זוֹבְחֵי הַזֶּבַח אִם שׁוֹר אִם שֶׂה וְנָתַן לַכֹּהֵן הַזְּרֹעַ וְהַלְּחָיַיִם וְהַקֵּבָה
מערכת שיעורי תורה שעל ידי קהל יטב לב דסאטמאר בני ברק האט היינט נאכט ליל אושפיזא דיוסף אפגעראכטן אן הערליכן מעמד שחיטת כבש און דערצו די מצוה נדירה פון נתינת מתנות כהונה.
דער מעמד איז פארגעקומען אין בית המדרש הגדול ויואל משה אין שיכון קרית יואל בני ברק בהשתתפות הונדערטער אנשי שלומינו זקנים עם נערים, ועל צבאם מורינו הגה”צ ראש ישיבתינו שליט"א.
צוליב דעם ריבוי העם, האט מען אויכט געפענט דעם עזרת נשים פאר אברכי ובחורי אנ"ש, צו קענען מיטהאלטן די גרויסן מעמד
דער מעמד איז אנגעפירט געווארן בטוב טעם ודעת על ידי יו"ר שיעורי תורה דקהלתינו הרה"ג ר' חיים דוב בלאשטיין שליט"א וואס האט במיטב כשרונותיו געפירט דעם מעמד מיט א געוואלדיגן סוקסעס, נאכן זיך איבער געבן א גאנצע יאר פאר אלע שיעורי תורה בכלל אין די וואך פאר אלע שיעורי חול המועד בפרט.
צום ערשט האט אופגעטרויטן הגה"צ די ראש ישיבה שליט"א בדברי פתיחה איבער די מצוה נדירה פון נתינת מתנות כהונה, וואס איז געפסקנ'ט אין שולחן ערוך אז ס'איז א חיוב גמור, אבער אין בית השחיטה איז נישטא קיין חיוב ווייל ס'געהערט נאכנישט פאר קיין איד, נאר יעצט אז מ'וועט אפקויפן בשותפות די בהמה בחייה, און אויב ס'וועט זיין גלאט כשר וועט מען צוזאמען קענען מקיים זיין די מצוה רבתי פון מתנות כהונה, אזוי אויך האט די ראש ישיבה שליט"א דערמאנט אז די חתם סופר זי"ע האט מקפיד געווען יעדן ערב יו"ט אפקויפן א בהמה צו געבן מתנות כהונה.
די ראש ישיבה האט אויך פארגעלערנט די חלק ההלכות איבער מתנות כהונה, ווי צב"ש אז כהנים אדער איידימער פון כהנים אדער לויים קענען נישט האבן א חלק אין די מצוה, און אזוי ווייטער די אנדערע הלכות.
דערנאך האט מען פארקויפט זכות פון רוב הבהמה, וואס איז אפגעקופיט געווארן דורך הרה"ח ר' נח קליין שליט"א חבר הנהלת קהלתינו, אזוי אויך האט יעדער איינער געקענט האבן די זכיה זיך צו משתתף זיין אין קניית הבהמה.
ר' נח שליט"א איז מכובד געווארן בשליחות הציבור מיט קנין הגבהת הבהמה, און דערצו האט מען אויך געמאכט קנין כסף דורכ'ן געבן געלט פארן מוכר, און אויך קנין חליפין על ידי הגה"צ ראש הישיבה שליט"א.
דאן איז ארויפגעקומען דער חשובער שוחט, הרה"ג ר' ישעי' שטערן שליט"א מחשובי אנשי שלומינו דירושלים עיר הקודש, שוחט ובודק רבות בשנים בשחיטה המהודרת שעל ידי בית דין צדק העדה החרדית, און מסביר געווען בטוב טעם ודעת ובלשון לימודים אלע פרטים איבער די בהמה, און פארוואס מ'האט נישט געברענגט א כבש א זכר, מחשש בכור, וואס קען זיין א שאלה פון שחיטת קדשים בחוץ, און דערפאר האט מען געברענגט א ציג א נקבה.
נאכן מסביר זיין אלע חלקי הבהמה פון אינדערויסן איז מען צוגעגאנגען צו בדיקת הסכינים, דאן האט הבודק המומחה הרה"ח ר' מתתיהו גאלדבערגער שליט"א, געטראפן א חשש קל פון א שאלה אינעם סכין, און מ'האט ארויסגעברענגט א צווייטן מעסער וואס איז אויך איבערגעקוקט געווארן דורך הגה"צ די ראש ישיבה שליט"א, און נאכן זעהן אז סאיז חלק ומהודר בתכלית השלימות, איז מען צוגעטרויטן צו די ברכת השחיטה ומלאכת השחיטה.
תיכף נאכן שחיטה איז דער חשובער שוחט שליט"א, אריבער אבר אבר פונעם בהמה, און מסביר געוועהן אלע שאלות וואס קען נאר זיין, די שוחט האט מיטגעברענגט פונדערהיים חלקי בהמה וואס זענען געוועהן מיט ספיקות און שאלות צו ווייזן פארן ציבור וועלעכע שאלות קען זיך טרעפן אינעם בהמה, די אלע ערקלערונגען האט ארויס געברענגט א שטארקן קלארקייט פאר אנשי שלומינו אין בעיקר פאר לומדי מסגרת תורתך שעשועי וואס לערנען יעצט מסכת חולין מיט די פארצווייגטע הלכות השחיטה וסימני הטריפה.
גראד ווען די שוחט שליט"א האט איבער געקוקט די לונגען און אויסגערופן גלאט כשר איז די ציבור ספאנטאנישט ארויס און א געזאנג, טוב להודות להשם, אז מ'גייט מקיים זיין די מצוה נדירה פון מתנות כהונה.
נאכן אריבער גיין אלע חלקי הבהמה ושאלותיה, איז מען אריבער צום גרויסן מעמד פון נתינת מתנות כהונה, וואס איז צוטיילט געווארן פאר 4 חשובע כהנים [זרוע, 2 לחיים, והקיבה]: הרה"ג ר' משה הערש כהן שליט"א, הרה"ח ר' יואל כהן שליט"א חתנו פון ר' נח קליין רוכש זכות הבהמה, הרה"ג ר' יצחק הכהן סאנדער שליט"א, און הרה"ח ר' יוסף חיים הכהן וויינפעלד שליט"א חבר הנהלת הקהילה.
בשעת ווען די שוחט האט געוויזן אלע חלקי הבהמה וואס מ'דארף ארויף לייגן אויפן מזבח ביי די קרבנות איז ארויס פון יעדן'ס הארץ די תפלה והשב כהנים לעבודתם ולויים לשירם ולזמרם והשב ישראל לנויהם במהרה בימינו אמן
- 3 (1).jpg (69.96 KiB) געזען געווארן 1644 מאל
- 2 (1).jpg (63.78 KiB) געזען געווארן 1644 מאל
- 1 (1).jpg (70.17 KiB) געזען געווארן 1644 מאל