ועד הדירות אימעיל:
אשר יוציאם ואשר יביאם ולא תהיה עדת ה' כצאן אשר אין להם רעה:
כ"ק מרן רבינו שליט"א ביים דינער השנתי, שטעלט אוועק דעם מאקסימום מארקעט פרייז פאר דירות אין "קרית יואל המורחבת"
'צענטער פרייז' שוין א פאקט! לעצטע וואך אנגעהויבן סיינען קאנטראקטס פאר $300 א סקווער פיס
'מורחבת פרייז' ווערט אוועקגעשטעלט דורכ'ן יושר'דיגער קונים מארקעט, $250 א סקווער פיס!
פרייז אין קרית יואל ווילעדזש:
דער רבי האט מכריז געווען אז עס פארקויפן זיך שוין היינט די דירות פון $300 א סקווער פיס ב"ה, מען האט לעצטע וואך שוין אנגעהויבן פאקטיש שרייבן קאנטראקטס אין שכונת ויואל משה
רבי ערקלערט: ווער עס צאלט מער דערלייגט געלט, ער וועט עס נישט קענען פארקויפן פאר אזויפיל, דער מארקעט פרייז איז געטוישט, און מען בלייבט שטיין על המשמר!
מורחבת פרייז $250:
אין אלע שטחים ארום קרית יואל ווי סאוט בלומינגראוו אא"וו, האט מען געקויפט ריזיגע שטחים פאר אזוי ביליג ווי אונטער $5-10 פער סקווער פיס, דעריבער וועט דער דירה פרייז זיין מיט $50 ביליגער! $250 א ס"פ
מעסעדזש פאר אינוועסטירער:
דער רבי איז מכריז אז אינוועסטירער פון דער פרעמד וועלכע קלערן אז דא קען מען קומען פארדינען גרויס געלט, זאלן וויסן אז זיי דארפן זוכן אנדערע מקומות, ווייל דא וועט מען האלטן אן אויג אויך בעתיד און נישט לאזן ארויפציען די פרייזן
אנעקסעישן:
קרית יואל ווילעדזש ארבעט אויף אנעקסעישן סיי פון וואודבורי, און סיי שפעטער פון מאנרא ביי סעווען ספרינגס, און מיט קרית יואל'ס הארעוואניע פאר אינפראסטרוקטור איז בדרך הטבע דא א פאטענציאל פון אלפים דירות פאר אונז און אונזערע קינדער, בס"ד
שטייענדיג געציילטע חדשים נאכדעם וואס מרן רבינו שליט"א האט אוועקגעשטעלט א פרייז פון $300 א סקווער פיס פאר אלע נייע פראיעקטן וועלכע האלטן ביים ארויסנעמען פערמיטן אין ווילעדזש אף קרית יואל, האט דער רבי שליט"א אויסגערופן דעם מושצ"ק ביים דינער פאר די מוסדות הק', אז דער געשעעניש איז שוין ב"ה א פאקט! ווען "שכונת ויואל משה" האט לעצטע וואך אנגעהויבן פאקטיש שרייבן קאנטראקטס מיט אירע פאטענציאלע קונים וועלכע רעזערווירן דירות אין די שכונה, אין פראיעקט #3 און אין פראיעקט #4, א סך הכל פון 1,000 דירות פאר דעם ביליגן פרייז בס"ד!
רעדנדיג איבער די וואוקס פונעם הייליגן שטאט, און זאגנדיג אז די מוסדות הק' אין קרית יואל זענען אויסגעוואקסן זאגאר צו זיין "די גרעסטע מוסדות איבער די וועלט" נישט בלויז באיכות מיט די תוכן הלימודים נאר אויך בכמות מיט'ן מספר פון נישט ווייניגער ווי 12,500 תשב"ר בלי עין הרע, איז דער רבי געגאנגען ווייטער מיט די נושא פון דירות פרייזן אויף וואס מען האט שוין ב"ה באוויזן א רעוואלוציע שאין כדוגמתו, כן יעזור ה' להלאה, צו קענען נאכקומען די וואוקס פון די שטאט און צושטעלן פאר'ן ציבור גענוג דירות פאר נארמאלע אפארדעבל פרייזן.
