בערל דער פייפער האט געשריבן: ↑מאנטאג פעברואר 12, 2024 8:42 pm
היינט איז פארגעקומען די אסיפה ביי מרן רבינו שליט"א מיט די עסקני והנהלת הקרי', דן צו זיין וויאזוי מען קען טרעפן לעגאלע לעזונגען צו נידערן די דירות פרייזן, נאכפאלגנדיג די נעכטיגע דברות קודש וואו דער רבי האט עטוואס אויפגעוויקלט די דעטאלן וואו דער פראבלעם שטעקט, סיי מיט לאנד אייגנטומער, און סיי מיט פליפער'ס וואס זענען גורם אז דער דעוועלאפער זאל לכתחילה בעטן דאס מערסטע וואס נאר שייך (מיט די טענה אז אויב נישט מאכט א צווייטער געלט אויף זיין ארבעט).
צום אסיפה האט דער רבי גערופן סיי עסקני הקרי' און סיי די קרית יואל ווילעדזש איינגעשטעלטע. פון די ועד הקרי' איז געווען ר' מאיר הירש און ר' אלעזר גרובער, און פון ווילעדזש איז געווען דער אדמיניסטראטאר ר' גדלי' סעגעדין, די האוזינג אפיס ר' משה אליעזר ניימאן, און דער ווילעדזש קאנסולטענט און אינפראסטרוקטור עקספערט ר' משה גרובער.
(אגב, ר' משה גרובער איז שוין בעבר געווען א גוטער שליח אויף פארשידענע מיסיעס לטובת דירות אין קרית יואל, אריינגערעכנט דאס איינקויפן שטחים, ווי ס'איז באקאנט וויפיל ארבעט ער האט אריינגעלייגט אויף דעם שטח פון "פארעסט עדזש" (די געוועזענע תפלה לאט) וואס איז לבסוף געווארן אויסגעכאפט דורך אינוועסטירער).
דער רבי האט גענומען די ציפערן פון שטחים און פון דירות, יעצטיגע און צוקונפטיגע, פון אין ק"י ווילעדזש און פון דרויסנדיגע געגנטער, און לפי זה אריינגעקוקט אינעם מצב.
בעיקר העיקרים וואס איז יעצט אויפ'ן טיש איז, אז דער רבי וויל טרעפן א שנעלע לעזונג 'אויפ'ן מינוט' צו ברענגען א מאמענטאלע דערלייכטערונג, אין צוגאב צו די פלענער פון עפארדעבל דירות, און אין צוגאב צו די בעפארשטייענדע אנעקסעישנס וואס מען ערווארט זיך אנצוהייבן בקרוב ביז די נעקסטע 4 יאר אי"ה. מ'האט אויפגעברענגט אויפ'ן טיש אלע פאקטן, וואסערע מציאות שטעלט א טשעלענדזש פאר וועלכע זאך, און וואס ברענגט דערצו אז דער מארקעט איז נאך אלס טייט, סיי אין ק"י ווילעדזש וואו עס בויען זיך יעצט הונדערטער דירות, און סיי אפילו אויך אין די ארומיגע געגנטער וואו ס'איז פאראן פילע ליידיגע שטחים, און מ'האט דורכגעטון וואו מ'קען די בעסטע טרעפן דעם לעזונג. אויך האט מען גערעדט וואס ס'האט געברענגט דערצו אז מ'האט דערווייל נישט געקענט מאכן קיין לעגאלע אינפארסמענטס קעגן פליפערס.
מ'האט דן געווען א לאנגע צייט אין פרטי פרטים אויף צוויי פונקטן. איינס, וואו דער מינוטליכער געברויך איז די מערסטע, חתן כלה דירות / גרויסע משפחות / קויפן / רענטן, און דאן די צווייטע פונקט, וואסערע עמערדזשענסי אפציעס מ'קען אויפטרעפן צו שאפן דעם לעזונג צום גרויסן פראבלעם - מיט וואס אלע גרויסע אידישע שטעט מוטשען זיך אבער דעם רבי'ן גייט עס בנפשו אז אונזערע אינגעלייט וואס בלוטיגן זאלן טרעפן א מנוח לנפשם, א דאך איבערן קאפ אן קיין ים פון חובות! און קרית יואל זאל ווידער זיין א וועגווייזער פאר אנדערע דעוועלאפער און געגענטער וויאזוי צו ברעכן דעם הויעכן מארקעט וואס איז העכער די מענטשליכע לעבנסשטייגער מעגליכקייט.
עס זענען ארויפגעקומען עטליכע נייע געדאנקען אין וואס מ'דארף אריינקוקן, און דער רבי האט באשטימט אז גלייך ווען די דעטאלן פון די געדאנקען און ציפערן און לעגאליטעטן ווערן קלאר, זאל מען זיך ווידער צוזאמזעצן און האפנטליך שפאנען פאראויס.
מלך מאזין שועה מחיש ישועה! דער ציבור איז מתפלל אז די סיעתא דשמיא זאל באגלייטן דעם רבין וחפץ ה' בידו יצליח!
