ביטל כמה גזירות
אין ווייטערדיגע באריכטן וועגן די נייע פאליסי וואס איז איינגעפירט געווארן אין מיליטער, לויט איר ווערן נישט בחורים באפרייט פון באזע אפילו נאך וואס פון געריכטליכן פרעספעקטיוו זענען זיי באפרייט - פרייען מיר זיך צו מעלדן אז נאך די אינטערווענץ פון העסקן ר' שמעון שישא שליט"א וואס האט אונטערגענומען א שורה פון מיטלען און האט אקטיוויזירט שווערע פרעשור אויף די אויטאריטעטן האט מען מיט גרויס סייעתא דשמיא באוויזן אפצושאפן די גזירה, און די אלע בחורים וואס זענען געווען אויפגעהאלטן ביי זיי זענען ענדגילטיג באפרייט געווארן ב"ה.
יענע וואך האט זיך אפגעשפילט נאך א ערשטוינענדע מעשה. א בחור וואס איז שוין פארפלאנטערט מיט די מיליטער איבער אנדערטהאלבן יאר. אלעס האט זיך אנגעהויבן ווען בלויז צוויי טעג פאר ער האט געדארפט קומען זיך שטעלן פארן מיליטער און מסדר זיין זיין סטאטוס איז ער ארעסטירט געווארן וועגן עפעס א פאלשע בלבול וואס מען האט ארויפגעלייגט אויף אים. דער בחור איז געזעצן אין טורמע א לאנגע תקופה און דערנאך איז ער געווען אונטער הויז-ארעסט נאך א שטיק צייט, און דעריבער האט ער נישט עספיעט במשך די גאנצע צייט צו ערלעדיגן זיינע פאפירן קעגן די מיליטער.
דער טאטע פון דעם בחור מאכט בר מצוה אין חוץ לארץ, און טראץ וואס ער געפינט זיך אונטער הויז-ארעסט האט ער באקומען אן עקסטערן ערלויבעניש פונעם ריכטער ארויסצופארן קיין חו"ל צו די בר מצוה. אבער דא פאנגט זיך אן א צווייטע פראבלעם, ריכטיג אז פון די זייט פון די ציווילע פאליציי קען ער ארויספארן אבער פון די זייט פון די מיליטערישע פאליציי איז ער אן "עריק" און ער קען נישט ארויספארן. האט דער בחור אויפגעהויבן א טעלעפאן צום מיליטער און גע'טענה'עט מיט רעכט "איך פון מיין זייט וואלט שוין אלעס מסדר געווען פאר אנדערטהאלבן יאר צוריק, איר זענט שולדיג אז איר האט מיר ארעסטירט", אבער זיינע ווערטער זענען געפאלן אויף טויבע אויערן "דו מוזט זאפארט אריבערקומען אין ווערן ארעסטירט אין טורמע" האבן זיי אים געזאגט פארשטאפטערהייט, "עס גייט אונז נישט אן אז דיין טאטע מאכט בר מצוה אין חוץ לארץ".
דער בחור איז געקומען אין אפיס פון מרכז עזר"י און פארציילט וואס דא גייט פאר. ר' שמעון שישא האט זיך אויפגעשטעלט און אראפגעפארן קיין נתניה צוזאמען מיטן בחור און אריינגעגאנגען אין די מיליטערישע געביידע, אבער דארט האט אויך קיינער נישט געוואלט הערן וואס זיי האבן צו זאגן. ר' שמעון האט געזען אז אזוי וועט עס נישט גיין, איז ער אן פרעגן צופיל קושיות צוגעגאנגען צום צימער פונעם הויפט פראקוראר, געעפנט די טיר און אריין אינעווייניג. דער פראקוראר איז געווען איבערראשט פון די קוראזש פון ר' שמעון און ער האט אים געפרעגט וואס ער וויל. ר' שמעון האט אויפגעוויזן פאר דעם פראקוראר שווארץ אויף ווייס אז מען מוז דעם בחור ארויסלאזן קיין חו"ל אן קיין באדינגונגען. דער פראקוראר האט געזאגט ר' שמעון ער זאל שטיין מיט אים אין קאנטאקט. צוויי טעג דערויף האט ר' שמעון באקומען דעם ענטפער אז דער בחור האט אן ערלויבעניש ארויסצופארן.
דער בחור איז אנגעקומען אין לופטפעלד ארויסצופארן קיין חו"ל, אבער דארט רופט מען אים פלוצלינג אין א זייט. דער בחור האט היסטעריש גערופן ר' שמעון, אבער ר' שמעון האט אים בארוהיגט און אים געזאגט "זאג זיי אז דו האסט אן ערלויבעניש ארויסצוגיין, זאלן זיי נאכאמאל איבערקוקן אין קאמפיוטער", נאך צוויי מינוט רופט דער בחור צוריק פאר ר' שמעון און ער שרייט "דו וועסט נישט גלייבן! איך פאר, איך פאר! איך גיי יעצט ארויף אויפן פליגער!".
דאס איז נאר איינע פון הונדערטער עפיזאדן וואס שפילן זיך אפ רונדע דעם זייגער, און וואס מען הערט פון דעם אין די אפיסעס פון מרכז עזר"י טאג און נאכט.
אין די לעצטע טעג זענען צוגעקומען פרישע כוחות פון נייע לויערס וואס וועלן שטיין אין דינסט פון מרכז עזר"י, אין צוגאב צום לויער ר' מנחם שטאובער.
- aa1c87bd-1217-40d2-856f-a38d39923fa9.jpg (215.49 KiB) געזען געווארן 174 מאל
- 1dba8476-d6ed-46d3-bf8a-41375a538bc3.jpg (187.96 KiB) געזען געווארן 174 מאל
די עסקנים הרה"ח ר' שמואל יאקאבאוויטש שליט"א, הרה"ח ר' שמעון דיאמאנט שליט"א, הרה"ח ר' אברהם יואל אייזענבערג שליט"א, הרה"ח ר' דוד משה דייטש שליט"א אין שפיץ פון הרה"ח ר' שמעון שישא שליט"א אין באראטונג היינט אין אפיס