רבינו שליט"א האט ארומגערעדט איבער די שווערע ארבעט וואס איז געווארן אריינגעלייגט און איבער די פארשריט וואס מען זעט ב"ה, באדאנקענדיג די חשוב'ע בעלי בתים אינעם ועד הדירות, וועלכע גיבן אוועק אזויפיל כוחות צו באגלייטן דעם אונטערנעמונג, און דער רבי האט קלארגעמאכט אז אויך ער זעלבסט איז ווייטער א חלק דערפון, און וועט ווייטער פארזיכערן אז יעדער אן אויסנאם זאל זיך בע"ה צושטעלן דערצו, לטובת אנשי שלומינו תושבי קרית יואל.
אין די צייט וואס קרית יואל שטייט ב"ה ארויס פון אלע אנדערע אפסטעיט מניציפאליטעטן צו אהערשטעלן אויסנאמליכע פראיעקטן וואס ערמעגליכן דאס בויען טויזנטער דירות, ווען מען שניידט היינט פירות פון די יארן לאנגע טעג און נעכט הארעוואניע פאר סוער און וואסער, און מען ארבעט ווייטער העפטיג אויף פאראויס צו קענען ווייטער באווייזן דאס אומגלויבליכע, ברוב סיעתא דשמיא ובזכותו של אותו זקן מייסד העיר זי"ע, איז ב"ה דא די מעגליכקייט צו האלטן די מארקעט רואיג, ווי דער רבי האט פראקלאמירט אז יעדער זאל וויסן אז דער דרך הטבע איז מיט אונז, בסיעתא דשמיא וועט זיין דירות פאר זיך, פאר די קינדער וואס מען מאכט חתונה, און מען דארף נישט פאניקן און כאפן טייערע דיעלס.
$300 די וואך געווארן א פאקט!
דער רבי האט ארויסגעברענגט אז טראץ וואס עס איז שוין פארלאפן עטליכע חדשים פונעם אנהויב פון די רעוואלוציע, האט מען אבער געמוזט געבן צייט פאר די דעוועלאפער צו איבערמאכן זייערע פלאר פלענס צו בויען אויף אן אופן וואס עס זאל אוועקפאלן ווייניגער בילדעבל סקווער פיס אא"וו, אזוי אז דער ביליגער פרייז זאל טאקע קענען אויסגעפירט ווערן און עס זאל נאך בלייבן גענוג ריוח פאר'ן דעוועלאפער אויך.
אצינד אבער, האט דער רבי מבשר געווען, האט מען שוין אנגעהויבן די פאקטישע קאנטראקטס, און מערערע אידן האבן שוין ב"ה זוכה געווען דערצו, און עס וועט אזו יגיין ווייטער און ווייטער בעז"ה.
די רעדע איז פון די 1,000 דירות פון "אפסקעיל דעוועלאפערס" אין שכונת ויואל משה, וואס דער הויפט דעוועלאפער און נדיב הרה"ח ר' עקיבא צבי קליין הי"ו האט איבעראשט דעם ציבור לעצטן כ"ו אב מיט די מעלדונג אז טראץ דאס פארציכטן אויף די פארדינסטן ביים ערשטן האלב פון די שכונה מיט'ן אנהאלטן די בעפאר-קאוויד פרייזן און קלאוזן די דירות פאר אונטער די קאסט פרייז זיך האלטנדיג צום קאנטראקט פון ארום $200 א ס"פ, וועט יעצט די צווייטע טייל פונעם שכונה ווידער זיין א נדבה פאר'ן ציבור צו מינימיזירן די רווחים און אלעס וועט פארקויפט ווערן פאר בלויז $300 א ס"פ.
יענער מעלדונג האט צעמענטירט דעם מארקעט. עס איז 1,000 דירות וואס בויען זיך שוין בקרוב ממש; עס איז א דעוועלאפער וואס האלט ווארט; דאס האט געשאקלט די שטאט און געטוישט די מארקעט אויף אייביג. די פרייז פון $300 איז געווארן א פאקט. ברוב סיעתא דשמיא.
אצינד, לעצטע וואך, האט דער דעוועלאפער ערהאלטן די נייע פלאר-פלענס פונעם ארכיטעקט, און תיכף ומיד האט מען אנגעהויבן צוריקרופן די וועלכע האבן זיך געמאלדן, און די ערשטע עטליכע אידן האבן שוין געמאכט זייער הסכם צו זיין דער פאטענציאלער קונה פאר דעם אפארדעבל פרייז, טראץ אלע געוואלדיגע באנוסעס און באקוועמליכקייטן וואס דער דעוועלאפער און די שכונה שטעלט פאר!
