► Show Spoiler
א גוט יאר טייערע אידן, דא שרייבט יואל יהושע העשיל בלום. בעז"ה וועל איך דא אויסקלארן די אלע שמועות איבער די פרישע קלאגעס אריינגעגעבן קעגן געוועזענע לב טהור פירער.
מיט כמעט פיר חדשים צוריק, אין סאמע ברען פונעם קאמף מיט די לב טהור פירער, ווען די גאנצע מיטגלידערשאפט אין שפיץ פון די הנהגה האבן נאך געקעמפט מיט ציין און נעגל אקעגן די גואטעמאלא רעגירונג באאמטע און די עסקנים, און עס האט זיך נישט אנגעזעהן קיין שום צייכן מצד לב טהור אז זיי זאלן האבן סיי וועלכע הווא אמינא זיך צו ברעכן און אויפגעבן דעם בלוטיגן קאמף, האט אבער איינער פון די לב טהור עסקנים אנגעהויבן רעאליזירן אז עס איז נישטא קיין האפענונג צו געווינען דעם קאמף ווײטער אנצוהאלטן דעם קולט, און נאכדעם וואס ער איז אליינס אויסגעשטאנען קלאגעס איבער זיינע אקטיוויטעטן אין לב טהור, האט ער געטוישט זייט און זיך אינגאנצן אויסגעדרייט דעם רוקן צו לב טהור און זיך פארבינדן מיט אונז עסקנים בכדי צו באקומען זייער הילף זיך צו קענען אפשאקלען און ארויסגיין פריי נאכן ווערן אנגעקלאגט צוזאמען מיט א רייע אנדערע לב טהור פירער.
תיכף נאכדעם וואס מיר האבן באשטעטיגט און געזעהן אז דער לב טהור עסקן איז ערנסט דערביי און האט באמת פארלאזט לב טהור אינגאנצן, האבן מיר זיך שטארק אריינגעלייגט אין זיין קעיס, צו זעהן וואס מ'קען אויסארבעטן אים צו קענען ריינוואשן און אפקומען מיט בלויז א לייכטע שטראף אויף די גרינגסטע אופן וואס איז נאר שייך. מיר האבן גלייך אויפגענומען אן ערפארענעם לויער וואס זאל זיך ספעציעל אפגעבן מיט דעם קעיס, צו קענען טרעפן די גרינגסטע וועג ארויס פון זיינע קלאגעס און קענען ארויספארן פון גואטעמאלא מיט זיינע קינדער, און פארשטייט זיך אז דער לויער איז געווארן פולקאם באצאלט אויף די קאסטן פון אונז עסקנים, אין ראם פון די אלע פארצווייגטע פעולות אויפצולעזן דעם קולט און ארויסראטעווען אלע משפחות פון דארט.
דער דאזיגער לויער האט באשלאסן, נאכן איבערגיין און איבערזיפן אלע דעטאלן פון די קלאגעס קעגן דעם עסקן, אז די בעסטע וועג ארויס פון די דאזיגע קלאגעס איז דורך א פלי-דיעל מיט די פראסעקיוטערס. וויבאלד די באווייזן קעגן אים זענען געווען זייער קלאר און דייטליך, איז נישט געווען קיין שום שאנס צו קענען געווינען אין געריכט אויב וועט מען גיין אויף טרייעל, אבער מיט א פלי-דיעל קען מען באקומען א גאר קורצע טורמע טערמין, און לויט די ארטיגע געזעץ קען מען אין אזא פאל זיך אויסלייזן מיט א גרויסע סומע געלט, און אינגאנצן פטור ווערן פון דארפן זיצן אין תפיסה.
אין לויף פון די ערשטע דריי חדשים, זענען מיר נישט געווען אליינס אינוואלווד און האבן נישט פערזענליך מיטגעהאלטן די אנטוויקלונגען אין דעם קעיס, וויבאלד ס'איז געווען פיל אנדערע פעולות וואס האבן געדארפט אויסגעפירט ווערן און האבן אונז געהאלטן פארנומען פאר לאנגע חדשים ממש אן קיין אפשטעל, און מיר האבן דעריבער נישט געהאט די מעגליכקייט זיך אפצוגעבן און באגלייטן די דאזיגע קעיס פונעם לב טהור עסקן.
