אידטיש

דער רבי האט געדאווענט מנחה ארום 6:15 אינטן אינעם זאל בביתו נאוה קודש,
פאר מנחה האט דער רבי געצינדן לעכט לרגל די יארצייט פון די באבע הרבנית רחל ע"ה אשת חבר פון מרן הגה"ק בעל ייטב לב זי"ע.

צווישן מנחה און מעריב זענען אריין לברך ולהתברך הונדערטער אויסלענדישע געסט וועלכע זענען געקומען אויף יו"ט בצל הקודש.
דער רבי האט געדאווענט מעריב ארום 8:20.
נאך מעריב האט דער רבי געבינדן די ערבות פאר די הושענות מיט א צווייג פון א ערבה.

אום 10:00 אזייגער איז רבינו שליט"א אריינגעקומען אין ביהמ"ד הגדול צו קריאת משנה תורה אנגעטוהן מיט א ווייסע קאפטן, דער רבי האט געזאגט די תפילה פארן ליינען,
בעל קורא איז געווען הרה"ח ר' שלום יוסף סאמעט הי"ו.
מען האט געענדיגט ארום 11:40.

נאך עטליכע מינוט איז דער רבי אריינגעקומען צום עריכת שלה"ט לכבוד הוש"ר ואושפיזא דדוד מלכא משיחא בסוכה הגדולה שע"י ביהמ"ד הגדול.

דער רבי האט געזאגט די סדר אושפוזין, און זיך געוואשן,
ביי לחיים האט דער רבי געוואונטשן 'א גוט געבענטשט יאר',
במשך פונעם טיש האט מען געזינגען ניגוני התעוררות וניגוני ימים נוראים,
מען האט אויפגעגעבן די מאכלים ווי יו''ט,
די בעלי אושפיזין האבן געשטעלט וויין, און נאך די פלייש האבן די בעלי אושפיזין אויפגעגעבן קוגלען און דער רבי האט פארטיילט שיריים פאר די בעלי אושפיזין,
מיט די שיר המעלות האט דער רבי מכבד געווען:
הרה"ג ר' דוד פערל שליט"א.
הרה"ג ר' דוד גרינפעלד שליט"א - מו"ץ.
הרה"ח ר' דוד עקשטיין הי"ו.
דערנאך האט דער רבי געזאגט תורה אויפן פסוק 'קויתי ה' קותה נפשי' און ארויסגעברענגט אז דורך מצות מילה קומט אראפ די ערלת הלב און דאס ברענגט אז די תשובה זאל אנקומען בפנימיות הלב.
ברכת המזון: חדב"ן הגה"צ רב דביהמ"ד אהל פיגא שליט"א.
מען האט געענדיגט ארום 12:45.
נאכ'ן טיש איז דער רבי אריינגעקומען צו אמירת ספר תהלים ברוב עם אין ביהמ"ד הגדול.
בעל תפילה איז געווען הרה"ח ר' אשר יעקב עקשטיין הי"ו.
מען האט געזאגט די יהי"ר און קדיש נאך יעדע ספר, מען האט געענדיגט תהילים ארום 2:50, און דער רבי איז אהיים לביתו נאוה קודש.

ארום 11:15 איז דער רבי אריינגעקומען צו תפילת שחרית אין ביהמ"ד הגדול, מעוטף מיט'ן טלית, קיטל, קאפל און וועסטל פון רביה"ק בעל דברי יואל זי"ע און אינטער דעם די ווייסע סטראקעס בעקיטשע,

פארן דאווענען איז פארגעקומען די ברית לבן הנולד אצל ר' ישראל דוד ברז"ל קאפפעל הי"ו ווי דער רבי איז געווען סנדק ומוהל.
און די ברית לבן הנולד אצל ר' שלמה ב"ר נחמן קליין הי"ו ווי דער רבי איז געווען סנדק.

דער רבי איז צוגעגאנגען צום עמוד צו פסוקי דזמרה און שחרית, מען פארגעזאגט הלל הגדול און די שירה פסוק בפסוק, און אפגעראכטן די עבודת הקודש פון די נענועים ביי הלל מיט גרויס ברען און דביקות,
נאך הלל האט משב"ק הרה"ח ר' יושע מענדלאוויטש הי"ו אראפגענומען די רינגעלעך פונעם רבינ'ס לולב.

דער רבי האט אנגעהויבן די פלאם פייערדיגע 'הושענא רבה דרשה' ארום 1:50, דער רבי האט משמיע געווען דברות קודש זיבן מאל ביז הושענא למען גדלך ותפארתך,
דער רבי האט אנגעהויבן מיט בכיות נוראות מיט די באקאנטע משל פונעם הייליגן ייטב לב זי"ע, זאגענדיג אז 'הולך בדרכי אבות מזכירין לו זכות אבות' הושענא רבה איז די לעצטע טאג, דער מלך גייט שוין אוועק, מען קען נאך צוקומען צום מלך, אבער די בושה איז זייער גרויס, 'אי מלכא אנא עד השתא אמאי לא אתית לגבאי', אבער אז מען זאגט מען מיינט די טובה פונעם מלך פרעגט מען נישט קיין קשיות, דערפאר זאגט מען למענך אלוקינו אז מען מיינט די טובה פונעם מלך.

