סענס אף יומער האט געשריבן: ↑מאנטאג אקטאבער 06, 2025 3:30 pm
ערב סוכות תשפ"ו לפ"ק.
צום אלעם ערשטן דארף מען אפגעבן א שבח והודאה פארן רבש"ע, אז מיר האבן געהאט דעם זכיה און געקענט זיין א חלק, מיט די הילף פון כלל ישראל, אין די פעולות און השתדלות אפצוראטעווען די קינדערלעך יוצאי לב טהור, וואס אצינד דארף מען שוין נישט מאריך זיין בכלל אין וואספארא שרעקליכע מקום און אומשטענדן זיי האבן זיך געפינען ברוחניות ובגשמיות, און געלויבט דעם אייבערשטן אז מען האט געזען דעם יד השם און אפענע סייעתא דשמיא אויף יעדן טריט און שריט, און דער רבש"ע זאל טאקע העלפן אז זיי אלע זאלן אויסוואקסן אמת'ע ערליכע תורה טרייע אידן לשם ולתפארת.
אזוי ווי א גרויס חלק פון כלל ישראל זענען דאך שותפים לדבר מצוה, און טוען זיך זארגן פאר די וואוילזיין פון די טייערע קינדער אויף א אויסטערלישע פארנעם, פראבירן מיר עסקנים צו זיין די מערסטע אפן מיטן ציבור, און מיטטיילן די מערסטע דעטאלן וויפיל ס'איז שייך איבער די פארשריט אויף א יעדע פראנט. (עס איז דא אסאך פרטים װאס מ'קען כעת נישט מיטטיילן, כדי נישט צו שטערן די וואוקס און הצלחה פון די טייערע קינדערלעך שיחיו, און, בעז"ה ביים סעודת הודאה וועט מען קענען אסאך מער פארציילן, אבער אסאך דעטאלן וועט שטענדיג דארפן בלייבן פארהוילן צוליב די סענסיטיווקייט פונעם פרשה).
עס זענען אריין געקומען גאר אסאך פראגן פונעם ציבור, בעיקר בנוגע וויאזוי מען גייט גיין פון דא און ווייטער אויפן נייעם יאר שנת תשפ"ו, און בנוגע אז די ראשי הכת זאלן אלע בעז"ה ווערן אומשעדליך אויפן עתיד, ווי אויך בנוגע די קינדער וואס זענען שוין ארויסגעקומען פון גואטעמאלא צו אנדערע לענדער אבער זייערע עלטערן האלטן זיך נאך שטארק מיט די לב טהור רשעות, און וואס ס'איז די פלאן מיט די קינדער וואס זענען מאיזה סיבה שהוא געבליבן מיט די עלטערן אין גואטעמאלא.
מיר וועלן פראבירן ווי ווייט מעגליך צו ענטפערן די שאלות די קלארסטע וואס מען קען מיטטיילן, ויותר ממה שקראתי לפניכם כתוב כאן.
די ערשטע זאך ווילן מיר קודם קלאר מאכן אז מיר עסקנים, וואס דער מסבב כל הסיבות האט אזוי געפירט אז עס איז צו אונז אנקומען דעם צעקת אחינו ילדי בני ישראל, וועלן בס"ד ובהוראות הרבנים נישט נאכלאזן און מיד ווערן, און מיר וועלן נישט מסיח דעת זיין און נישט אפטרעטן, ביז די חבורה וועט זיין אויסגעריסן אינגאנצן אן איבערלאזן נאך זיך די מינדעסטע איבערבלייבעניש, אפגעזעהן די צייט, געלט, כח, וואס וועט זיך פאדערן דאס צו דערגרייכן.
און אצינד לאמיר זיך באציען צו עטליכע וויכטיגע נקודות איבער די שאלות וואס ווערן כסדר געפרעגט פון די עסקנים.
1) בנוגע די אנפירערס וואס האבן זיך נישט נישט געטוישט און אפגעלאזט די חבורה, וועט זיך נאך יו"ט אננהייבן די קרימינאלע טרייעלס אויף די וואס האבן שוין קלאגעס, און עס גייט פארענדיגט ווערן די קלאגעס אויף אזעלכע וואס זענען נאך דערווייל נישט ארעסטירט. ליידער איז די סכום פון קלאגעס אין די שווערע צענדליגע. עס איז נישט יעצט די צייט אריין צו גיין דא אין אן אריכות וויאזוי די קרימינאלע סיסטעם אין גואטעמאלא ארבעט, אבער מיר ווילן קלאר מאכן, אז מען זאל קיינמאל נישט נעמען קיין שום ראיות פון אנדערע נייעס קוואלן אז איינער איז באפרייט ווילאנג מיר מעלדן דאס נישט, וויבאלד א מענטש וואס קען האבן אויף זיך פינף קלאגעס, און צומאל וועט מען אים משום סיבות שונות קודם אנקלאגן נאר אויף איין קלאגע, און ער גייט ארויס ריינגעוואשן פון די איין ספעציפישע קלאגע, מיינט דער אנגעקלאגטער אז ער קען שוין פאקן פעק און ארויספארן פריי פון לאנד, ער ווייסט גארנישט אז ער האט נאך מערערע קלאגעס וואס גייען נאך נאכקומען. (ווען מיר עסקנים ארבעטן בס"ד ריינצואוואשן איינעם פון זיינע קלאגעס, גייען מיר איבער אלע קלאגעס זיכער צו מאכן אז די מענטש ווערט באפרייט אינגאנצן, און נישט אז מען זאל יעדן טאג דארפן ארבעטן פונדאסניי). ווי אויך איז דא צומאל געוויסע סיבות פארוואס זיי ארעסטירן נישט איינעם וואס דארף ארעסטירט ווערן, וויבאלד די פראסעקיוטערס האבן א נוצן פון דעם אז יענער פערזאן זאל נאך זיין פריי, ואכמ"ל. (דאס ענין פון געבן שוחד פאר שופטים וכדומה וואס די ראשי הכת פלעגן, און טוען זיך נאך באנוצן דערמיט, קענען מיר נישט דא בארירן ברבים. צוליב די ערנסטע אינוועסטיגעישאנס וואס גייען אן דערוועגן, איז נישט לעגאל מיטצוטיילן סיי וועלכע דעטאלן דערוועגן, אבער אזויפיל קענען מיר זאגן, אז בס"ד מאכן מיר זיכער אז דאס זאל מער נישט קענען ארבעטן, און מ'וועט בעז"ה מפרסם זיין מער ווען מען וועט קענען לעגאל אדרעסירן דעם נושא).