מיט בערך א חודש צוריק, נאכדעם וואס די וואסערן האבן זיך צוביסלעך געזעצט און די שווערע ארבעט האט אנגעהויבן אביסל נאכלאזן, האבן מיר זיך אוועקגעזעצט מיט דעם לויער וואס האט געארבעט אויף די קעיס פון דעם לב טהור עסקן, צו הערן די אנטוויקלונגען פון די לעצטערע חדשים וואס מ'האט אלס געקענט יא אדער נישט אויפטוהן לטובת דעם יונגערמאן. אבער צו אונזער טאטאלע שאק, האט דער לויער איבערגעגעבן גאר א שווארצע באריכט פון די פארגאנגענע חדשים, אז נישט נאר וואס מ'האט ממש גארנישט אויפגעטוהן און אלע אפיעלס לטובת דעם יונגערמאן האבן נישט מצליח געווען, נאר ניטאמאל האט עס דער באשטימטער ריכטער אויפן קעיס אפגעווארפן און צוריקגעוויזן, נאר ער האט פשוט גענצליך איגנארירט און זיך נישט וואוסנדיג געמאכט פון די אלע אפיעלס וואס מ'האט אריינגעגעבן! די פארשידענע אפיעלס האבן אריינגענומען צווישן אנדערע א פארלאנג צו באקומען ערלויבעניש צו גיין צום אמעריקאנע אמבאסאדע צו מאכן א גרין קארד פאר זיין פאמיליע - א פראצעדור וואס קען נעמען היבש לאנג, און דעריבער האט ער געוואלט ווי פריער עפלייען אז ווען ער וועט שוין קענען ארויספארן פון גואטעמאלא זאל ער נישט דעמאלטס דארפן פון פריש ווארטן אויף א גרין קארד. ווי אויך האט דער לויער געבעטן פונעם ריכטער אויסצוברייטערן די געצוימטע שטח וואו דער יונגערמאן האט זיך געמעגט געפינען אונטער די בעיל רעגולאציעס, צוליב דעם וואס די ארגינעלע דעזיגנירטע ארט איז געווען גאר א אוממענטשליכע ארט זיך אויפצוהאלטן, און דעריבער האט דער לויער געבעטן צו פארברייטערן די ערלויבטע שטח אז ער זאל זיך קענען געפינען אין נארמאלע באדינגונגען.
און אין נאך א שארפערע שריט מצד דעם ריכטער, האט ער צוריקגעוויזן סיי וועלכע פרואוו פונעם לויער זיך צו טרעפן מיט אים פערזענליך, ארויס פון די אפיציעלע געריכט שעה'ן - עפעס וואס יעדער לויער טוהט כסדר ווען מ'טרעפט זיך מיט ריכטער אויסצושמועסן דעטאלן איבער קעיסעס וואס זענען אקטיוו, אבער דער ריכטער האט אין דעם פאל בשום אופן נישט געוואלט איינשטימען זיך צו טרעפן מיט דעם יונגערמאן'ס לויער, נאר בלויז זיין סעקרעטאר האט ער ערלויבט צו האנדלען מיטן לויער.
נאכדעם וואס מיר האבן דאס אלעס געהערט, און נאכדעם וואס דער לויער האט קלאר געמאכט פאר די עסקנים אז אין זיין לאנגיעריגע ערפארונג אין דעם פעלד האט ער נאך אזאנס נישט באגעגנט, האבן מיר אנגעהויבן מאכן ערנסטע אויספארשונגען דורך פארשידענע פארבינדעטע קשרים, צו דערגרינטעווען און דערגיין וואס ס'ליגט באגראבן אונטער דעם מאדנעם פאסירונג. נאכן פארשן און נאכגיין אלע אינפארמאציע וואס מיר האבן ערהאלטן ארום דעם קעיס, איז קלאר געווארן אז דער ריכטער אויף דעם ספעציפישן קעיס קומט פון די געגנט אין Santa Rosa, א געגענט וואס איז דורכגעפוילט מיט טיפע קארופציע ביי אלע לאקאלע באאמטע פון אונטן ביז אויבן, נאכדעם וואס לב טהור פלעגט אונטערקויפן אלע ארטיגע באהערדע, און ווי באקאנט האט די פאליציי עטליכע מאל פרובירט איבערצופאלן די לב טהור שטעטל אומערפאלגרייך, צוליב דעם וואס די אויטאריטעטן פלעגן פארציילן פאר לב טהור פון פאראויס אז ס'גייט קומען א איבערפאל און אז זיי זאלן זיך קענען באווארענען, און טאקע נאר ביי די לעצטע און סוקסעפולע אבלאווע איז ענדגילטיג אויפגעבראכן געווארן די לב טהור רינג בלויז צוליב דעם וואס די העכערע פאליציי דעפארטמענט האט דורכגעפירט דעם איבערפאל, און ביי זיי האט לב טהור נישט געהאט קיין אונטערגעקויפטע באאמטע. און דער דאזיגער ריכטער אויפן קעיס פון דעם לב טהור עסקן, איז אויך געקומען פונעם זעלבן געגענט, און איז דעריבער אויך פארשטייט זיך געווען אונטערגעקויפט דורך די לב טהור לויער וואס איז געשטאנען אונטער די אלע נאכאנאנדע מיסטעריעזע פירונגען פונעם ריכטער קעגן דעם יונגערמאן'ס לויער.