"הושענא למענך אלוקינו"
אהבה באטרעפט י"ג, ווען צוויי אידן האבן זיך ליב איינער דעם צווייטן איז צוויי מאל י"ג ווערט עס כ"ו די שם הוי', דאס איז ואהבת לרעך כמוך ווערט אני ה', דער חיד"א לייגט צו אז דורך אהבת חברים ווערט נמתק די מידת הדין און ווערט נתהפך צו מידת הרחמים, כמו"ך איז בגי' אלקים, טייטשט ער ואהבת לרעך - אויב איז דא אחדות, כמו"ך אני ה', ווערט די מידת הדין אלקים נתהפך צו ה' וואס איז רחמים, דערפאר זאגט מען הושענא למענך אלקינו מיט די ד' מינים וואס איז מרמז אויף אלע ד' כיתות אין כלל ישראל, און איז זיי מאגד אינאיינעם, וואס דאס ווייזט אויף אחדות, און דאס איז מעורר מידת הרחמים, ווערט נמתק אלע דינים, און מער פרעגט מען נישט קיין קשיות, און אפילו די שם אלקינו איז אויך הושענא.
אופן ב': שכר מצוה בהאי עלמא ליכא, דאס איז נאר א מצות עשה ווייל עס איז אויך נישט דא קיין עונש אויף די וועלט, אבער א לא תעשה וואס דאס באקומט מען אן עונש בעולם הזה, איז אויך דא שכר בעולם הזה, שטייט אין תיקוני זוהר אז מצוות עשה איז שם הוי', לא תעשה איז שם אלקים, שטייט אין נועם מגדים אז אויף א דרבנן באקומט מען שכר בהאי עלמא, קען זיין ווייל דער רמב"ם זאגט אז יעדע דרבנן איז דא א לא תעשה פון לא תסור, דער זיידע אין עצי חיים איז מברר לויט די גמרא אין מסכת קידושין אז אויב איז דא שכר מצוה בהאי עלמא דארף די מצוה מגין זיין, לויט דעם קען זיין אז הושענא רבא קומט מען מיט די ד' מינים אין די האנט וואס איז א מצוה דרבנן, מן התורה דארף מען נאר די ערשטע טאג, און דאס איז הושענא למענך אלקינו וואס איז מצוות דרבנן, און אונזער בקשה איז אז די שכר מצוה פון די מצוה דרבנן זאל זיין אז די מצוה זאל מגין זיין אז מען זאל נישט פרעגן קיין קשיות און מען זאל קענען פועל'ן אלעס גוטס.
און דער רבי האט מאריך געווען מפרט צו זיין אלע בקשות פון אידישע קינדער, מען זאל קענען בעטן, מען זאל קענען מתפלל זיין, זרע של קיימא, נחת פון די קינדער און אייניקלעך, רפואות פאר חולי ישראל, פרנסה, שידוכים, וכו'.

"הושענא למענך בראינו"
הראיני את מראיך השמיעני את קולך כי קולך ערב ומראיך נאוה, שטייט אז ווען איז קולך ערב, ווען איז הקב"ה מקבל תפילות, נאר אויב עס איז ומראך נאוה אויב מען האט די צלם אלקים, אבער אז מען זינדיגט פארלירט מען דעם צלם אלקים, כאפט אן אימה ופחד וויאזוי גייען אונזערע תפילות נתקבל ווערן? אבער הקב"ה מיט זיין גרויס רחמים באשאפט א נייע צלם אלקים במתנה, דאס איז אונזער תפילה ובקשה צו הקב"ה אז מיר זאלן נישט פארלירן דעם צלם אלקים! און דער רבי האט מאריך געווען בבכיות נוראות אז מען זאל איינרייסן אז די קינדער און אייניקלעך זאלן בלייבן מיט'ן צלם אלקים און נישט חלילה פארפאלן גיין ל"ע, דאס איז למענך בראינו אז דער באשעפער באשאפט א נייע צלם אלקים אויב מען פארלירט עס.

"הושענא למענך גאלינו"
הקב"ה האט זיך בארימט מיט אברהם אבינו אז ער האט נישט געפרעגט קיין קשיות ביים עקידה אז אתמול אמרת לי כי ביצחק יקרא לך זרע, שטייט אין ישמח משה אז בזכות זה באצאלט השי"ת מדה כנגד מדה אז ווען די מקטריגים ווילן פרעגן קשיות אויף כלל ישראל זאגט השי"ת אברהם אבינו האט נישט געפרעגט קיין קשיות, דעריבער לאזט נישט השי"ת די מקטריגים פרעגן קשיות אויף כלל ישראל, אבער דאס איז נאר אויב אברהם האט געהאט א קשיא צו פרעגן, לכאורה קען דאך זיין אז אברהם וועט באקומען א צווייטע זון יצחק, איז דאך מער נישט שווער די קשיא אתמול אמרת לי, אבער שטייט אז יצחק די צ' איז ווי אלט שרה איז געווען, און די ק' איז ווי אלט אברהם אבינו איז געווען, דאס קען דאך שוין נישט זיין א צווייטע קינד זאל האבן די נאמען יצחק ווייל אברהם ושרה זענען שוין געווען עלטער, ביי יציאת מצרים שטייט לכן אמור לבני ישראל אני ה', זאגט דער בעל הטורים אז לכן איז בגי' ק' און דאס איז מרמז אויף די ק' שנים וואס אברהם אבינו איז אלט געווען ביים געבוירן יצחק, דערפאר מדה כנגד מידה אז אברהם אבינו האט ביים עקידה נישט געפרעגט אתמול אמרת לי וואס ער קען ווען פרעגן ווייל ער קען דאך שוין נישט האבן א צווייטע זון יצחק, דערפאר מדה כנגד מדה האט השי"ת נישט געלאזט די מקטריגים פרעגן אויף כלל ישראל ביי יציאת מצרים כאטש זיי זענען געווען אין א שפלות'דיגע מצב, דאס איז למענך גאלינו פונקט ווי ביי גאולת מצרים האט הקב"ה נישט געלאזט פרעגן קיין קשיות אויף כלל ישראל זאלן זיי יעצט אויך נישט קענען.

"הושענא למענך דרשינו"
עמו אנכי בצרה זאגט דער מדרש אל תיקרא בצרה אלא בצירי, זאגט הרה"ק רבי שמשון מ'אסטראפאלא זי"ע אז י'שראל, י'רושלים, און די שם הוי' הייבן זיך אלע אן מיט א י', די דריי יוד'ן מאכט א סגול, דאס איז והייתם לי סגולה מכל העמים, אבער משנחרב ביהמ"ק האט מען פארלוירן ירושלים, בלייבט אבער די אנדערע צוויי און עס בלייבט א צירי, די ערשטע פיר הושענות גייען עפ"י סדר הא"ב, למענך א'לקינו, ב'ראינו, ג'אלינו, און ד'רשינו, פארוואס גייט מען נישט ווייטער עפ"י סדר הא"ב? וויבאלד א,ב,ג,ד, איז בגי' י', דאס איז א רמז אויף די י' פון ירושלים וואס פעלט, אונזער בקשה איז עיר ציון תמלא, ס'זאל צוריק נתמלא ווערן די י' וואס פעלט, דאס איז למענך דרשינו וואס איז די א,ב,ג,ד, וואס איז אינאיינעם א י', און אונז בעטן אז השי"ת זאל צוריק שטעלן די דריטע י' און אונז זאלן צוריק ווערן די עם סגולה.
"הושענא למען אמיתך"
שטייט אין עשרה מאמרות אז תשובה נוצט ווייל מודה בקנס ואח"כ באו עדים איז פטור, אבער נאר אויב מען איז מודה פארן בעל דין, דאס איז גדולה תשובה שמגעת עד כסא הכבוד אז עס איז בפניו פונעם בעל דין און דאס העלפט, שטייט פון ר' פנחס'ל קאריצער אז א שקרן קען זייער שווער תשובה טאן, דאס שטימט לפי די מאמר חז"ל אז א שקרן קען נישט מקבל זיין פני השכינה, און דערפאר קען נישט די תשובה אויפטון ווייל עס דארף זיין בפניו פונעם בעל דין, אבער אידישע קינדער וואס זענען דבוק אין מידת האמת קענען יא תשובה טון, דאס בעט מען הושענא למען אמיתך, מיר זענען נישט פון די כת השקרנים, דעריבער נוצט אונזער תשובה.

