פופציגער האט געשריבן: ↑זונטאג מערץ 17, 2024 2:14 pm
אקעי, לאמיר צולייגן מיינע צוויי צענט וויאזוי איך זע עס
בנוגע די קאסט אוו ליווינג:
ווען מ'מאכט אזא סארט חשבון דארף מען קודם זיין זייער קלאר: רעדן מיר פון פאקטן? אדער פון טעאריע?
דאס הייסט, מען קען רעדן וויפיל מ'קען טעארעטיש ענדיגן דעם חודש, אדער וויפיל מען ענדיגט למעשה. לדוגמה, דער פאקט איז אז א ריזן פראצענט וויליאמסבורג'ע אידן פון יארגאנג 30 און ארויף, פארמאגן יא קארס, און האבן נישט סעקשאן 8, וואר?
אבער איך גיי נישט יעצט רעדן וועגן דעם, כהאב נאר דאס גענוצט פאר א נקודה ווי איר וועט שפעטער זען.
איך האב אסאך געפרעגט און שטודירט די קאסט אף ליווינג, אין סיטי איז דא זייער אסאך עקספענסעס וואס אין אפסטעיט איז נישט דא. די ערשטע און גרעסטע עקספענס איז פעיר פרעשור. מען קען אריינגיין און דעבאטירן, איינער זאל נאכזאגן פון א שוועגערין וואס קען קרית יואל'ע ווייבלעך וואס האבן יא פעיר פרעשור וכו' וכו', איך ווייס, איך ווייס אז ס'דא אזעלכע, און אויך איז דא אזעלכע וואס האבן קארס אין וויליאמסבורג... איך רעד אין דזעשנעראל וואס די פאקטן זענען.
געשעפטן וואס האבן לאקאלן אין ביידע געגנטער וועלן אייך מעיד זיין, אז אין קרית יואל וועלן מענטשן קומען איינקויפן ווען מ'מאכט א סעיל, ווידעראום אין וויליאמסבורג וועלן מענטשן קומען צולויפן ווען די אנאנסירסט אז דו פארקויפסט די טייערע סחורה... אין וויליאמסבורג באטרעפט א כלה שטאפיר דאפלט ווי אין קרית יואל, און ווען איך רעד מיט וויליאמסבורגע אינגעלייט וועגן זייער בודזשעט הער איך ציפערן פון געלטער וואס גייען פאר קליידונג, שיך, און אנדערע סטיילס, וואס זענען גאר ווייט פון מיינע ציפערן - און איך בין נישט דער שפארזאמער אינגערמאן... ביי מיר אין שטוב ווייסט מען אז איך פארהער נישט ווען מ'וויל עפעס קויפן... די קרעדיט קארטל איז אלעמאל עוועילעבל לויט וויפיל די יכולת איז.
איך בין געווען אינוואלווד אין א שטיקל חלום צו עפענען אן ארגאניזאציע אין קרית יואל וואס זאל העלפן אידן פינאנציעל, און רעדנדיג מיט עסקנים האב איך דאס געהערט פון אלעמען, אז קרית יואל איז מיט דעם גרינגער, דער ציבור זוכט נישט צו שפענדן איבריג, משא"כ אין וויליאמסבורג, וואס די פעיר פרעשור קאסט אפ צענדליגע אלפים ורבבות.
און דאס איז נישט נאר ביי פרויען... די טרוקענע פלייש און גע'פייגער'טע פיש טעצער זענען ריזיג מצליח אין וויליאמסבורג, די טייערע מוזיק סטעידזשעס ביי חתונות זענען פיל מער מצוי אין וויליאמסבורג, און יוקאן דרייווערס ביי חלוקות אויכעט...
דערנאך איז דא עפעס וואס איז נישט אפן פאר דעבאטעס אפילו, דאס איז די קאנטרי און קעמפ הוצאות. א רעגולער משפחה אין וויליאמסבורג וואס גייט אין קאנטרי און האט 4 אדער 5 קינדער אין קעמפ, ווישט אראפ אזא 35 אלפים אדער מער אינעם זומער סעזאן.
בקיצור, אונטערשטע שורה, קאמפעיר דעם גאנצן בודזשעט וועסטו זען אז דער וויליאמסבורגער האט א טייערערן חודש.
-
בנוגע ערוואקסנקייט:
עס איז אמת אז אין קרית יואל זענען דא מער לעלו-טאטעס, הגם די וועיטינג ליסטע אריינצוגיין אין הצלה אין וויליאמסבורג איז פיל לענגער... אבער דער פאקט איז אז אין קרית יואל איז גרינגער צו האבן א קאר מיט לייטס, ווי אין וויליאמסבורג וואס האבן א קאר בכלל איז שווער...
