אידטיש

דער רבי האט געדאווענט שחרית אין ביהמ"ד נועם אלימלך ליזענסק אינאיינעם מיט ישיבה קטנה סניף אהבת התורה פון וומ"ס בהנהלת הר"ר יחיאל מיכל סעקולא שליט"א.
פארן דאווענען האט דער רבי געלייגט תפילין פאר די בר מצוה בחורים,
ב"ר יואל ב"ר זכרי' ראטה הי"ו.
ב"ר אברהם בנימין זאב שפיטצער הי"ו.

נאכן דאווענען זענען אריין בחדר הפרטי די תלמידי שיעור א' אינאיינעם מיטן מגיד שיעור נכד רבינו הרב יואל אשכנזי שליט"א ווי דער רבי האט פארהערט די בחורים אויף שו"ע הלכות ברכת הפירות וואס מען לערנט אין ישיבה,
דערנאך איז פארגעקומען א מסיבת לחיים בהיכל הביהמ"ד,
מען האט געזינגען עטליכע ניגונים און דער רבי האט געמאכט א לחיים און אנגעוואונטשן פאר די מגידי שיעור, פאר די בר מצוה בחורים, און פאר אלע תלמידי הישיבה,
דער רבי האט משמיע געווען דב"ק, דער רבי האט זיך געשטעלט אויפן פסוק 'כי מראש צורים אראנו' און ארויסגעברענגט אז די בחור'ישע יארן זענען די עיקר יארן פון די לעבן און מען דארף זען צו קונה זיין א 'אהבת התורה', און ארומגערעדט דברי הדרכה און מסיים געווען בברכת קדשו,
דערנאך האט דער רבי פארטיילט ספרו לב אהרן במדבר פאר אלע תלמידי הישיבה,
דערנאך האט דער רבי אהיימשפאצירט לביתו נאוה קודש.

בביתו נאוה קודש איז אריין הרה"ח ר' אברהם בראך הי"ו - מראה"ק בוומ"ס וועלכע איז נארוואס צוריקגעקומען פון זיין באזוך אין ארה"ק און האט איבערגעגעבן א באריכט פון די בוי ארבעט ביים בנין בית מדרשינו המפואר החדש בירושלים עיה"ק ווי מען האט די אנהייב וואך אנגעהויבן די פאקטישע גראב ארבעט אויפן שטח הביהמ"ד,
דער רבי האט זיך נאכגעפרעגט אויף פארשידענע פרטים און אנגעוואונטשן ברכת הקודש.

א גוט שבת.
~~

דער רבי האט געדאווענט שחרית אין ישיבה גדולה סניף קדושת יואל.
פארן דאווענען האט דער רבי געלייגט תפילין פאר די בר מצוה בחורים,
ב"ר יחיאל יאיר ניימאן הי"ו.
ב"ר חיים צבי ב"ר אהרן יוסף ווייס הי"ו.
ב"ר יושע גאנז הי"ו.
ב"ר מנחם מענדל סאמעט הי"ו.
ב"ר יואל ב"ר שמואל זאנוויל פאלאטשעק הי"ו.
נאכן דאווענען האט דער רבי פארגעלערנט א תהילים שיעור אויף קאפיטל כ"ב פסוק א'.
דערנאך איז פארגעקומען א לחיים מיט די בר מצוה בחורים בהיכל הביהמ"ד לרגל די יומדה"ק פונעם הייליגן אור החיים הק' זי"ע,
דער רבי האט געמאכט א לחיים און משמיע געווען סיפורי קודש פאר א לענגערע צייט.

אין די פארמיטאג שעות איז פארגעקומען א אסיפה בביתו נאוה קודש אינאיינעם מיט די וועד וואס דער רבי האט ממנה געווען צו טרעפן לעזונגען פאר די פראבלעם פון די טייערע דירות אין ק"י,
די אסיפה קומט נאך העפטיגע באראטונגען און אסיפות ווי די געטרייע חברי הוועד האבן מטכס עצה געוועהן איבער פילצאליגע אפציעס אויפצוקומען מיט פארשידענע מהלכים צו ארויפברענגען ביליגע דירות אויפן מארקעט, עס איז אנוועזנד געווען די חברי הוועד ה"ה הרה"ח ר' יואל בערנאטה הי"ו, הרה"ח ר' ישעי' ווערצבערגער הי"ו, הרה"ח ר' חיים שלמה קרויס הי"ו, אינאיינעם מיט די געטרייע ווילידזש אדמיניסטראטער העסקן הרה"ח ר' גדלי' סעגעדין הי"ו און העסקן הרה"ח ר' אברהם יושע גלאנץ הי"ו,
די עסקנים האבן פארגעלייגט אלע אפציעס און לעזונגען מיט פאקטישע פארשריט פונעם פראיעקט און דער רבי האט ווארעם אנגעוואונטשן ברכת קדשו.

פארנאכטס האט דער רבי מסדר קידושין געווען ביי די חופה פון די מחותנים הרה"ח ר' יואל בר"א קויפמאן הי"ו און הרה"ח ר' אברהם שמואל בראך הי"ו אין די זאלן פון כינור דוד.

