ערשטמאליגע כינוס העסקנים כנישתא ד'קהלה' שאפט נייע רעוואלוציע אינעם מערכת הקודש מול פגעי ונסיונות הזמן
קְהָלָהָ - ק'הילות ה'קודש ל'עניני ה'טעכנעלאגיע
פארגאנגענעם דאנערשטאג איז געווען גאר א היסטארישע טאג ביים יהדות הגולה, ווען עס איז געשאפן געווארן דער אנהייב צו א לאנג טערמיניגע פראיעקט, וואס וועט בעז"ה טוישן די מאפע פון די מערכת הקודש למען קדושתן וטהרתן של ישראל, און די פייערדיגע מלחמה קעגן די פגעי ונסיונות הדור.
דאס איז די ערשטמאליגע צוזאמקום פון הונדערטער עסקנים חשובים פון פילע קהילות הקודש ברחבי ניו יארק, ניו דזשערסי און קאנאדע, וואס האבן זיך אלע פאראייניגט תחת קורת גג אחד, פאר לאנגע שעות של קורת רוח בשבת אחים גם יחד, צו מקיים זיין דעם 'איש את רעהו יעזורו ולאחיו יאמר חזק' צוזאמען מטכס עצה צו זיין און שאפן פרישע רעוואלוציעס אין דעם פעלד וואס אלע זענען עוסק יעדער אין זיין קהילה און קרייז.
דער מעמד האט געטראגן עטליכע וויכטיגע צילן, אבער בעיקר איז געווען דער הויפט מטרה, דאס עצם פאקט אז עס קומען זיך צוזאם דוקא די 'עסקנים' פון די קהילות, וועלכע זענען די וואס שטייען אויפ'ן פראנט און פירן אויס די פאקטישע טיילן פון די מערכת הקודש, און מען האט די געלעגענהייט זיך צו באקענען און מיטטיילן עצות, אינפארמאציע, חיזוק, און ערפארונג פון די אייגענע עקספיריענס, יעדער פארציילט און טיילט מיט וואס ער טוט אין זיין קהילה, דאס ברענגט א קנאת סופרים, ווען יעדער לערנט זיך אפ איינער פון צווייטן, און צו די זעלבע צייט א שטארקע חיזוק צו באקומען גוטע עצות און מהלכים וויאזוי זיך צו באגיין אין יעדע הינזיכט.
צו דעם צוועק איז פארגעקומען די גרויסע כינוס העסקנים פארגאנגענעם דאנערשטאג שמיני העעל"ט, אין די רחבות'דיגע "גרענד איווענט" זאלן אין פעסעיק ניו דזשערסי, וואו קרוב צו הונדערט פופציג עסקנים פון איבער דרייסיג קהילות איבער אמעריקע און קאנאדע זענען זיך צוזאמגעקומען כאיש אחד בלב אחד. דאס האט אריינגענומען עסקנים פון די קהילות הקודש - אמונת ישראל, באבוב, באבוב 45, באיאן, בעלזא, גור, וויזשניץ ב"פ, וויזשניץ וויליאמסבורג, וויזשניץ מאנסי, וויזשניץ קייאמישע, וויען, ויזניץ ב"ב, ויזניץ מרכז, טאהש, מאכנובקא בעלזא, סאטמאר וומסב"ג, סאטמאר ק"י, סלאנים, סקווירא, פאפא, צאנז, צאנז קלויזענבורג, קאסאן לינדען, תולדות יהודה-סטוטשין, תולדות מרדכי, ראחמיסטריווקא, ראחמיסטריווקא לינדען, ראחמיסטריווקא ספרינג וואלי, און נאך.
דעם כינוס איז געווען גאר קונצליך אויסגעשטעלט, אויסנוצנדיג יעדע מינוט ביז צום מאקסימום, מיט רייכע פאנעלן און דרשות פון רבנים און עסקנים פון אלע קהילות, ווי אויך זענען אנוועזנד געווען די גרעסטע פילטער ריזן און טעכנעלאגיע קאמפאניס וואס שטעלן צו פילטער'ס און כשר'ע דעווייסעס פארן היימישן ציבור, און פארגעשטעלט פאר די חשוב'ע עסקנים וואו זיי האלטן מיט זייער פארשריט.
אין די יעצטיגע טעג דערקענט זיך שוין די ערשטע פירות פון דעם העכסט געלונגענעם כינוס העסקנים, ווען פארשידענע קהילות האבן תיכף געגרונדעט נייע ועדים און אויפגענומען פרישע כוחות צו די עסקנים באזע, נאכ'ן באקומען די קלארע אנווייזונגען וואס און וויאזוי צו פירן די הייליגע מערכה, וואו מען דארף בעיקר אינוועסטירן די כוחות, און וואס עס זענען די פראקטישע מיטלען דערצו.
מטעם עסקני 'קהלה' ווערט אין די טעג איינגעפעדעמט נייע מהלכים צו האלטן קשר בקביעות צווישן די עסקנים, מיט מערערע אסיפות בקביעות און פעולות למעשה צו גיין מחיל אל חיל, מוסיף צו זיין בעבודת הק' ביתר שאת וביתר עוז אין אלע אספעקטן פון אויפוואכונג און התעוררות, טעכנישע הילף און קבלות, תקנות און אינפארסירונג, פאר אלע שיכטן אין די קהילות: בעלי בתים ואברכים, בחורי חמד, בנים ובנות, אן מיטן כח הרבים פון כל "קהלה" קדישא וועט מען אינאיינעם מרבה זיין פעלים למען טהרתן וקדושתן של ישראל, ביז מען וועט שוין זוכה זיין צום גענצליכן ביטול כח הטומאה, בביאת גואל צדק במהרה
- Copy of AAB04318.jpg (324.64 KiB) געזען געווארן 76 מאל