אבער אז דו פרעגסט מיר? דאס אז אינגעלייט פון 30 יאר אלט לויפן נאך סעלעברעטיס פאר סעלפיס, דאס אז דער וויליאמסבורגער בחור וואס קומט אין ישיבה פילט פאר וויכטיג צו לאזן וויסן קלאר פאר'ן קרית יואל'ער בחור אז ער איז העכער פון אים ווייל ער קומט מיט א לעפקאוויטש'ע סוט פון וויליאמסבורג, איז בס"ה אן אנדערן סארט אומערוואקסנקייט. ס'פיין.
איך בין געקומען פון וויליאמסבורג קיין קרית יואל אלס אינגע בחור, מיינע חברים אין וויליאמסבורג האבן זיכערגעמאכט איך זאל וויסן זייער קלאר אז איך גיי אראפ א דרגה... מ'האט מיר ארויסבאגלייט פון חדר מיט א פעקל בענדעידזשעס צו לייגן אויף די ברילן, און נאך אזעלכע מילביגע וויצן וואס קינדער האבן געמיינט אז דאס מאכט זיי גרויס.. דער אמת איז אז איך בין טאקע געווען זיכער אז איך קום אן צו אזא דארפיש מקום וואס איך גיי זיין די מערסט אינטעליגענטער בחור פון די כתה.
דער מציאות איז אבער געווען ווייט דערפון. אמת, מ'רעדט פון "אנדערע" השגות, אבער גארנישט קלענערע... די קרית יואלע קינדער זענען געווען פיל מער אויסגעקאכט אין נושאים וואס איך בין געווען רוי און גרין. זיי האבן טאקע נישט געוואוסט וואס ליפא שמעלצער'ס שני וחמישי שיעורים זענען, אבער זיי האבן געקענט אוצרות פון היסטאריע, און אנדערע עכט אינטערסאנטע נושאים, סיי אידיש און סיי אלגעמיין, וואס איך האב זיך ממש געשעמט פון מיר אליינס וואסערע ליידיגע קאפ איך בין...
-
און דאס איז אויך בנוגע דעם קומענדיגן נקודה פון ערליכקייט:
מענשט גלייכן זייער אנצוכאפן די שפיצלעך און פראוון אז א שפיצל איז חצניות... ס'איז אמת, לבוש איז א חצניות'דיגע זאך. קלאר אזוי. אבער לאמיר אונז זיין קלאר מיט עטליכע פאקטן.
אין קרית יואל איז דא א ריזן פראצענט שטאט וואס האבן נישט קיין טעקסט מעסעדזש, און אפגערעדט אז בכלל נישט קיין שייכות מיט סיי וועלכע טעכנאלאגישע אנגעהערן, און מ'רעדט פון א "ריזן" פראצענט שטאט.
אין קרית יואל'ע בתי מדרשים (די צענטראלע בתי מדרשים עכ"פ) שעמט זיך א אינגערמאן ארויסצונעמען א סמארטפאון.
אין קרית יואל וועט דער דורכשניטליכער אינגערמאן האבן א שטארקן פילטער אויף זיינע דעווייסעס.
און לאמיר יא נעמען די שפיצל פרויען... ערשטנס, דאס אז אזא ריזן פראצענט שטאט האט געטוישט לבוש צו א שפיצל, זאגט נישט עפעס?
צווייטנס, די שפיצל איז בלויז איין דעטאל, וואס דאס קען מען דעבאטירן, אבער דער פאקט אז רוב קרית יואלע פרויען שמירן זיך נישט, עכ"פ נישט מער ווי די מינימום, זאגט נישט עפעס?
יא, ס'זענען זיכער דא פון אלע סארטן און אין אלע קרייזן, אבער אין דזשענעראל איז דאס די קרית יואל'ע מענטאליטעט. אדרבה, זאל יעדער אנפרעגן אינדערהיים די חילוק וויאזוי ס'קוקט אויס א עזרת נשים ביי א חתונה מיט קרית יואל'ע פרויען און מיט וויליאמסבורגע פרויען... איך ווייס נישט צי דאס הייסט ערליכקייט, אבער יא א שטארקע אנדייטונג אויף פראסטקייט אין אנדערע שטעט, וואס אין קרית יואל זעט מען עס נישט.