אבער דא שטעלט זיך די מיליאן דאללער'דיגע קשיא; ווער איז דער אמת'ער אנדרייער וואס באפעלט די לב טהור לויער זאל זיך אזוי שלאגן און פרובירן צו באקעמפן די פרואוון פון דעם יונגערמאן צו באקומען א פלי-דיעל? נאך גאר איבערמידליכע אינטענסיווע פארשונגען צו אנטדעקן די שליח און ידא אריכתא וואס שטייט אונטער די גאנצע סומאטוכע און הייסט דעם לב טהור לויער זאל שטערן דעם יונגערמאן'ס באפרייאונג דורכן נאכאנאנד אונטערקויפן דעם ריכטער, איז אנטדעקט געווארן, אז דער יעניגער איז גאר יואל גאלדמאן (במ"א), איינע פון די הנהלה מיטגלידער, און ער איז אויך אנגעקלאגט געווארן אינעם זעלבן קלאגע וואס איז ארויסגעשטעלט געווארן קעגן דעם געוועזענעם לב טהור עסקן. און היות ווי באקאנט איז אין לב טהור א יעדע זאך א מלחמה, מ'וועט זיך קיינמאל נישט אונטערגעבן אדער מודה זיין אויף סיי וועלכע פארברעכן, נאר קעמפן און זיך שלאגן אן אויפהער, ממילא איז דער יואל גאלדמאן געווען גאר ברוגז אויף דעם געוועזענעם עסקן פון לב טהור, סיי פארן זיין דער ערשטער פאררעטער צו דעפעקטירן פון לב טהור און ארבעטן מיט אונז עסקנים, און סיי פארן וועלן איינגיין אויף א פלי-דיעל מיט די פראסעקיוטערס, וואס דאס באדייט זיך ברעכן און מודה זיין אין די פארברעכנס פון לב טהור, און דאס איז עפעס וואס ער האט געוואלט פארמיידן פאר יעדן פרייז, און דעריבער האט ער אונטערגענומען דעם אגרעסיווער קאמפיין צו שטערן דעם יונגערמאן צוזאמען מיט זיין לויער פון צו קענען עררייכן א גרינגע פלי-דיעל, כדי ער זאל מוזן גיין אויף טרייעל, און סיי אז אלע אנדערע אפיעלס לטובתו זאל נישט אנגענומען ווערן אויף קיין שום פאל.
נאך די דאזיגע שאקירנדע אנטדעקונג, האבן מיר זיך צוזאמגעזעצט מיט די לויערס און מטכס עצה געווען וואס מ'קען טוהן כדי צו קענען איבערקומען די דאזיגע שטרויכלונג און קענען פאראויסרוקן די באפרייאונג פון דעם יונגערמאן.
פארשטייט זיך אז צוערשט האט מען פרובירט צו ווארענען און בעטן יואל גאלדמאן אליינס מיט גוטן און מיט בייזן אז ער זאל אפטרעטן, אבער אלע בקשות און ווארענונגען זענען געפאלן אויף טויבע אויערן, און ס'איז געווען קלאר אז דורך דעם וועג וועט מען זיכער נישט אנקומען. דעריבער האט מען געמוזט אנהויבן נעמען אין באטראכט פארשידענע מהלכים וויאזוי אליינס צו קענען איבערהיפן דעם ברענענדיגן פראבלעם און געווינען דעם קאמף.
