איך וויל מוסר מודעה זיין און מגלה דעת זיין, אז אלעס וואס איך שרייב איז על דעתי וכוונתי בלבד.
דער רב איז אהערגעקומען קיין אמעריקע, נישט אויפן דעת צו האבן עפעס א שררה אדער א כח השפעה. לכתחילה איז זיין פלאן געווען זיך אריינצוזעצן אין בית-המדרש און לעבן ווי א פשוט'ער איד. ער איז אפילו גרייט אנצונעמען אן ארבעט און נישט זיין א פוסע על ראשי עם-קודש. ער שפירט נישט אז ס'קומט זיך אים מכח אבותיו או מכח עצמו א מקום אויפן אויבן-אן פון כלל-ישראל.
דעריבער, דער רב דארף צוקומען צו געלט - בעסער געזאגט, "כלל-ישראל דארף צוקומען צו דער רב'ס געלט". ער טוט אסאך גוטע זאכן מיט די געלט און העלפט ארויס מענטשן וואס קומען ארויס פון דארט. עס איז נישט קיין סוד די פעולות לטובה וואס ער האט אלס געטון פאר די יוצאים, און וואס ער טוט נאך אלס ביזן היינטיגן טאג, דאס אלעס קאסט אפ א הון-תועפות און דער רב דארף צוקומען צו די געלט פון אחבנ"י. ער איז דעריבער מכיר-טובה יעדער וואס העלפט ארויס דערמיט און שטיצט די הייליגע פעולות. בנוגע די טיטלען און זיין מעמד אין כלל-ישראל, מוז געזאגט ווערן קודם-כל, אז דער רב שליט"א האלט נישט מיט פונקטליך וואס עס ווערט דא געשריבן אויף אים. והשנית, איז דאס לאו-דוקא ווי אזוי דער רב שליט"א קוקט זיך זעלבסט אן, און מצידו איז נאכנישט קלאר ווי אזוי ער וועט זיך אוועקשטעלן אין אמעריקע (הגם עס איז דער האפענונג פון אלע זיינע תלמידים וידידים, יוצאי כנישתא חדא, ומכיריו זה רבות בשנים, אז אזוי זאל זיך עס טאקע אויפשטעלן און אז ער זאל נוצן זיינע כוחות להשפיע ולהרביץ תורה).
לפי דבריו פונעם רב, איז כנישתא חדא געווען א חובת-השעה, בשעת מען האט געמוזט אוועקשטעלן א זאך צו ראטעווען אידישע קינדער און עס איז קיין ברירה נישט געווען, אבער אין אמעריקע איז אלעס אנדערש, און ער זוכט נישט קיין אויבן-אן פאסטן. דערווייל זענען מענטשן צוגעוואוינט פונעם עבר, בשעת ער האט אנגעפירט מיט די קהילה און יישוב פון כנישתא חדא, דעריבער איז דער טיטל שוין פארבליבן ווי אזוי עס איז פארבליבן.
בנוגע זיין מעמד: אלעס ווענדט זיך אין דעם עתיד, ווי אזוי דער אויבערשטער וועט אים צופירן און ווי אזוי עס וועט זיך אויסשטעלן. דער רב מצידו זוכט עס נישט, און ער איז גרייט צו טון יעדע זאך וואס איז נאר מעגליך לצורך פרנסה. אוודאי וועט עס זיין פאר אים א חשיבות, אויב ער קען זיצן און לערנען, אדער כאטש אן ארבעט אינערהאלב תורה. אבער דער רב איז קלאר נישטא פאר דעם דווקא, און זיין רצון איז צו זיין אן עמך איד, בתוך שאר כלל-ישראל, זיך נישט אויסשליסנדיג אדער זיך אויפהייבנדיג העכער אנדערע (עס מוז צוגעלייגט ווערן, אז זיינע געוועזענע תלמידים ווילן פאר אים עפעס אנדערש, אבער אלעס ווענדט זיך ווי אזוי דער באשעפער וועט צופירן).
(געשריבן געווארן על פי בקשתו.)