דערמיט קען מען שוין זאגן ווי דער רבי האט דערקלערט, אז דער פרייז איז שוין א פאקט. דעריבער, ווער עס צאלט יעצט מער דערלייגט פשוט זיין געלט. ער וועט נישט קענען פארקויפן זיין דירה ווייטער פאר דעם פרייז וואס ער קויפט עס, ער צאלט מער ווי די פשוט'ע ווערד אינעם יעצטיגן מציאות.
עס זענען דא נאך דעוועלאפמענטס וועלכע האבן זיך שוין צוגעשטעלט, אבער נישט אלע זענען שוין גרייט, און נישט אלע האבן גענוג דירות אוועילעבל, אבער מיט די אנהויב פון פאקטיש שרייבן קאנטראקטס אויף א "1,000 דירות מארקעט" אין א דעוועלאפמענט וואס שטעלט ב"ה צו די שענסטע און בעסטע, איז דער רעוואלוציע ב"ה א געשעענע פאקט! תלי"ת.
די פלענער און ארבעט פון די הנהלת הקרי'
דער רבי האט באזונדער ערווענט דעם גרויסן עתיד וואס קרית יואל שטעלט אי"ה פאר לטובת חסידי סאטמאר ותושבי העיר, ווען מען שטייט אצינד העפטיג אינמיטן די ארבעט צוצוגרייטן אן אנעקסירונג צום קרית יואל ווילעדזש, צו קענען בויען נאך טויזנטער דירות אויפ'ן קרית יואל'ער שטייגער מיט קרית יואל'ס אינפראסטרוקטור מעגליכקייטן בס"ד.
צוערשט גרייט מען זיך צו ארבעטן אויף אן אנעקסעישן פון די וואודבורי זייט, און דאן ביז אפאר יאר ווערט אפן די אפציע צו אנעקסירן אויך פון מאנרא, די סעווען ספרינגס זייט.
ווי פארשטענדליך איז אזא אנעקסירונג אנגעוויזן אין ווייטערדיגע וואסער און סוער, צו קענען אדורכגיין די שטודיעס און אויפווייזן די מעגליכקייטן צו בויען אינעם עתיד, און אויך טאקע צו קענען פאקטיש צושטעלן טויזנטער דירות וואס ווערט נאר ערמעגליכט דורך ארבעטן פון פאראויס אויף גענויע פלענער וויאזוי צו קענען ערהאלטן די נויטיגע קאונטי און סטעיט פערמיטן און פארמאכן די נויטיגע אינפראסטרוקטור, וואס דאס איז אייגנטליך די יעצטיגע פאזע ווען די ווילעדזש באאמטע ארבעטן טאג און נאכט אויף די רעוואלוציאנערישע אונטערנעמונגען פאר די ביידע.
וואסער איז שוין באקאנט די ארבעט אויפ'ן פייפליין וועלכע האט שוין געראטעוועט דעם יעצטיגן מציאות און ערמעגליכקט די יעצטיגע הרחבה פון דירות ב"ה אדאנק די ניו ווינסאר רעזערווארן וועלכע פליסן שוין היסטאריש אינעם פייפליין, און דארף נאך ממשיך זיין צו קענען ווערן פאקטיש אנגעהוקט אינעם ניו יארק סיטי-רעזערוואר, נאכ'ן אויפבויען א מולטי מיליאן דאלארדיגע פילטערינג פלענט.
סוער גייט אן אין די לעצטע חדשים שטילע אבער גאר ערנסטע ארבעט מיט די קאונטי, וואו עס איז שוין ב"ה אדורך אן אפשטימונג און באשטעטיגונג אז די קאונטי זאל בויען א פרישע סוער פלענט פאר אונזער סוער דיסטריקט, א גאר ערנסטע מילשטיין וואס רוקט זיך בע"ה פאראויס, און וועט נאך ווערן מיטגעטיילט מיט'ן ציבור, בפרט אז מען ברויך אסאך תפילות אז ס'זאל טאקע גיין אלעס כשורה.
דערמאנענדיג די אנעקסעישן האט דער רבי שליט"א ערווענט די פריער דערמאנטע נקודה, אז דאס באדייט זייער קלאר בעז"ה אז מען דארף נישט פאניקן וועגן דירות, מיט'ן אויבערשטנס הילף טוט קרית יואל איר ארבעט צו קענען האבן די סופליי פאר'ן וואקסנדער פארלאנג, פאר אונז און פאר אונזערע קינדער, להרחיב גבולי הקדושה לויט'ן געוואלדיגן וואוקס פון חסידי סאטמאר יראים ושלמים תושבי קרתא דשופריא קרית יואל, בליעה"ר.
