נאך א לענגערע צייט אפשניט זינט די לעצטע הבדלה בליצן איז ארויסגעקומען לאור עולם פארגאנגענעם חודש אדר תשפ"ג, שיקן מיר אייך אצינד דעם עמערדזשענסי אויסגאבע איבער די נושא פון וואטסעפפ טשענעלס, וואס איז ארויסגעגעבן געווארן אין די פארגאנגענע וואכן.
מיר פארשטייען אז אלס איינע פון די וועלכע האבן ארויסגעקוקט אויף די הבדלה אויפוואכונג, האט איר געהאט א מחשבה וואס עס האט פאסירט מיט הבדלה, און ווי פארשטענדליך נאך א שטיק צייט טוט מען זיך צוגעוואוינען אז די וועלט קען אנגיין אויך אזוי, און דאס איז נישט די ערשטע גוטע זאך וואס האט נישט אנגעהאלטן...
און דער אמת איז אז די וועלט איז טאקע אנגעגאנגען, אבער עס איז נישט קיין ספק, אז די כסדר'דיגע קלארקייט וואס איז געקומען אין די חודש'ליכע בליצן צו טויזנטער אידישע הייזער, האט געברענגט א גאר שטארקע כסדר'דיגע אויפוואכונג זיך צו האלטן קלאר, און נישט ווערן נאכגעשלעפט נאך די טעכנאלאגישע נסיונות, יעדער איינער לויט זיין שטייגער.
און די לעצטע חדשים זענען טאקע געקומען גאר אסאך פידבעק פון אידן וואס האבן געפרעגט מי יראינו טוב, אינגעלייט וואס דארפן כסדר'דיגע חיזוק נישט צו ווערן איבערצייגט אז מען 'מוז' האבן וואטסעפפ, ווייבלעך וועלכע בעטן שטארקייט צו פארלאנגען בעסערע פילטערס אין אפיסעס, אידן מיט וואטסעפפ וועלכע דארפן חיזוק צו בלאקן סטעטוס און מאכן א טריט ארויף, און אזוי האט מען געהערט גאר אסאך וועלכע קוקן ארויס אז דאס זאל אנגיין.
אט דערפאר טוען מיר מעלדן אז אין די לעצטע צייט ווערט אריינגעלייגט גאר שטארקע כוחות צו אוועקשטעלן די הבדלה ארגאניזאציע מיט שטארקע יסודות, שטעלן א סטרוקטור פאר דעם מוסד צו קענען ממשיך זיין די הייליגע פעולות, און גיי מחיל אל חיל מיט פרישע פראיעקטן וואס קען ברענגען א שטארקע העכערונג און א שמירה פאר טויזנטער אידישע קינדער אויף פילע אופנים.
מיר האפן אז גאר בקרוב וועלן מיר קענען מעלדן פרישע אפדעיטס איבער די אנטוויקלונגען, ויה"ר אז מיר זאלן זוכה זיין צו מרומם זיין אידישע קינדער, און בקרוב צו גיין אקעגן משיח צדקינו בב"א.
המערכת
וויכטיגע אפדעיט!
אין די בייגעלייגטע אויסגאבע איז פארהאן אינפארמאציע פון פילטערינג קאמפאניס מעגליכקייטן צו בלאקירן וואטסעפפ טשענעלס און נאך. זינט די אויסגאבע איז געגאנגען צום דרוק, זענען געווארן אפדעיטעד פארשידענע אפציע ביי עטליכע קאמפאניס, דערפאר טוען מיר דא מיטלייגן א פרישע אפדעיט איבער די פילטערינג מעגליכקייטן:
- אלע ענדרויד דעווייסעס קען פילטערן אויף וואטסעפפ סיי די טשענעלס, און סיי AI.
- אויב איז אייער וואטסעפפ נישט געפילטערד, איז מעגליך אז איר דארפט פריש לאודן די פילטער, דערפאר רופט אן די פילטערינג קאמפאני דאס צו פאררעכטן.
- די פילטער איז נאך אין די ערשטע שטאפלען, און עס קען זיך מאכן אז עס זאל אראפפאלן, דערפאר איז וויכטיג צו זיין געווארנט.