ארום 7:30 איז דער רבי אנגעקומען צום מעמד קביעות מזוזה וחנוכת הבית אין ביהמ"ד החדש 'אמרי נועם' אויף די דזשיקוב גאס בשכונת דברי יואל,
דער רבי האט צום ערשט קובע געווען א מזוזה אויפן הויפט אריינגאנג און דערנאך אריין אינעם ביהמ"ד ווי דער רבי האט זיך אומגעקוקט אויפן גאנצן ביהמ"ד,
דערנאך איז פארגעקומען א מסיבת לחיים בהיכל הביהמ"ד,
עס האט אויפגעטרעטן הרה"ח ר' דוד עקשטיין הי"ו - מראה"ק,
מען האט געזינגען עטליכע ניגונים און דער רבי האט געמאכט א לחיים און ווארעם אנגעוואונטשן פאר הגאון הגדול הדומ"ץ שליט"א פאר הרה"ג ר' ישראל בער שטיין שליט"א - דומ"ץ הביהמ"ד, פאר הרה"ח ר' גדלי' סעגעדין הי"ו וועלכע האט אסאך ארויסגעהאלפן פארן ביהמ"ד, און פארן גאנצן ציבור,
דערנאך האט דער רבי משמיע געווען דב"ק ווי דער רבי האט ארויסגעברענגט די חשיבות פון געבן די נעמען פון די גאסן נאך שטעט פון די אלטע היים וואס איז מעורר די זכות פון די צדיקים וואס האבן געוואוינט דארט, סיי די נאמען 'דזשיקוב' און סיי די נאמען פונעם ביהמ"ד 'אמרי נועם' וואס איז מעורר די גרויסע צדיקים לבית דזשיקוב, און אזוי אויך די נאמען פונעם שכונה 'שכונת דברי יואל' לשמו ולזכרו פון רביה"ק זי"ע, וואס דאס וועט אוודאי מעורר זיין אז די מתפללי הביהמ"ד און די תושבי השכונה זאלן זיך פירן ווי עס פאסט בתורה עבודה וגמילות חסדים, און דער רבי האט ארומגערעדט בשבח פונעם חשוב'ן דומ"ץ הביהמ"ד וואס מען האט אויפגענומען הרה"ג ר' ישראל בער שטיין שליט"א וואס שמו הולך לפניו בהוראה וכו' און געוואונטשן הצלחה בכל ענינים ושלא יצא שום מכשול מתחת ידיו, און דער רבי האט מסיים געווען בברכת קדשו פארן גאנצן ציבור.

עס האט זיך פארמירט א שיינע שמועס מיט די אנוועזנדע רבנים שליט"א און דער רבי האט ממשיך געווען מיט סיפורי קודש פונעם הייליגן אמרי נועם מדזשיקוב זי"ע,
מען האט געענדיגט ארום 8:00 אזייגער.

זמני כניסה איז געווען פון 8:05 ביז 12:50 אויפדערנאכט בביתו נאוה קודש אויף איהעל קט.

ארום 9:15 האט דער רבי געדאווענט מנחה בביתו נאוה קודש.

ארום 10:30 האט דער רבי געליינט די תנאים פון די מחותנים הרה"ח ר' יעקב יחזקי' מארקאוויטש הי"ו און הרה"ג ר' חיים משה לעוו שליט"א - ב"פ,
און פון די מחותנים הרה"ח ר' יוסף יואל לעווי הי"ו און הרה"ח ר' יעקב ברי"מ פריעדמאן הי"ו,
אין די תנאים זאלן בביתו נאוה קודש.

בעת די זמני כניסה איז אריין בקודש פנימה הגאון הגדול הדומ"ץ שליט"א זיך געזעגענען לקראת דער רבי'ס אפרייזן מארגן מאנטאג למקום הנופש אין ניו העמפשיר,
דערביי האט דער דיין שליט"א געגעבן א קוויטל און זיך מזכיר געווען, און געבעטן דער רבי זאל אים אינזין האבן ביים נסיעה לעיר האבות סיגוט אין ביים ציון פונעם הייליגען ישמח משה זי"ע ביומא דהילולא קדישא.
אויך איז פארגעקומען א מסיבת לחיים בקודש פנימה לרגל די שמחת החתונה פון הכלה בת הרה"צ ר' ישראל שמעון מאיר לייפער שליט"א - אדמו"ר מטעמעשוואר ק"י עב"ג החתן בן הרה"צ ר' יצחק דוד טווערסקי שליט"א - אדמו"ר מטריסק טאלנע בן האדמו"ר מטריסק לאנדאן שליט"א,
עס האט זיך פארצויגן א שיינע שמועס איבער סיפורים פון די צדיקים לבית טריסק, און דער רבי האט געמאכט א לחיים און אנגעוואונטשן פארן חתן, פאר די חשובע מחותנים שליט"א, פארן זיידן האדמו"ר מטריסק לאנדאן שליט"א, און פאר די גאנצע משפחה.

דער רבי האט געדאווענט מעריב ארום 12:50.

א גוטע נאכט.
~~