי האט א בעסערע לעבן, ער קען טון וואס ער וויל, און ער ענזשויט זיך א לעבן.
משפיע: יא, אבער דעם טעם אין א מצוה האט ער נישט.
מקבל: און איך יא? איך האב נישט קיין טעם אין קיין מצוה, און אויך נישט קיין עבירה. איך בין אויסגעשפילט פון אלע זייטן.
משפיע: הער מיך אויס, אידישקייט איז געשמאק, עס איז א פאקט, דו דארפסט אזוי גלייבן.
מקבל: וואו שטייט אז מען דארף דאס גלייבן? איך מיין אז גוי'אישקייט איז געשמאקער, ווייז מיר אויף אז נישט.
משפיע: רחמנא ליצלן, ממש כפירה, איך גלייב נישט וואס איך הער, אן איד קען אזוי רעדן...
מקבל: אקעי, איך בין א כופר, אבער האסט מיר גארנישט געענטפערט. איך ענזשוי נישט אידישקייט, וואס דארף איך יעצט טון? איך בין פארפאלן?
משפיע: אלץ גוי וועט דיר זיכער נישט זיין בעסער, נאר ערגער.
מקבל: איר האט שוין פרובירט צו זיין א גוי?
משפיע: ניין, אבער איך בין זיכער דערין, עס איז א חלק פון אונזער אמונה.
מקבל: וועלכע אני מאמין איז עס?
משפיע: עס איז א פאקט, א גוי האט נישט קיין גוט לעבן.
מקבל: פון וואו נעמט איר עס? איר זענט שוין געווען א גוי?
משפיע: בקיצור, מיר גייען הין און צוריק, דו ווילסט ווערן א גוי, איך זע שוין, אוי געוואלד.
מקבל: איך וויל נישט ווערן קיין גוי ח"ו, איך בלייב אן איד מיט מסירות נפש, אבער זאג מיר פארוואס איך זאל זיין אן איד, איך ענזשוי עס נישט.
משפיע: עס קען נישט זיין, לייג זיך אריין דערין, וועסט פילן א טעם.
מקבל: איך האב שוין אלעס פרובירט, איך האב עס נישט ליב, סארי. עס איז דא אזא זאך ווי אן איד וואס האט נישט קיין געשמאק אין אידישקייט?
משפיע: נישטא אזא זאך, וויאזוי איז עס מעגליך?
מקבל: טא, איך זאל ווערן א גוי?
משפיע: אוי, אזא שווערע דור, עס פאלן נשמות ווי די פליגן...
--------
אמאליגער משפיע
משפיע: אה, ווי וואויל איז אונז אז מיר זענען אידן.
מקבל: וואס איז אונז אזוי וואויל? איך האב נישט קיין כח צו אידישקייט, עס איז מיר נאר א פרעשור און אפקומעניש.
משפיע: אוי וויי, עס טוט מיר לייד צו הערן, אבער אידישקייט איז נישט געמאכט צו זיין געשמאק, עס איז א גוטע זאך.
מקבל: וואס איז דער חילוק פון גוט און געשמאק?
משפיע: זייער פשוט, געשמאק מיינט אז עס איז זיס אויף די מינוט, מען ענזשויט עס. גוט מיינט אז עס האט א תועלת אינעם עתיד, עס איז גוט און וואויל צו זיין א איד אפילו מען האט נישט קיין געשמאקן לעבן און עס קומט נישט אן גרינג.
מקבל: פארוואס עפעס איז עס גוט?
משפיע: וואס הייסט? עס קומט דאך א יענע וועלט, אן איד וואס דינט דעם באשעפער, זיכער ווען עס קומט אים אן שווער, פארדינט ער אזויפיל שכר לנצח נצחים אז עס לוינט זיך אים די אינוועסטירונג פון א שווער לעבן אויף דעם וועלט.
מקבל: למשל איך האלט אז א גוי האט א בעסערע לעבן ווי מיר, איז דאס א סתירה מיט אידישקייט?
משפיע: וואס עפעס? אידישקייט איז נישט געבויט אויף דעם אז א איד האט א בעסערע לעבן.
דער באשעפער האט נישט געגעבן שבת אז מען זאל זיך אפרוען און האבן וואקאציע, און נישט געהייסן האבן א משפחה מיט קינדער ווייל דאס איז די געשמאקסטע ערפארונג, ווייל אויב יא וואלט געדארפט זיין אן אפציע אז אויב האלט מען נישט דערביי זאל מען קענען ארויסטשעקן און טון וואס ארבעט פאר דיר.
אידישקייט טוט מען ווייל מען דארף, גראדע איז עס געווענליך גאר געשמאק און זיס, אבער אויב שפירט מען נישט די זיסקייט איז נישט עק וועלט, קען זיין עס איז עק פון דעם וועלט, אבער עס איז דא א יענע וועלט.
מקבל: איר ווילט מיר זאגן אז אידישקייט איז בכלל נישט געמאכט צו זיין געשמאק? פון וואו נעמט איר עס?
משפיע: עס איז אקארשט געווען יו"ט שבועות, געדענקסט וואס רות האט געזאגט פאר נעמי ווען זי האט געוואלט ווערן אן איד? נעמי האט איר געוואלט אפרעדן אז עס גייט בכלל נישט זיין אזוי געשמאק, עס קען זיין אז מען גייט איר הרג'ענען פארן עובר זיין אן עבירה, וואס האט זי געענטפערט? זי האט נישט געזאגט, נע אידישקייט איז זיכער ענזשויעבל, זי האט געזאגט איך בין גרייט דערויף, איך בין גרייט אויף אלעם, עס קען זיין אז איך גיי האבן א לעבן און טויט ביטער ווי א גאל, אבער איך וועל האבן א יענע וועלט.
קוק אריין אין אקדמות, דארט רעדט מען ווי דער גוי זאגט צו גאלדענע גליקן פאר דעם איד אויב ער וועט ווערן א גוי, און ער לייגט אראפ אלע שוועריגקייטן וואס קומט מיטן זיין אן איד. ווייסט וואס דער איד ענטפערט אים? ער זאגט אים נישט, ביסט נישט גערעכט, אן איד איז פיל געשמאקער.
ער זאגט אים, עס וועט קומען א צייט וואס פאר מיר וועט זיין ליכטיג און זיס, און פאר דיר וועט זיין טונקל, פארוואס לוינט זיך צו פארטאכלעווען חיי עולם פאר אביסל חיי שעה?
מקבל: אה, איך האב געמיינט אז איך בין א שייגעץ אז איך האלט אז עס איז בעסער פאר א גוי אויף דעם וועלט.
משפיע: חס ושלום, איך וואונטש דיר אז זאלסט האבן א געשמאק אין אידישקייט, אבער אויב חלילה נישט, געדענק, אידישקייט איז געבויט אויף א אמונה אין עולם הבא, נישט עולם הזה.
צדיק ורע לו, רשע וטוב לו איז נישט קיין אפפרעג אויף אידישקייט, עס איז א טייל פון אונזער נסיון. האלט זיך שטארק ברודער.