"הושענא למען בריתך"
אז א איד זינדיגט קומען די חיצונים און כאפן אוועק אלע מצוות, שטייט אין אך פרי תבואה אז אויב א איד האט אהבה צו הקב"ה איז על כל פשעים תכסה אהבה, די גמ' אין מנחות זאגט דוד המלך נכנס לבית המרחץ ואמר אוי לי שאני ערום בלא מצוות, אבער ווען ער האט זיך דערמאנט פון ברית מילה האט ער זיך בארואיגט, דוד המלך איז געגאנגען תשובה טון און ער האט זיך דערזען ערום בלא מצוות ווייל די חיצונים האבן אלעס אוועקגעכאפט, אבער ער האט זיך דערמאנט מצוות מילה, שטייט אין ספרים הק' אז מילה איז משפיע אהבת ה', אויב אזוי איז על כל פשעים תכסה אהבה, דאס איז הושענא למען בריתך.
אופן ב': דער קאזניצער מגיד זי"ע זאגט אז א מענטש האט א פלייש געשעפט און עס זענען דא כלבים ארום, נעמט ער א ביין וואס האט נישט קיין פלייש און ווארפט עס צו די כלבים, און אזוי איז ער מציל די גאנצע פלייש, ער ברענגט עס ארויס בדרך מוסר אז הקב"ה האט א געשעפט אידישע קינדער, די חיצונים ווילן אוועקכאפן די שפע, נעמט הקב"ה א רשע וואס האט נישט קיין לחלוחית של מצוה און ווארפט עס צו די חיצונים און דורכדעם איז הקב"ה מציל גאנץ כלל ישראל, און ער פירט אויס אז יעדער דארף זיכער מאכן אז ער זאל נישט זיין דער וואס הקב"ה ווארפט צו די כלבים! קען זיין אז איינער וואס איז מקיים מצות מילה וואס איז חקוק בבשרו קען מען אויף אזא איינעם נישט זאגן אז ער האט נישט קיין לחלוחית של מצוה ווייל עס איז חקוק בבשרו, דאס איז הושענא למען בריתך, אין זכות פון ברית מילה בעט מען מיר זאלן חלילה נישט פארווארפן ווערן צו די כלבים!

"הושענא למען גדלך ותפארתך"
שטייט פון ארי' הק' מכנף הארץ זמירות שמענו צבי לצדיק, שטייט אין מדרש אז דורך אותיות מנצפ"ך איז געווען גאולות ישראל, מצרים איז געווען דורך די פ', פקוד פקדתי, גאולת מדי, בבל, און יון, זענען געווען דורך די כ', מ' און נ', די גאולה העתידה וועט זיין דורך צ', צמח תצמיח, ביי יעדע גאולה האבן אידן געזאגט שירה, זאגט דער אריה"ק מכנ"ף הארץ, פון די פיר אותיות מ,כ',נ',פ', זמירות שמענו האבן מיר שוין געהערט שירה, צבי, אונזער האפענונג איז, לצדיק צו די שירה דורך די אות צ' בגאולה העתידה, יו"ט סוכות מאכט מען יעדן טאג צ' נענועים, דורך די צ' נענועים איז מען מעורר די זכות פון משיח צדקינו בגאולה העתידה, און דער רבי האט מסיים געווען מיט ברכות לרוב פארן גאנצן ציבור.
ארום 2:50 האט דער רבי געענדיגט די דרשה, און ממשיך געווען מיט די הושענות און די זיבן הקפות, צווישן די הקפות האט הגה"צ אב"ד ור"מ וומ"ס שליט"א געבלאזן די תקיעות תשר"ק, און נאך קדיש תתקבל האט דער רבי געקלאפט די הושענות 5 מאל און געזאגט דעם יהי רצון.
ביים ליינען איז מכובד געווארן,
הוצאה והכנסה: הר"ר נפתלי הורוויץ שליט"א - לאנדאן.
מען האט געזאגט אתה הראית מיט די י"ג מדות און רבוש"ע און שיר למעלות פון עשי"ת, בעל קורא איז געווען ר' יעקב משה מיטטעלמאן הי"ו.
עס האבן עולה געווען:
כהן: הרב שמואל צבי כהנא שליט"א - מאנסי.
לוי: הר"ר יודל וואזנער שליט"א - מאנטשעסטער, און האט גומל געבענטשט און מוציא געווען הונדערטער געסט אנ"ש.
שלישי: הרה"ג ר' אברהם שלום פריעדמאן שליט"א - מראה"כ.
רביעי: רבינו שליט"א.
הגבה: הר"ר בעריש גראס שליט"א - מאנטריאל.
גלילה: הרה"ח ר' משה יצחק שטערנליכט הי"ו - לאנדאן.