קרית יואל המורחבת, $250!
דערביי האט דער רבי מאריך געווען איבער'ן מציאות אז די שטאט ברייטערט זיך ב"ה אויס אין אלע זייטן, ווי דער רבי האט עס אנגערופן מיט'ן נאמען "קרית יואל המורחבת", און אידן בעלי בתים קויפן זיך איין שטחים אין די ארומיגע ווילעדזשעס, און טייל הייבן שוין אן בעז"ה צו בויען דערויף דירות.
דאס איז ספעציעל אקטועל ווען אזויפיל ווי 600 דירות אינעם ווילעדזש אף סאוט בלומינגראוו האבן שוין יעצט באקומען אן אפראוועל פון די סטעיט פאר א סוער פלענט און פאר וואסער קוועלער, אזוי אז זיי קענען ב"ה גיין פאראויס מיט די בוי ארבעט, און די זעלבע רוקן זיך פאראויס נאך דעוועלאפמענט'ס אין טשעסטער, בלומינגראוו, מאנרא, און נאך.
דערפאר האט דער רבי אצינד דערקלערט, אז דער יושר'דיגער פרייז פאר דירות אין קרית יואל המורחבת, וואס נעמט אריין אלע ארומיגע שטחים אויסער די ווילעדזש אף קרית יואל, ווערט באשטימט אויף $250 א סקווער פיס, מאקסימום פרייז! זינט עס איז נישטא קיין רעכט צו בעטן מער ווי דאס, לויט'ן חשבון פון די פרייזן וואס מען האט אוועקגעשטעלט אין קרית יואל.
דער רבי האט מפרט געווען בפרטיות מיט דברי הסבר איבער וויאזוי די פרייזן זענען באשטימט געווארן. אינעם פרייז פון $300 א סקווער פיס איז געווארן אריינגערעכט אריבער $100 פאר די בויען קאסט זעלבסט, דאן אביסל אונטער $100 פאר די ארומיגע אינפראסטרוקטור קאסטן; די קאסטן פון צאלן ארבייטער; און די קאסטן פון קאנסטרוקשן לאונס.
אינאיינעם האלט מען ביי בערך $200 קאסט. יעצט לייגט מען צו ארום $50 וואס עס קאסט דער שטח פער בילדעבל סקווער פיס, רעכענענדיג דעם עוורידזש וויפיל 'רוב יעצטיגע דעוועלאפער' אינעם ווילעדזש האבן געצאלט, האלט מען ביי א חשבון פון בערך ארום $250 קאסט. צו דעם האט מען ערלויבט ארום $50 ריוח פאר'ן דעוועלאפער, צו קענען פארדינען אויף די גאר שווערע און קאמפליצירטע ארבעט בגוף ובנפש וואס א דעוועלאפמענט נעמט אריין. אזוי איז מען אנגעקומען צום מהלך פון $300.
אצינד, היות די אלע שטחים אין קרית יואל המורחבת אין אנדערע ווילעדזשעס זענען געקויפט געווארן פאר פרוטות לפי ערך, עס איז דא דארט אזויפיל ליידיגע שטחים אז מען האט איינגעקויפט גאנצעטע הונדערטער עיקער פאר גאר ביליג, האבן רובא דרובא שטחים אייגענטומער דארט געצאלט אונטער $10, און אפילו אונטער $5 פער בילדעבל סקווער פיס, און טייל אפילו אונטער א דאלאר(!).
דעריבער האט דער רבי באשטימט, אז לפי היושר קען מען דארט רעכענען נאר מיט $50 ווייניגער, און עס איז דעריבער נישטא קיין בארעכטיגונג צו בעטן דארט מער ווי $250 פער סקווער פיס.
עס ווערט צוגעצייכנט אז נעמענדיג אין באטראכט די ווייטקייט פונעם צענטער וואס נידערט אויטאמאטיש די ווערד פון א דירה, און רעכענענדיג אז די שטייערן אין די ארומיגע מוניציפאליטעטן קאסטן דאפלט און טריפלט פאר די וואס האבן דירות אין קרית יואל המורחבת, איז נישט מער ווי נאטורליך אז אויך מצד די קונים וועט נישט געצאלט ווערן מער ווי $250 פער סקווער פיס, אזוי אז דער נומער פון $250 איז אויסגעהאלטן סיי כלפי דעם מוכר אז דאס ברענגט אים גענוג פארדינסט כפי ערך פון די דעוועלאפערס אינעם צענטער, און סיי מצד די מציאות אז דער קונה וועט ממילא נישט וועלן צאלן מער.