די ערשטע אפציע אויפן טיש איז געווען צו אריינגעבן א פארלאנג פאר דעם באטרעפנדן אונטערגעקויפטן ריכטער זעלבסט, אז ער זאל זיך אפזאגן פון דעם קעיס, מיט די טענה אז ער איז אונטערגעקויפט אז ער זאל אורטיילן קעגן דעם יונגערמאן, און דעריבער איז ער נישט בארעכטיגט אנצופירן מיט דעם קעיס. אבער ווי ערווארטעט האט דער ריכטער אפגעווארפן די פארלאנג און זיך אנטזאגט אפצוטרעטן פון דעם קעיס, און האט קלארגעשטעלט אז ער וועט ווייטער פארבלייבן פארפיגן אויף דעם קעיס.
די צווייטע אפציע דערנאך איז געווען אריינצוגעבן אן אפיציעלע באקלאגעניש צו א העכערן געריכט צו פארלאנגען אז דער ריכטער מוז ווערן אפגעזאגט פון דעם קעיס. אבער נאכן רעדן מיט די פראפעסיאנאלן אין דעם פעלד האבן זיי קלאר געמאכט אז צו געווינען אזא קלאגע און דאס קענען אויספירן קען געדויערן אפילו יארן, און דאס איז נישט קיין רעאליסטישע לעזונג צו נעמען אין באטראכט.
אין די לעצטע פרואוו צו פרובירן באאיינפלוסן יואל גאלדמאן אז ער זאל זיך ברעכן און אויפהערן אונטערלייגן פיסלעך, האבן מיר זיך פארבינדן מיט מערערע לב טהור פארבינדעטע אז זיי זאלן פרובירן צו טוהן וואס זיי קענען אפצושטעלן זיינע אקטיוויטעטן, אבער אלע פון זיי איינס ביי איינס האבן געענטפערט אז זיי האבן נישט קיין השפעה אויף אים און פארמאגן נישט די מעגליכקייט אים אפצושטעלן מיט גוטן אדער מיט בייזן.
ביי דעם פונקט דארף ארויסגעברענגט ווערן א באזונדערע יישר כח און דאנק פון טיפן הארץ פאר דער געטרייער מסירות נפש עסקן, הצדיק ר' אלעזר אבא זילבערשטיין הי"ו (וואס ארבעט צוזאמען האנט ביי האנט מיט העסקן הצדיק ר' שמעון ישראל פאזען הי"ו), וואס איך האב זיך פארבינדן מיט אים מערערע מאל צו בעטן הילף אפצושטעלן יואל גאלדמאן פון זיינע שרעקליכע מעשים, און ער האט אריינגעלייגט איבערמידליכע כוחות משפיע צו זיין אויף די לב טהור פארבינדעטע אז זיי זאלן לייגן דרוק און אים אפשטעלן, אבער ליידער האט ער איינגעשטימט אז די טויערן זענען פארשלאסן, יואל גאלדמאן וויל נישט הערן פון גארנישט, און ס'איז נישטא מער וואס צו טוהן אויף דעם פראנט.
נאך די אלע באמיאונגען און שתדלנות וואס האבן נישט געברענגט קיין רעזולטאטן, האבן מיר זיך ווידעראמאל צוזאמגעזעצט פאר א דרינגענדע מיטינג מיט די לויערס, צו זעהן וואסערע אפציעס עס זענען נאך פארבליבן צו ראטעווען דעם קעיס, און נאכן איבערגיין אלע פרטים און אנטוויקלונגען אין די פארלאפענע וואכן ווען מ'האט פרובירט אויף אלע אופנים זיך צו רוקן פאראויס, אבער ליידער אומערפאלגרייך, האבן די לויערס אומצוויידייטיג קלארגעשטעלט, אז די איינציגסטע אפציע וואס איז נאך פארבליבן אויפן טיש, און איז עפעס וואס וועט ווארשיינליך יא מצליח זיין און איבערקומען אלע פראבלעמען, איז דורך דעם וואס דער יונגערמאן וועט איינגיין צו מאכן א דיעל מיט די פראסעקיוטערס, אז אין אויסטויש פארן צושטעלן אינפארמאציע איבער פארשידענע לב טהור אקטיוויטעטן וואס די פראסעקיוטערס ווילן באקומען, וועלן זיי ארויסווארפן אלע קלאגעס קעגן דעם יונגערמאן. און אין אזא פאל זענען די ריכטער'ס הענט געבינדן און ער קען נישט ארויפלייגן קיין שום צוימונגען אויף דעם אנגעקלאגטן אפילו פאר איין טאג, וויבאלד איינמאל די פראסעקיוטערס דערקלערן אז זיי ווארפן ארויס אלע קלאגעס, איז דער אנגעקלאגטער אויטאמאטיש ריינגעוואשן און איז א פרייער מענטש, און די ריכטער האט נישט די מעגליכקייט דאס צו אפווארפן.