מוסף האט געדאווענט פאר'ן עמוד הרה"ג ר' מענדל ווערצבערגער שליט"א - דומ"ץ דקהלתינו הק' מאנטריאל.
די כהנים האבן גע'דוכנ'ט, מען האט נישט געזאגט רבוש"ע,
תיכף נאך מוסף האט מען געדאווענט מנחה, בעל תפילה איז געווען הרה"ג ר' אשר חיים ווייזער שליט"א - מו"ץ בקהלתינו הק' ב"פ.
מען האט געענדיגט ארום 4:35.
עטליכע מינוט נאכ'ן דאווענען איז דער רבי אריינגעקומען צום עריכת שולחן הטהור אין די סוכה הגדולה, דער רבי האט געזאגט די סדר אושפיזין און זיך געוואשן.
אין די זופ איז געליגן קרעפלעך כנהוג.
ביים לחיים נאך די זופ האט דער רבי געוואונטשן א גוט געבענטשט יאר.
מיט'ן פיוט פון תתננו האט דער רבי מכבד געווען הרה"ח ר' חיים הערש גאלד הי"ו - וומ"ס.
ברכת המזון: נכד רבינו הרב דוד טייטלבוים שליט"א בן הגה"צ אב"ד סיגוט שליט"א.
מען האט געענדיגט דעם טיש ארום 5:15, און דער רבי איז אהיים לביתו נאוה קודש.
~~

ארום 8:35 איז דער רבי אריינגעקומען אין ביהמ"ד הגדול מעוטף בטלית שאולה צו מעריב והקפות.
צו מערבית איז צוגעגאנגען הגה"צ רבי משה פריעדמאן שליט"א - דומ"ץ דקהלתינו הק' ב"פ.
ארום 9:00 האט דער רבי אנגעהויבן אתה הראת בהתלהבות אש קודש.
פתיחת הארון: הרה"ח ר' רפאל פערלמוטער הי"ו - מאנסי.

"מגדל עוז שם ה' בו ירוץ צדיק ונשגב"

דער רבי איז ארויף אויפן בימה, און געזאגט די לשם יחוד און למנצח, ארום 9:15 האט מען אנגעהויבן צו טאנצן די הקדמה צו די הקפות.
מען האט אנגעהויבן די ערשטע הקפה ארום 10:30, ווי דער רבי האט געטאנצען די ריקודין של מצוה בשמחת התורה, בהלהבות ורשפי אש קודש,
ביי די פערטע הקפה זענען די געסט פון ארה"ק מכובד געווארן מיט א ספר תורה.
נאך די זיבעטע הקפה איז דער רבי ארויף אויפן באלעמער ווי דער רבי האט ממשיך געווען די ריקודין ביתר שאת מיט א געוואלדיגע התלהבות.
נאך די הקפות ארום 11:50 האט מען געזאגט עלינו, און דער רבי האט געוואונטשען א גוט יו"ט בצהלות פניו פארן גאנצן ציבור.

ארום 1:45 איז דער רבי אריינגעקומען צום שלחן הטהור בהיכל השלחנות.
מען האט געזינגען ניגונים פון שמחת תורה מיט גרויס שמחה.
מיט די זמירות האט דער רבי מכבד געווען הר"ר מאיר יוסף בר"א גרויס שליט"א - וומ"ס,
דער רבי האט געזאגט תורה אויפן פסוק והיית אך שמח, און ארויסגעברענגט אז דורך די פיפצן סעודות פון יו"ט סוכות און שמיני עצרת פטר'ט מען זיך פון אלע צרות.
מיט'ן בענטשען האט דער רבי מכבד געווען נכדו הרב ישראל דושינסקיא שליט"א - ב"פ.
מען האט געענדיגט דעם טיש ארום 2:40.

ארום 11:10 איז דער רבי אריינגעקומען צו תפילת שחרית,
בעל תפילה ביי פסוקי דזמרה איז געווען הרה"ג ר' מאיר צוויבל שליט"א - מרבני קהלתינו הק' וומ"ס.
דער רבי איז צוגעגאנגען צו תפילת שחרית און אמירת הלל.
ביים לייענען איז נתכבד געווארן:
הוצאה והכנסה: הרה"ג ר' אברהם וואלף שנעבאלג שליט"א - מו"ץ בקהלתינו הק' וומ"ס, און הרה"ג ר' סיני טייטלבוים שליט"א, בן הגה"צ רב דבית מדרשינו 15טע עוו. ב"פ שליט"א.
פסוקי שמע ישראל: הרה"ג ר' יואל האלבערשטאם שליט"א - רב דביהמ"ד בית שמואל בשכונת דברי חיים.
עס האבן עולה געווען:
כהן: הרה''ח ר' יואל ברא"י קאהן הי"ו - וומ''ס.
לוי: הגה"צ אב"ד ור"מ מאנסי שליט"א.
שלישי: הגה"צ אב"ד ור"מ וומ"ס שליט"א.
רביעי: ר' ישראל חיים גליק הי"ו, און דער רבי האט קורא שם געווען לרגל הולדת בתו למז"ט.
חמישי: רבינו שליט"א.
דער רבי האט קורא שם געווען לרגל הולדת הבת אצל:
ר' קלמן אליעזר סאפדי הי"ו.
ר' אייזיק כהן הי"ו.
ר' משה ברא"ש סטרולאוויטש הי"ו.
ר' קלמן אליעזר רובינשטיין הי"ו.
ר' מרדכי ברי"ה שווארטץ הי"ו.
ר' שמעון ברנ"ד שווארטץ הי"ו.
ר' יואל רייך הי"ו - דזשערסי סיטי.
הגבה אויפן ערשטן ספר: הרה"ח ר' ישעי' ווערצבערגער הי"ו.
גלילה: הרה"ח ר' יואל בערנאטה הי"ו.
מפטיר: הרה"ח ר' פישל ריספלער הי"ו - וומ"ס.
הגבה אויפן צווייטן ספר: הרה"ח ר' אלעזר גרובער הי"ו.
גלילה: הרה"ח ר' חיים שלמה קרויס הי"ו.
נאכן ליינען איז דער רבי אריין לחדרו הפרטי ווי דער רבי האט אנגעטוהן דעם ווייסן סטראקעס בעקיטשע און קיטל, און דערנאך אריינגעקומען צו יזכור.
ארום 2:10 איז דער רבי צוגעגאנגען צום עמוד צו תפילת מוסף וגשם,
נאך די תפלה לש"ץ האט דער רבי געזאגט לדוד מזמור כמנהג רביה"ק בעל דברי יואל זי"ע, און ממשיך מיט קדיש, פאר שמו"ע האט דער משמש הרה"ח ר' יואל קויפמאן הי"ו אויסגערופן 'משיב הרוח ומוריד הגשם'.
פתיחה צו תפילת גשם איז נתכבד געווארן הרה"ח ר' משה גאלדשטיין הי"ו.
דער רבי האט פארגעזאגט די פיוטים פון גשם מיט א שטארקע התעוררות,
צו קוה און אנעים זמירות האט דער רבי צוגעשיקט הרה"ח ר' יצחק ערענפעלד הי"ו.
פתיחה ביי אנעים זמירות: הרה"ג ר' עזרא דוד כאירה שליט"א - מו"ץ בקהל חרדים בארגענטינע.
מען האט געענדיגט דאווענען ארום 3:00 אזייגער.