דאס הייסט אז דער פרייז פון $250 וועט מוזן ווערן איינגעהאלטן, עס וועט ווערן א פאקט נאטורליך מצד דעם מארקעט. א מוכר וואס בעט מער וועט פשוט נישט טרעפן קיין קונים.
מעסעדזש פאר דרויסנדיגע אינוועסטירער:
בתוך דברות קדשו האט דער רבי שליט"א אפעלירט צו אינוועסטירער פון אנדערע געגנטער: ביטע קומט נישט אהער מיט גרויסע ביזנעס פלענער פון רייך ווערן דורך ארויפציען פרייזן, ווייל עס גייט נישט ארבעטן, ווער עס וויל מאכן דאפלטע און טריפלטע רווחים דארף גיין צו אנדערע נישט אידישע געגנטער.
דאס באציט זיך צו דעם וואס אין די לעצטערע יארן, זינט קרית יואל איז ב"ה אזוי געוואקסן, און עס איז געווארן א שם דבר, האבן מער און מער ביזנעס-אינוועסטירער מיט א ברייטע וויזיע אויף ריעל עסטעיטס אנגעהויבן איינשטעקן אין שטחים דאהי אנשטאט אין בנינים אין מאנהעטן... מיט'ן חשבון אז דא גייט זיין א זיכערע מארקעט, און מען וועט קענען פליפן אדער בויען פאר ארויפגעשרויפטע פרייזן און רייך ווערן אויפ'ן רוקן פון קרית יואל.
פילע פון די זענען אזעלכע וואס האבן נישט קיין שייכות מיט די קהלה, און דאווענען אודאי נישט אין די לאקאלע בתי מדרשים וואו איינער קען זיי פארהאלטן אויף עפעס, ביישטייערן נישט פארן ציבור בכלל, און האבן נישט דאס מינדעסטע געפיל פאר'ן שטאט, נאר בלויז ביזנעס לשם ביזנעס, און נישט סתם ביזנעס נאר 'גרויס ביזנעס'... שארן גאלד אויפ'ן רוקן פון די שטאט, אויפ'ן רוקן פון די הארעוואניע פון רביה"ק זיע"א.
צו זיי האט דער רבי געזאגט, אז זיי זאלן וויסן אז קרית יואל איז נישט זייער פלאץ, זייער פלאן וועט אי"ה נישט קענען ארבייטן. נארמאלע ביזנעס איז טאקע דא, אודאי מוז דאס זיין א ביזנעס, מען מוז שיין פארדינען צו קענען פארזעצן מיט א מארקעט, אבער, טאפלען און טריפלען רווחים נוסח 'ריעל עסטעיט מציאות', אויפ'ן חשבון פונעם ציבור, דאס איז נישט א זאך וואס מען וועט צולאזן, נישט יעצט און נישט בעתיד. אויב וויל מען קענען ציען פרייזן זאל מען אינוועסטירן אין אנדערע נישט אידישע געגנטער, ווייל דא וועט מען נאר קענען פארדינען נארמאל און צושטעלן פאר אידן צוגענגליכע דירות צום וואוינען מיט אלעס ארום וואס פעלט זיך אויס לטובת הציבור.
די קלארע דברות קודש האבן געשיקט כוואליעס איבער די שטאט און איבער די וועלט צוגלייך, סיי די פריידיגע כוואליעס איבער די גאנצע שטאט 'המורחבת' איבער די פאקטישע מציאות וואס איז שוין אין אפעקט ב"ה, אוטן איבער די צוקונפטיגע מעגליכקייטן אין די ארומיגע ווילעדזשעס בעז"ה, און סיי איבער די וועלט האט אפגעקלינגען דער קידוש השם וואס סאטמאר שטעלט ב"ה אהער פאר חסידי סאטמאר, א שטאט מיט א כח הנהגה, א שטאט מיט א כח עסקנות מיט דעת תורה געבינדן, א שטאט וואס שלאפט נישט און ארבעט אויפ'ן הוה און אויפן עתיד אן אפשטעל בס"ד.
עיר הצדק קריה נאמנה.
