אוטובאס האט געשריבן: ↑זונטאג אוגוסט 02, 2026 4:24 pm unnamed (4).png
לאמיר קודם אנהייבן מיט די פאקטישע נייעס און וואס עס האט זיך אפגעשפילט אין די לעצטע טעג אין די "נטרונא" אפיסעס. עס זענען געווען שטורמישע טעג, און דערנאך וועלן מיר צוקומען צו א שטיקל אפהאנדלונג בעז"ה. די נייעס קאכט זיך שוין א קורצע צייט אין די הויפט העדליינס, אז מאמדאני האט זיך געלאזט הערן אז ער קוקט איבער מיט זיין ליגעל טיעם די מעגליכקייט צו ארעסטירן ביבי נתניהו פארן באגיין גענאציד און מאסן מארד אויף די פאלעסטינער באפעלקערונג, אזוי ווי עס איז אנגענומען געווארן אין דעם "העיג" אינטערנאציאנאלן געריכט.
פארשטענדליך אז אזא נייעס דארף גלייך אדרעסירט ווערן דורך "נטרונא", כדי דער כעס זאל נישט פאלן אויף די אמעריקאנער אידן. די מידיא עקספערטן פון נטרונא זענען אויפגעקומען מיט א געניאלע המצאה צו זיין אן "אפארטוניסט" און זיך ארויפכאפן טאקע אויף די נייעס, שרייבנדיג מיט א "סענס אוף הומאר" אז מען דארף ארעסטירן ביבי פאר אן אנדערן טעם: פארן פעלטשן דעם נאמען "ישראל" און רעדן אין זייער נאמען, וואס דאס גורם געפערליכע אנטיסעמיטיזם קעגן אידן. מיט דעם וועלן מיר פארדינען דאפעלט: איינס, אז דער כעס וועט נישט זיין קעגן אידן בכלליות נאר עס וועט בלייבן אויף ביבי; און צווייטנס, וויבאלד מען וועט שרייבן הומאריסטיש אז מען דארף ארעסטירן ביבי, וועט דער וויכטיגער מעסעדזש פון אפטיילן אידן פון דער מדינה ווערן גאר שטארק אויפגעכאפט. פארשטענדליך אז קיינער האט נישט געמיינט אז מען קען טאקע ארעסטירן ביבי פאר דעם, עס איז פשוט געווען א גוטע קנייטש פארן פירסום.
האבן מיר טאקע געשריבן ווי פאלגנד:
"אלס אידן דא אין ניו יארק, וואלטן מיר מיט פרייד באגריסט דעם ארעסט פון נתניהו, פאר'ן זיך פאלשערהייט אהערשטעלן אלס דער ווארטזאגער פונעם אידישן פאלק אן קיין שום רשות, פאר'ן גנב'ענען אונזער אידישע אידענטיטעט, און פאר'ן גורם זיין דערמיט א שרעקליכע באשמוצונג און שנאה קעגן אידן איבער די גאנצע וועלט."
דער טוויט האט געטוהן דאס זייניגע און זיך צושפרייט פייער-שנעל צו איבער 48 טויזנט וויאוס, וואס דאס האט שטארק בארואיגט די געמיטער, כדי דער כעס זאל זיך חלילה נישט אויסגיסן אויף די אמעריקאנער אידן.
ס'איז געווען אינטערעסאנט צו זען, אז דער כעס וואס "נטרונא" האט אריינגעכאפט איז בעיקר געקומען פון געוויסע "היימישע" לופטיגע אינגעלייט וואס זענען פשוט ארויס פון די כלים: "וויאזוי דערוואגט מען זיך צו שענדן זייער געטשקע און לעסטערן זייער עבודה זרה?!" דער עולם איז פארכישופט אין ביבי'ן און אין דעם רעכטן לאגער אויף אן אופן וואס גייט ארויס פון אלע גבולים; מען טראסט זיי, להבדיל, אזוי ווי די סנהדרין און די אורים ותומים, און מען שיקט אידן צו דער הריגה אויף זייער סמך. פארשטייט זיך אז מען לייגט צו א זייטיגן "לחש" אז לויט די תורה טויג ער נישט, אבער באמת האבן זיי געשוימט פאר כעס פארן מבזה זיין זייער העלד – בושה תכסה פנינו. דאס קומט ליידער צוליב דעם וואס מען רעדט נישט גענוג קעגן ציונות, וואס דאס ברענגט אז די התדרדרות זאל גיין אזוי שנעל, השם ירחם
אינטערסאנט צו זעהן וויאזוי נטרונא האט געהאנדעלט מיט אזעלכע דעליקאטע נושאים
זיי האבן לכאורה נאכנישט געהאט אזא קאמפליצירטע פאל ווי זיי זאלן דארפן לויפן צווישן אזעלכע סארט טראפן
די כעס און שוים פון די היימישע ציונים קעגן זיי איז געווען איבער אלע גרעניצן.