נאך עטליכע מינוט איז דער רבי אריינגעקומען צום קידושא רבא אין די סוכה הגדולה אינאיינעם מיט די פילע געסט,
דער רבי האט קידוש געמאכט און טועם געווען פון די מזונות, קינדל, און פיש,
מען האט געזינגען ניגוני יו"ט,
דער רבי האט געזאגט תורה אויפן פסוק 'ביום השמיני עצרת תהיה לכם' און ארויסגעברענגט אז שמיני עצרת איז מיוחד צו מתפלל זיין אויף צרכי עצמו, צרכי עצמו מיינט עפעס מיט וואס מען בלייבט אויף אייביג וואס דאס איז רוחניות, במילא קען מען מתפלל זיין אויף פרנסה וויבאלד אידישע קינדער ניצן זייער געלט פאר מצות ומעשים טובים און כלל ישראל'ס גשמיות איז לויטער רוחניות, און דער רבי האט מסיים געווען מיט ברכות לרוב.
מען האט געענדיגט ארום 3:30.
ארום 6:15 איז דער רבי אריינגעקומען אין ביהמ"ד הגדול צו תפילת מנחה.
בעל תפילה: משב"ק הרה"ח ר' שלמה זלמן שטיין הי"ו.
דערנאך איז דער רבי אריבער צום סוכה הגדולה זיך צו געזעגענען פון די סוכה,
מען האט געזינגען ניגוני יו"ט,
דער רבי האט טועם געווען פון די עפל און געמאכט א לחיים און אנגעוואונטשן פאר די חברה קדישא און פארן גאנצן ציבור,
מען האט ממשיך געווען צו זינגען הגלה נא און דער רבי האט געזאגט תורה אויף הגלה נא און ארויסגעברענגט אז מצות סוכה איז משפיע רחמים וחסדים מגולים אז מען זאל קענען זען די חסדים מיט די אויגן, און מעורר געווען אז מען דארף זען אריינצוברענגען די קדושה פון מצות סוכה אין שטוב אריין אויף א גאנץ יאר, און דער רבי האט געזאגט אז מען דארף געבן א שבח והודיה פאר הקב"ה אז מען האט געקענט מקיים זיין מצות סוכה א גאנץ סוכות אן קיין הפסק און עס האט נישט גערעגנט א גאנץ סוכות, און דער רבי האט מסיים געווען מיט ברכות לרוב אז עס זאל זיין חסד ורחמים א גאנץ יאר אן קיין הפסק.
נאך די תורה האט דער רבי געווארפן עפל כמנהג אביו רביה"ק בעל ברך משה זי"ע ולמעלה בקודש,
דערנאך האט דער רבי געזאגט די יהי רצון ליציאה מהסוכה און זיך אויפגעשטעלט און פארגעזאגט דריי מאל לשנה הבאה בירושלים, און דערנאך זיך ארויסגעלאזט אין א פייערדיגע טאנץ בשמחה של מצוה און ארויסגעטאנצן פון די סוכה און אריינגעטאנצן אין ביהמ"ד זיך אנכאפענדיג אין הגה"צ אב"ד סיגוט שליט"א און הגה"צ אב"ד ור"מ מאנסי שליט"א, און ארומגעטאנצן אין ביהמ"ד עטליכע מאל,
דערנאך האט זיך דער רבי אראפגעזעצט אויפן פלאץ און מען האט ממשיך געווען צו זינגען פאר עטליכע מינוט, מען האט געענדיגט ארום 7:20, דער רבי האט געוואונטשן א גוט יו"ט און אהיים לביתו נאוה קודש.
~~

ארום 12:20 איז דער רבי אריינגעקומען אין ביהמ"ד צו מעריב.
בעל תפילה: הרה"ח ר' יואל ברח"ב פילאפף הי"ו.
נאך מעריב איז דער רבי געגאנגען אין מקוה.
ארום 1:25 איז דער רבי אריין געקומען צו די געהויבענע הקפות מעוטף בטלית שאולה, און אנגעהויבן אתה הראת.
מיט פתיחת הארון איז נתכבד געווארן הרה"ח ר' יעקב הערש היימאן הי"ו - וומ"ס.
ארום 1:40 האט מען אנגעהויבן טאנצן די הקדמה, ווי דער רבי האט געטאנצען די ריקודין של מצוה בשמחת התורה, בהלהבות ורשפי אש קודש,
מען האט געענדיגט די הקדמה ארום 4:00 אזייגער.

דער רבי האט משמיע געווען דברות קודש פינף מאל.
א) ידיד נפש אב הרחמן משוך עבדך אל רצונך, דורך ריקודין של מצוה ווערט די פיס נתקדש בקדושה עליונה און עס ווערט נתפשט די קדושה אינעם גאנצן גוף.

ב) הדור נאה, קל איז מידת החסד דורכדעם בארגט השי"ת אויס חסד ורחמים פאר כלל ישראל, יעצט ביי די הקפות איז די צייט וואס מען קען זיך אויסבעטן אלעס גוטס און מען איז זיך מקבל אז מען וועט עס שפעטער באצאלן.

ג) הגלה נא, און די פסוקים פון חג הסוכות תעשה לך און והיית אך שמח איז דא שמות וואס איז מסוגל אויף קינדער, געזונט, און פרנסה, און עס ווערט נשפע דורכ'ן מקיים זיין מצות סוכה און מצות שמחה ביו"ט.

ד) פאר קל מסתתר האט דער רבי געזאגט תורה אויפן פסוק וידבר משה את מועדי ה', און געזאגט אז טראץ מען זאגט נאר מחשבה טובה הקב"ה מצרפה למעשה ביי צדיקים אבער ביי די וואס זענען זיך מסתופף ביי צדיקים זאגט מען עס אויך, פארדעם שיקט הקב"ה אראפ די צדיקים ביי די הקפות כדי זיי זאלן קענען משפיע זיין אויפן עתיד,
די צדיקים וואס אונזער דור האט זיך מסתופף געווען ביי זיי רביה"ק בעל דברי יואל זי"ע און רביה"ק בעל ברך משה זי"ע זענען זיכער דא און אפילו אויב מען זעט זיי נישט גלייבט מען אז זיי זענען דא און זיי זענען משפיע פאר אונז אלעס גוטס.