נאך די דאזיגע אנטוויקלונג, ווען מיר האבן געדארפט אנערקענען די ווייטאגליכע רעאליטעט, האבן מיר תיכף אנגערופן די רבנים וועלכע באגלייטן די גאנצע פרשה שוין פון אנהייב, און האבן באגלייט אלע פעולות ביז היינט לכל אורך הדרך, און מיר האבן זיי איבערגעגעבן א באריכט מיט די פונקטליכע מציאות הדברים מיט אלע דעטאלן, און אנגעפרעגט את המעשה אשר יעשון אין אזא סיטואציע. זעלבסטפארשטענדליך אז די חשוב'ע רבנים האבן דאס נישט גענומען פאר לייכט, נאר ערנסט אנגעהויבן דורכטוהן די גאנצע נושא מהחל ועד כלה, און זיי האבן פארשטייט זיך פארלאנגט פון די עסקנים און די לויערס אלע באווייזן און פרטים פארבינדן צום קעיס, בכדי צו פעסטשטעלן די לעגיטימיטעט פון די געשיכטע מיט אלע אירע פרטים ופרטי פרטים.
איינמאל די רבנים האבן באקומען א קלארע בילד און פעסגעשטעלט מיט א זיכערקייט די מציאות וואס דא קומט פאר, אז דער געוועזענער לב טהור עסקן וועט קענען גענצליך אויסמיידן תפיסה דורך א פלי-דיעל, און אז צוליב די אינטערווענץ פון יואל גאלדמאן וואס מאכט זיכער צו שטערן די פלענער וועט ער מוזן גיין אויף טרייעל, און אז די איינציגסטע וועג ארויס אז דער יונגערמאן זאל זיך קענען ראטעווען איז נאר דורכ'ן מאכן א דיעל מיט די פראסעקיוטערס, ממילא באדייט דאס אז יואל גאלדמאן האט א קלארע דין רודף מיטן גורם זיין אז א אידיש קינד זאל דארפן זיצן אין תפיסה, און היות ער וויל זיך בשום אופן נישט ברעכן און אויפגעבן דעם קאמף, און די איינציגסטע וועג פאר דעם יונגערמאן זיך צו ראטעווען איז נאר דורך דעם דיעל מיט די פראסעקיוטערס, ממילא איז דער יונגערמאן ע"פ הלכה בארעכטיגט איינצוגיין אויף דעם דיעל, וויבאלד דאס איז די איינציגסטע מהלך זיך צו קענען ראטעווען פון דארפן שמאכטן אין טורמע.
אין די זעלבע צייט דארף ארויסגעברענגט ווערן, אז חיים צבי מלכא האט נישט דאס מינדעסטע שייכות מיט די גאנצע פרשה קעגן דעם יונגערמאן, אדרבה, ער העלפט גאר שטארק ארויס די עסקנים אין די לעצטערע חדשים מיט פילצאליגע פעולות ארויסצוהעלפן דאס ארויסראטעווען די לב טהור משפחות, ממילא ארבעטן מיר אויף אלע פראנטן אים ארויסצוהעלפן זיך ארויסצוזעהן פון זיינע קלאגעס.
נאך א נקודה. אידן פרעגן וועגן די מצב אין די שעלטערס, אויב די קלאגעס גייען נאך אן. וויל איך אייך זאגן, אז איך בין די וואך געווען אין גואטעמאלא, און כ'האב גערעדט צו די מענעדזשער וואס פארפיגט אויף די שעלטער, און ער האט מיר מיטגעטיילט, אז שוין זייט פסח לאזט מען נישט אריין צו די קינדער אין די שעלטערס, אלעס צוליב די אומאויפהערליכע פאלשע קלאגעס וואס ווערט אנגעפירט טאקע דורך דער זעלבער יואל גאלדמאן, אלס טייל פון זיין אגרעסיווע קאמף מיט די גואטעמאלא רעגירונג אויף פילע פראנטן, און די וואך אליינס איז אריינגעגעבן געווארן א פרישע קלאגע. און פאר ווער עס וויל דאס לייקענען קען איך ליידער ווייזן עטליכע קלארע דאקומענטן איבער די קלאגעס אריינגעגעבן אין די לעצטע צוויי וואכן אליינס!
ולד' הישועה.
הק' יואל יהושע העשיל בלום