2) בנוגע די משפחות וואס זענען שוין ארויסגעקומען און זיי האלטן זיך נאך מיט די רשעות'דיגע סארט לעבנסשטייגער, ווילן מיר מודיע זיין, אז מיר פארמאגן די נויטיגע קשרים צו געבן לעגאלע הילף פאר די אלע משפחות וואס זייערע משפחה מיטגלידער זענען פון די וואס ווילן זיך נישט טוישן. נאר אין די לעצטע צוויי וואכן אליינס האבן געריכטן דא אין אמעריקע אוועקגענומען די רעכטן פון עטליכע לב טהור עלטערן אויף זייערע קינדער, און איבערגעגעבן זייערע קינדער פאר אנדערע משפחה מיטגלידער. איין משפחה פון ניו דזשערסי, און איין משפחה פון מישיגן. (אין ניו יארק איז שוין געווען אזא פרשה א שטיק צייט צוריק). און לויט ווי עס קוקט יעצט אויס, וועט מען נאך די ימים טובים דארפן העלפן נאך געציילטע משפחות אוועק צו נעמען די קינדער פון די עלטערן זיי צו ראטעווען, אויסער אויב עס וועט פאסירן א טויש ביי זיי ביז נאך יום טוב. (איראניש איז, ווי יעקב נחום וויינגארטן, דער א.גַ גרויסער עקספערט און פארשטייער אין געזעץ, האט גע'פסק'נט פאר די לב טהור משפחות זיך נישט צו טוישן, און אז זיי זאלן גיין וואוינען אין ניו דזשערסי, ווייל דארטן וועט מען נישט קענען אוועק נעמען קינדער דורך די געריכט אפילו אויב מען פייניגט די קינדער מיט אלע אלטע לב טהור דרכים).
3) בנוגע די משפחות מיט קינדער וואס געפינען זיך נאך אין גואטעמאלא, גרייט מען זיך בס"ד נאך יו"ט צו פיילן קלאגעס אנטקעגן די עלטערן וואס ווילן נישט ארויספארן פון גואטעמאלא, וואס זיי זענען באגאנגען אסאך אומלעגאלע אקטיוויטעטן. עס זענען אויך דא דארט צוויי משפחות וואס די טאטעס זענען נישט דארט מיט די מאמע און די קינדער, און אין אזעלכע פעלער וועלן די קלאגעס דארפן גיין אויף די מאמעס. מען ארבעט אויס אז די קלאגעס זאל זיין אויף אזעלכע סארט פארברעכנס וואס מען געבט אונטער פינף יאר תפיסה, וואס אין אזא פאל קען מען אויסקויפן די תפיסה מיט געלט, אבער אזא מענטש ווערט ארויסגעווארפן פון לאנד, וואס דאס איז די הויפט ציל בסייעתא דשמיא. ווי אויך גייען מיר ארבעטן מיט די אימיגראציע אויטאריטעטן ארויס צו ווארפן אלע אנדערע פארבליבענע מיטגלידער פון לאנד. בעז"ה וועלן מיר נישט רוען ביז אלע קינדער גייען ארויס פון דארט און זענען מסודר אין אנדערע לענדער צווישן דעם היימישן ציבור.
4) אויב איז דא איינער וואס האט א משפחה מיטגליד אדער א ידיד וואס איז נאך אין גואטעמאלא מיט קינדער, און יענער וויל באמת ארויס קומען, נאר ער דארף סיי וועלכע הילף ארויס צו גיין פון לאנד ווי פאספארטס, גרין קארדס וכדו', זאל מען זיך פארבינדן מיט די עסקנים ביז אסרו חג, כדי מען זאל חלילה נישט לייגן קיין קלאגעס אויף אומשולדיגע משפחות.
דער אייבערשטער זאל העלפן אז אלע משפחות זאלן שוין אויפגעראכטן ווערן, און זוכה זיין מגדל צו זיין זייערע קינדער על דרך ישראל סבא במנוחה, און מיר זאלן אלע זוכה זיין צו גיין אנטקעגן משיח צדקינו בב"א.
החותמים:
ראשי העסקנים להצלת ילדי לב טהור