ה) בראשית תורתך הקדומה, דורך מצות תקיעת שופר און נטילת לולב ווערט נתעורר די זכות פון אברהם אבינו בשעת די עקידה אז טראץ אברהם אבינו האט געהאט קשיות צו פרעגן דאך האט ער נישט געפרעגט, די זעלבע פרעגט הקב"ה נישט קיין קשיות אויף אונז און איז משפיע אך טוב וחסד ירדפוני כל ימי חיינו.

ביי די דריטע הקפה זענען די מלמדי תשב"ר בקהלתינו הק' מכובד געווארן מיט א ספר תורה,
ביי די פערטע הקפה זענען אלע אייניקלעך פון רביה"ק בעל ברך משה זי"ע מכובד געווארן מיט א ספר תורה,
ביי די זיבעטע הקפה איז דער רבי ארויף אויפן באלעמער ווי דער רבי האט ממשיך געווען די
ריקודין ביתר שאת מיט א געוואלדיגע התלהבות.
מען האט געענדיגט טאנצן די הקפות ארום 5:20.
דערנאך האט דער רבי פארגעזאגט די פסוקי יחוד און כתר בהתלהבות אש, און הר"ר ברוך שטערן שליט"א - וומ"ס, האט ממשיך געווען מיט שמע ישראל, און האט געליינט וזאת הברכה,
עס האבן עולה געווען:
כהן: הרה"ח ר' אלי' שאול כ"ץ הי"ו - ב"פ.
לוי: הרה"ח ר' משה ישעי' ווערצבערגער הי"ו - מאנטריאל.
שלישי: רבינו שליט"א.
הגבה: הרה"ג ר' הלל ראבינאוויטש שליט"א - מנה"ר ישיבה סניף ברך משה.
גלילה: הרה"ג ר' יואל ברמ"א פריעדמאן שליט"א - מו"ץ בקהלתינו הק' מאנסי.
מ'האט געענדיגט ארום 5:35, און דער רבי האט געוואונטשען גוט יו"ט פאר'ן גאנצן ציבור.

דער רבי איז אהיים לביתו נאוה קודש און קידוש געמאכט און אפגעראכטן די סעודת יו"ט.

ארום 11:00 אזייגער איז דער רבי אריינגעקומען אין ביהמ"ד הגדול צו תפילת שחרית,
צו פסוקי דזמרה און שחרית איז צוגעגאנגען הר"ר יואל בר"ש ווערצבערגער שליט"א.
ביי נשמת האט מען געזינגען די נוסחאות פון יו"ט, ימים נוראים און שבת, כנהוג.
ביי הויכע שמו"ע האט מען גע'דוכנ'ט, מ'האט געזאגט ותערב, און נישט געזאגט
רבוש"ע, מען האט געענדיגט שחרית והלל ארום 12:30, און דער רבי איז אריין לחדרו הפרטי.
אום 1:00 אזייגער איז דער רבי אריינגעקומען צו די הקפות, און אנגעהויבן אתה הראת.
פתיחת הארון: הרה"ח ר' יצחק וואלף פילאפף הי"ו - וומ"ס,
מען האט אנגעהויבן צו טאנצן ארום 1:15.

דער רבי האט משמיע געווען דברות קודש פיר מאל,
א) ידיד נפש אב הרחמן, אפילו מען טוט נאר א תנועה קלה אין עבודת השם איז עס זייער חשוב אין הימל,
אופן ב': הקב"ה האט אריינגעלייגט אין די טבע א מידת השתוקקות נישט צו זיין צופרידן מיט וואס מען האט, ביי גשמיות דארף מען זיך טאקע באניצן מיט מידת הסתפקות אבער ביי רוחניות דארף מען זיין בבחינת הולך און זיך הייבן העכער פון די יעצטיגע מדריגה, מען רעדט נישט פון די וואס לערנען נישט נאר מען רעדט פון די וואס לערנען זאלן לערנען מיט מער הבנה והתמדה ויגיעה.

ב) הגלה נא, פון מצות סוכה זעט מען די נחת רוח וואס הקב"ה האט ווען מען דינט הקב"ה מיט צרכי גשמיות און דער ריבוי כבוד שמים ווען אידן וואס זענען טרוד על המחי' ועל הכלכלה זענען עוסק בתורה מער ווי יושבי אוהל,
אופן ב': אפילו מען זאגט שכר מצוה בהאי עלמא ליכא אבער ווען מען איז מוסף מחול אל הקודש באקומט מען יא שכר אויף די וועלט, דארף מען ארויסברענגען לשבח וואס יעדע וואך זיצן דא הונדערטער אידן ביי שלו"ס און זענען מוסף מחול אל הקודש און אנטלויפן נישט פונעם שבת און אויף דעם איז דא שכר מצוה בהאי עלמא, ובפרט יעצט ווען מען האלט שוין קרוב צום אלף השביעי - יום שכולו שבת איז יעצט זיכער די זמן צו מוסף זיין מחול אל הקודש, און דער רבי האט געזאגט אז טראץ מען גייט זיך טאקע צויאגן מיט די הקפות איז עס אבער נישט מכח עצלות נאר מכח קדושת שבת קודש און בזכות דעם וועט נשפע ווערן די כח פון שבת אויף א גאנץ יאר.

ג) פאר די פערטע הקפה אויפן פסוק בראשית ברא אלקים, דורך די תורה ווערט בטל די טענה פון די מלאכים פון עתיד למיחטי קמיך און מעורר געווען אז יעדער לפי מדרגתו זאל זיך מקבל זיין צו מוסיף זיין בלימוד התורה.

ד) פאר די הייליגע זעקסטע הקפה - יסוד יוסף, די צ"א נענועים זענען מסוגל משפיע צו זיין פרנסה פארדעם איז מנהג רבותיה"ק זי"ע צו מאכן נענועים מיטן ספר תורה ביי די זעקסטע הקפה וואס איז אנטקעגן יוסף הצדיק צו משפיע זיין פרנסה,
יעצט בשעת די זעקסטע הקפה איז די צייט זיך צו מקבל זיין נזהר צו זיין בדיבור במעשה ובמחשבה ובפרט צו שטיין ווייט פון די טעכנעלאגישע כלים.

ביי די דריטע הקפה זענען די אויסלענדישע געסט מכובד געווארן מיט א ספר תורה,
צווישן די הקפות האט מען געזינגן די שטיקלעך פונעם הייליגן חרדים זי"ע בהתעוררות רב.
ביי די זעקסטע הקפה האט דער רבי געמאכט די נענועים מיטן ספר תורה כנהוג מיט גרויס
דביקות און בכיות דקדושה.
די זיבעטע הקפה האט דער רבי געטאנצן נאר אויפן באלעמער צוליב די שפעטע שעה, און ביי די שטיקל פון 'חזק מיחד עשר ספירות' איבערגענומען
זיין אייגענע ספר תורה, און געטאנצן מיט א ספעציעלע אש קודש וואס האט אריינגעשלעפט די גאנצע עולם אין א געוואלדיגע התלהבות און רגש דקדושה.
מען האט געענדיגט טאנצן די הקפות ארום 5:45, און דער רבי האט פארגעזאגט לדוד מזמור.

ביים לייענען האבן עולה געווען,
בעל קורא: משב"ק הרה"ח ר' יושע מענדלאוויטש הי"ו.
כהן: משב"ק הגה"ח ר' שמואל הכהן פריעדמאן הי"ו.
לוי: הר"ר יואל יודא רובינפעלד שליט"א - וומ"ס.
שלישי: משב"ק הרה"ח ר' יושע מענדלאוויטש הי"ו.
רביעי: משב"ק הרה"ח ר' חיים שלמה פישער הי"ו.
חמישי: רבינו שליט"א.
דער רבי איז תיכף אריבערגעגאנגען אין פאליש ווי מען האט ממשיך געווען מיט'ן ליינען,
דער רבי האט
עולה געווען חתן תורה, און אליינס געליינט די קריאה מיט א שטארקע התעוררות.
הגבה: הרה"ח ר' משה אהרן שטיינבערג הי"ו.
גלילה: הרה"ח ר' יואל ברמ"ד ווידער הי"ו.
חתן בראשית האט עולה געווען הרה"ח ר' אליעזר לעוו הי"ו - לאנדאן, מען האט אויסגעשפרייט א טלית כנהוג.
הגבה: הרה"ח ר' יואל ווערטהיימער הי"ו.
גלילה: הב' שניאור זלמן ב"ר יואל עקשטיין הי"ו.
מפטיר: הרה"ח ר' נפתלי הירצקא שטיין הי"ו.
הגבה: הרה"ח ר' יעקב ברמ"ח פריעדמאן הי"ו.
גלילה: הב' מרדכי בהר"ר חיים אליעזר דאווידאוויטש שליט"א.
מוסף האט געדאווענט פאר'ן עמוד הרה"ח ר' אברהם משה לעבאוויטש הי"ו, מ'האט משמח געווען כנהוג,
מען האט תיכף געדאווענט מנחה,
בעל תפילה: הרה"ח ר' אברהם משה לעבאוויטש הי"ו.
מען האט געענדיגט ארום 5:30 און דער רבי איז אהיים לביתו נאוה קודש באגלייט בשירה וזמרה.

פארנאכטס ארום 7:10 איז דער רבי אריינגעקומען צו קבלת שבת אינטן אינעם זאל בביתו נאוה קודש,
צו קבלת שבת איז צוגעגאנגען הרה"ח ר' נפתלי הירצקא שטיין הי"ו,
מען האט געזאגט הבו לה' פסוק בפסוק,
מען האט געענדיגט דאווענען ארום 7:45.
נאכן דאווענען איז דער ציבור אריבער זאגן גוט שבת און דער רבי איז ארויף לביתו נאוה קודש.

ארום 11:05 איז דער רבי אריינגעקומען צום שלחן הטהור בהיכל השלחנות.
מיט הגבהת הכוס איז מכובד געווארן נכד רבינו הרב דוד טייטלבוים שליט"א.
מיט כל מקדש האט דער רבי מכבד געווען הר"ר אברהם דוד וואגשאהל שליט"א - מאנסי.
מנוחה ושמחה: הרה"ג ר' מנחם זאב שטערן שליט"א - מו"ץ בקהלתינו הק' וומ"ס.
דערנאך האט דער רבי געזאגט תורה אויפן פסוק 'בראשית ברא אלקים' און ארויסגעברענגט אז דורכ'ן זיך הייבן ביי די ריקודין של שמחה ביי די הקפות ווערט מען נקנה בקנין הגבהה לעבד השם, און דער רבי האט מאריך געווען ארויסצוברענגען די רגשי הלב פון די פייערדיגע ריקודין של שמחה פון אזויפיל טויזענטער אידן.
נאך די תורה האט מען געזינגען אנא עבדא דקוב"ה און דער רבי האט זיך אויפגעשטעלט טאנצן באש קודש פאר א לענגערע צייט.
קה אכסוף: הרב ליפא הורוויץ שליט"א נכד הגה"צ רב דבית מדרשינו 15טע עוו. שליט"א.
ברכת המזון: הרב חיים מייזליש שליט"א בן הגה"צ גאב"ד דקהלתינו הק' מאנטריאל שליט"א.
דערנאך האט דער רבי דערציילט עובדות וסיפורים פונעם הייליגן קדושת לוי מ'בארדיטשוב זי"ע וואס די יארצייט איז געפאלן דעם זונטאג אסרו חג סוכות.
קה רבון עלם: הר"ר נפתלי הורוויץ שליט"א - לאנדאן.
מען האט אויפגעגעבן פירות און די פרישע חתנים זענען אריבער נעמען שיריים.
אויך איז פארגעקומען די שלום זכר ביי ר' יחזקאל שרגא ברמ"ש ווערצבערגער הי"ו.
אז ביום השביעי: הרה"ג ר' עזרא דוד כאירה שליט"א - ארגענטינע.
מען האט געענדיגט די טיש ארום 1:15.
=וביום השבת=

דער רבי איז אריינגעקומען צום דאווענען ארום 10:10
ברכות ופסוקי דזמרה: הרה"ג ר' הלל ראבינאוויטש שליט"א.
דער רבי איז צוגעגאנגען צום עמוד צו תפילת שחרית.
ביים ליינען זענען נתכבד געווארן:
הוצאה והכנסה: הרב מרדכי יודא בהרה"ג ר' יואל העניך הורוויץ שליט"א.
פסוקי שמע ישראל: הרב חיים בהרה"ג ר' אברהם מאיר האלבערשטאם שליט"א.
כהן: נכד רבינו הרה"ג ר' יואל גלאנץ שליט"א - מו"ץ בקהלתינו הק' וומ"ס.
לוי: הרה"ח ר' יחזקאל שרגא ברמ"ש ווערצבערגער הי"ו.
שלישי: הרה"ג ר' בעריש קאהן שליט"א - ראה"כ אנטווערפען.
רביעי: הר"ר מאיר יוסף בר"א גראס שליט"א - וומ"ס.
חמישי: הרה"ח ר' אליעזר ווייס הי"ו.
דער רבי האט קורא שם געווען לרגל הולדת הבת אצל: ר' אביעזר פריעדמאן הי"ו.
שביעי: הרה"ח ר' משה אברהם לעפקאוויטש הי"ו - וומ"ס.
אחרון: הרה"ח ר' זלמן לייב גליק הי"ו - וומ"ס.
מפטיר: הרה"ח ר' נפתלי הירצקא שטיין הי"ו.
הגבה: הרב נפתלי בהרה"ג ר' יואל העניך הורוויץ שליט"א.
גלילה: הרב הלל בהרה"ג ר' אברהם מאיר האלבערשטאם שליטא - ב"פ.
נאכן ליינען האט רבינו שליט"א ראש חודש געבענטשט מיט גרויס התעורורות.
צו תפילת מוסף איז צוגעגאנגען הרה"ח ר' אליעזר ווייס הי"ו.
פתיחה צו אנעים זמירות: הרה"ח ר' יושע גאנץ הי"ו - מאנסי.
מען האט געענדיגט ארום 12:55.

דער רבי איז אריינגעקומען צו תפילת מנחה ושלו"ס ונעילת החג ארום 6:40.
צום עמוד איז צוגעגאנגען הרה"ח ר' יוסף משה אונגאר הי"ו - מאנסי.
פתיחה: הרה"ח ר' משה טאבאק הי"ו - מאנסי.
ביים ליינען האבן עולה געווען,
כהן: הרה"ח ר' יוסף אהרן רובין הי"ו - וומ"ס.
לוי: הרה"ח ר' חיים העללער הי"ו - וומ"ס.
שלישי: הרה"ג ר' יוסף לייב קאהן שליט"א.
דער רבי איז געגאנגען הגבה.
גלילה: הרה"ח ר' שלמה יואל פריעדמאן הי"ו - ב"פ.
ביי שלו"ס האט דער רבי מכבד געווען מיט אודה הרה"ג ר' יצחק צבי ווייס שליט"א - אב"ד איהעל ב"פ.
שיר המעלות: הרה"ג ר' אברהם וואלף שנעבאלג שליט"א.
ידיד נפש: הרה"ג ר' בעריש קאהן שליט"א.
קל מסתתר: הר"ר יעקב הערש פריעדמאן שליט"א - וומ"ס.
מען האט מאריך געווען מיט מערערע ניגונים לכבוד יו"ט, אזוי אויך האט הרה"ח ר' הערשל קאהן הי"ו פארגעזינגען די ניגונים המיוחסים להרה"ק מ'בארדיטשוב זי"ע,
דער רבי האט געבענטשט על הכוס.
נאכן בענטשן האט דער רבי געזאגט ברוך המבדיל און משמיע געווען די דברות קודש אויפ'ן מייק,
דער רבי האט זיך געשטעלט אויפן פסוק 'בראשית ברא אלקים' און ארויסגעברענגט אז די פריערדיגע צדיקים האבן געעפנט א צינור המשפיע פאר די שפעטערדיגע דורות אז אפילו אויב מען איז נישט ראוי זאל מען קענען צוקומען צו די השפעות פון אמאל, און דאס איז אונזער ירושה פון אבותינו ורבותינו הק' זי"ע, ובפרט די געהויבענע צווייטע טעג סוכות וואס אזויפיל אידן האבן געפראוועט און געטאנצן שעות ארוכות און טראץ וואס אונז האמיר נישט אינזין אלעס וואס זיי האבן אינזין געהאט טאנצט מען על דעתם און עס קומען אראפ אלע גוטע השפעות, און דער רבי האט מסיים געווען מיט ברכות לרוב פארן גאנצן ציבור.
מען האט ממשיך געווען מיט ניגוני יו"ט, דערנאך האט דער רבי פארגעלערנט די גמרא מסכת ברכות בבלי וירושלמי כנהוג,
מען האט ממשיך געווען צו זינגען, און דער רבי האט זיך אויפגעשטעלט טאנצן מיט א שטארקע התלהבות.
דער רבי האט פארגעזאגט דריי מאל לשנה הבא בירושלים.

נאכ'ן געהויבענעם טיש האט דער רבי געדאווענט מעריב.
בעל תפילה: חדב"ן הגה"צ רב דביהמ"ד ישמח משה שליט"א.
נאך מעריב האט דער רבי געמאכט הבדלה.

נאך הבדלה איז פארגעקומען דער 'מעמד ברכת הקודש' פארנט פון ביהמ"ד הגדול במעמד אלפי אנשי שלומינו אנשים נשים וטף.
מען האט געזינגען ניגוני שמחה, דערנאך האט דער רבי געוואונטשן די ברכות הקודש און ארויסגעברענגט אז מען דארף זען צו מיטנעמען מצות סוכה אין שטוב אריין און זיך פירן בקדושה סיי בעניני צניעות און סיי מיט אלע אנדערע ענינים סיי די מענער און סיי די פרויען און אנגעוואונטשן ברכות לרוב,
מען האט ממשיך געווען מיט עטליכע ניגונים, מען האט געענדיגט ארום 10:15,

דער רבי איז אריבער אין שטוב פון הרה"ח ר' בנציון קליין הי"ו און מנחם אבל געווען הרה"ח ר' מרדכי יודא שווארטץ הי"ו היושב ע"פ אשתו ע"ה און דערנאך אהיים לביתו נאוה קודש.
אין שטוב זענען אריין הונדערטער אנ"ש תושבי ארה"ק און אייראפע זיך צו געזעגענען נאכן וויילן אויף יו"ט בצל הקודש.

ארום 11:30 איז פארגעקומען די כתיבת האותיות פאר די ספר תורה וואס איז געשריבן געווארן דורך משפחת הרה"ח ר' הלל יושע קליין ע"ה און איז אריינגעגעבן געווארן נעכטן זונטאג אין ביהמ"ד הגדול אין וומ"ס,
דער רבי האט אריינגעשריבן עטליכע אותיות און אנגעוואונטשן פאר די גאנצע משפחה.